RENUNGAN 1 MUSA ( Kejadian) 15: 1- 6 MANGASAHON DENGGAN BASA DOHOT ASI NI ROHA NI DEBATA

 

RENUNGAN 1 MUSA ( Kejadian) 15: 1- 6  MANGASAHON DENGGAN BASA DOHOT ASI NI ROHA NI DEBATA

 

Horas ma di hita. Selamat Ari Minggu. Nuaeng nunga sahat hita tu Minggu Reminiscere, na marlapatan : Saingot ma angka denggan ni basam . Na marojahan do i tu Psalmen 25: 6 na mandok: Sai ingot ma, ale Jahowa, angka denggan ni basam dohot asi ni roham, ai sian na robi do angka i. Las ma rohanta marsomba tu Tuhanta sadarion,mamuji pasangaphon goar-Na huhut tumamgihon hata-Na sihangoluhononta. Disoarahon hata ni Tuhanta ( 1Musa 15: 1-6) hombar tu minggunta sadarion asa: MANGASAHON DENGGAN BASA DOHOT ASA NI ROHA NI DEBATA. Sada hasadaon do denggan basa ( rakhmat - bah. Ibrani: rahum) dohot asi ni roha ( kasih-setia, bah. Ibrani: hesed) ni Debata Songon dia do na mangasahon denggan basa dohot asi ni roha ni Debata, boi do i idaonta sian pardalanan ni ngolu ni si Abraham.

1. Tonggong marpos ni roha mangihuthon panogunoguon ni Debata. Tarida di ngolu ni si Abraham sian mulai pangoloionna di pajouon ni Debata tu ibana asa bungkas sian tano hagodangananna Ur Kasdim ( Irak) tu tano sipatuduhonon ni Debata na so binotona manang na dingkan dia. Ujungna ibana maringanan di huta Sikhem Tano Kanaan. Ndang adong ganggu ni rohana laho mangihuthon panjouon ni Debata tu ibana, nang pe nunga matua ibana hatiha i marumur 75 taon. Dirajumi ibana do denggan basa dohot asi ni roha ni Debata, olo Debata mamangke ibana pasauthon sangkap ni Debata.

2. Tongtong marpangkirimon di hasasaut ni janji manang bagabaga ni Debata. Bagabaga ni Debata tu si Abraham ima na lehonon ni Debata torop pinomparna dohot tano siingananna. Hatiha i ndang adong do pe anakna, jala ibana dohot dongan saripena si Sara nunga matua. Alai pos do rohana di Debata. Tinogutogu ni panghirimon di hasasaut ni bagabaga i tongtong do ibana marpos ni roha tu Debata, atik pe godang do angka pengalamanna na manganggu panghirimonna i. Isarana ingkon bungkas ibana dohot keluargana tu tano Misir siala haleon na masa di luatna. Hape di na so pamotoanna dalan ni Debata do i asa boi ibana mamora mulak sian i mamboan godang arta sian Raja Parao. Ditaban halak anak ni hahana si Lot, gabe ingkon marporang ibana paluahon si Lot, alai marhite i gabe mardongan ibana tu malim ni Debata di huta i na margoar si Melkisedek. Dipasupasu malim i ma si Abraham, asa ditumpak Debata ibana.

3. Pasahat ngoluna hibul tu Debata, ala ndang adong sipangasahonon di ngolu on. Tongtong do ro Debata mandapothon nahinaholongan ni roha-Na laho paposhon rohana asa unang mabiar mangadopi ragam ni parungkilon, laho pahehehon rohana asa dipasahat na hinolsohon ni rohana tu Debata. Dung manang sadia leleng ro do Debata mandapothon si Abraham marhite alatan, asa unang ganggu roha ni si Abraham. Didok Debata tu si Abraham: "Unang ho mabiar ale Abram. Ahu do lombulombum, upam mansai balga". Diboto Debata godang do pe angka mara siadopan ni si Abraham di ingananna na imbaru i sian angka bangso na humaliang. Ala ni i isara ni na marporang mansai ringkot di ibana lombulombu na mangondingi ibana maradophon sumbia ni angka musu asa malua ibana. Ala ni i ro do Debata paposhon roha ni si Abraham asa unang mabiar ibana maradophon manang ise pe ai Debata do lombulombu (perisai) na.

4. Pasahathon hohoi ni roha tu Debata marhite tangiang. Di na ro Debata mandapothon si Abraham, laos hatiha i martangiang do si ibana tu Debata pasahathon hoihoi ni rohana dohot na sai pinarungkilhonna mandok: "Oe ale Tuhan Jahowa, aha ma lehononmu di ahu? Sai na punu do ahu, si Elieser na sian Damaskus na ma sitean bagashu". Di bagasan tangiang on dipataridahon do pangidoanna asa haru dilehon Debata di ibana anak, asa unang punu ibana, jala asa unang gabe naposona si Elieser halak Damaskus i sitean bagasna. Di tangihon Debata do tangiang ni si Abraham i didok ma mandok ibana: "Ndang ibana tumean ho, na ruar sian butuham, ibana tumean ho. Dung i ditogihon Tuhan i ma ibana ruar tu balian, jala ninna: Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: Songon i ma pinomparmu sogot". Lapatanna, ndang halak na asing na tumean ibana, manang na tumean goarna alai anakna sandiri na tinubuhonna do.

5. Tongtong porsea di hata ni Debata. Porsea do si Abraham di hata ni Debata na pinasahat-Na tu ibana. Haporseaonna i do mambahen ibana boi mangolu di bagasan bagabaga ni Debata. Ndang ganggu rohana di bagabaga ni Debata, benget do ibana paimahon hasasaut ni na nidok ni Debata tu ibana. Haporseaon ni si Abraham i gabe hatigoranna do i dirajumi Debata. Laos ala ni i do umbahen na digoari ibana ama ni torop halak angka na porsea di Debata.Di tingki na binuhul ni Debata saut do nanidok ni Debata tu si Abraham. Dung marumur ibana 100 taon, ditubuhon ma si Isak marhite dongan saripena si Sara. Si Isak ma na umpompar halak Israel marhite anakna si Jakob. Pinompar ni di Jakob (Israel) nunga torop muse marserak tu sandok portibion. Alai targoar pinompar ni si Abraham do muse sude angka na porsea di Debata marhite Jesus Kristus, ima Israel na imbaru. I do umbahen didok surat na tu halak Heber muse songon torop ni bintang di langit dohot na sagodang ni rihit pinompar ni si Abraham ( Heber 11: 12).

1