MANGOLU SONGON ANGKA ANAK NI DEBATA DI BAGASAN HAPORSEAON TU KRISTUS (RENUNGAN GALATIA 3: 23 - 29)

 

RENUNGAN GALATIA 3: 23 - 29 : MANGOLU SONGON ANGKA ANAK NI DEBATA DI BAGASAN HAPORSEAON TU KRISTUS.

 

Horas ma di hita. Selamat Ari Minggu, i ma Minggu I dung Trinitatis. Las ma rohanta marsomba tu Tuhanta, mamuji pasangaphon goar-Na, huhuhut tumangihon hata-Na sihangoluhononta. Disoarahon hata ni Debata do tu hita na dienet sian Galatia 3: 23-29, asa mangolu hita di bagasan haporseaon tu Jesus Kristus, ai nunga dipalua haporseaon i hita sian parhatobanan ni dosa gabe angka anak ni Debata.

1. Siparorot do patik i.

Dihata Gorik didok "paedagogos". Di tongatonga ni keluarga ni halak Junani, somal do adong na marhobas songon "paedagogos", manang siparorot. Ndang guru na mangajari ibana. Sahalak parhobas naung leleng marhobas di sada keluarga jala naung tangkas dihaposi gabe siparorot ni anakhon ni keluarga i asa mar parange na denggan sahat rodi na tang di parrohaon. Ibana do na manaruhon anakhon na pinarorotna i tu parsingkolaan manang tu guruna jala mangalap muse laho mulak. Mangihuthon si Paulus sarupa tusi do fungsi ni patik na nilehon ni Debata tu bansona sian mulana i ma manogunogu bangsona sahat tu na marhaporseaon tu Debata na paluahon nasida sian parhatobanan ni Misir. Mangihuthon si Paulus patik i do na mamboan jolma sahat tu haporseaon tu Kristus. Patik i do manogunogu jolma sahat ro di na boi mambuat haputusan sandiri laho manghaporseai Jesus. Jadi patik i do mangalehon kesadaran di jolma, na so boi marhite usahana sandiri ibana sahat tu haporseaon dibagasan Kristus. Alai di pardalanan ni sejarah ni bangso Israel sahat tu sejarah ni hajahudion muse, dipahebaheba nasida do patik na sampulu gabe mansai godang pola tu na adong 613 patik. Mangihuthon nasida ondo dalan tu haluaon. Angka na mangalaosi patik i mansai borat do uhumanna. Tarhurung manang tarihot ma nasida di bagasan patik i. Haroro ni Jesus tongtong laho paluahon jolma sia hurungan ni patik manang rumang ni angka patik di tongatonga ni angka suku bangso isara ni adat di habatahon. Nga jotjot nang adat habatahon mangihoti halak Batak tu adat i, umbiar rohana di adat i sian pangajarion ni Kristus. Nunga tingkina halak Batak menilai tuntutan ni angka adat i marhite sinondang ni barita na uli. Angka adat na so relevan be di parngoluon si ganup ari hombar tu parhusoran ni zaman ndang sai partahanhononhon be. Alani i tapangke ma patik dohot adat gabe sipanogunogu mamboan hita tu Jesus.

2. Gabe angka anak ni Debata ma hita, unang be angka na pinarhatoban ni dosa. Marhite pandidion di bagasan goar ni Debata Ama, Anak dohot Tondi Porbadia, nunga ditubuhon angka na porsea i paduahalihon gabe angka anak ni Debata. Ala ni molo nunga anak hita tama ma hita marparange songon angka anak ni Debata, ndada be songon hatoban ni dosa na paolooloi hagiotna manang hisaphisap ni portibion naung nirajaan ni si bolis i. Ala naung anak hita disuru Debata do tu bagasan rohanta Tondi ni Anak i, asa margogo hita manjouhon "Abba", ale Amang tu Debata. Margogo hita nang marparange na denggan songon angka anak ni Debata. Angkup ni didok apostel Paulus di Gal. 4: 7, dibahen na so hatoban be hita nunga gabe anak ni Debata, gabe dohot ma hita panean ( pewaris) sian Debata di hangoluan na saleleng ni lelengna. Partohap di harajaon ni Debata.

3. Marparuloshon ( marpahean) Kristus.

Saluhut naung tardidi tu bagasan Kristus, nunga marparuloshon Kristus. Alani i angka na porsea di bagasan Kristus, nunga gabe sada saluhutna, ndang mardia imbar be halak Jahudi, halak Gorik, hatoban manak anak mata, baoa manang parompuan. Songon i ma di huria i, ndang adong be imbar ni angka ruas ni huria i, ai nunga sude angka anak ni Debata. Ndang boi be ruas ni huria i dibedabedahon mangihuthon status sosial, manang parbangsoon, manang jenis kelamin. Di halak Jahudi memang di anggap do toru status ni boruboru, dianggap do lea angka na pogos manang hatoban, dianggap do toru angka bangso na so Jahudi isara ni halak Gorik rupani, na di anggap songon halak sipelebegu manang kapir. Alai di bagasan Kristus ndang adong be panghilalaan na songon i. Ndang na mandok gabe mago ma parbangsoon i, mago mago status sosial i, mago ma nang hadirion songon baoa manang boru- boru. Ndada na gabe diagohon angka status i, alai di bagasan Jesus nunga sada saluhutna, ndang adong be parbolatbolatan, ai sarupa do arga ni jolma i di adopan ni Debata. Parasingasingan na adong patuduhon hamoraon ni Debata i do i, asa boi marhite parasingan i boi angka na porsea i masitumpahan jala madipasingkopan na sada tu sada.

(MSM PANJAITAN)

Galatia 3:23-29

23. Alai tagan so ro haporseaon, tarhurung do hita di bagasan patik jala dihinsu, managam haporseaon, na naeng patandahonon dope.

24. Asa gabe songon siparorot do patik i, mamboan hita tu Kristus, asa sian haporseaon hita dipintori.

25. Alai dung ro haporseaon i, ndang be ginomgoman ni siparorot i hita.

26. Ai saluhut do hamu anak ni Debata marhitehite haporseaon di Kristus Jesus.

27. Ai Kristus i do diparuloshon hamu, sude hamu, naung tardidi tubagasan Kristus.

28. Ndang mardiaimbar disi Jahudi manang Gorik, hatoban manang anak mata, baoa manang parompuan, ai sada do hamu saluhutna di bagasan Kristus Jesus.

29. Alai anggo Kristus nampuna hamu, pinompar ni Abraham do hamu, antong, jala panean mangihuthon bagabaga i.