JALAHI MA HABISUHON NA SIAN GINJANG (RENUNGAN YAKOBUS 3: 13 – 18)

 

RENUNGAN YAKOBUS 3: 13 – 18:  JALAHI MA HABISUHON NA SIAN GINJANG 

 

Horas ma di hita. Selamat Ari Minggu pa VII dung Trinitatis. Las ma rohanta marsomba tu Tuhanta sadarion, mamuji pasangaphon goar-

Na, huhut tumangihonbhata-Na sihangoluhononta. Disoarahon hata ni Debata sadarion sian Jakobus 3: 13-18 do tu hita asa tahangoluhon habisuhon na sian ginjang manang na sian Debata, unang habisuhon na sian tano on, na sian sibolis. Dipatuduhon do di turpuk on adong dua rumang ni habisuhon na boi manggohi rohanta, i ma habisuhon na sian ginjang manang habisuhon na sian Debata dohot habisuhon na sian tano, habisuhon na sian jolma manang sibolis. Alai disosohon do asa talului habisuhon na sian ginjang, unang habisuhon na sian tano manang portibi on.

1. Sian sibolis do habisuhon na sian tanoon. Didok di 1 Musa 3: 1, ulok do na umbisuk sian nasa na manggulmit di ladang. Alai sian sibolis do habisuhonna i, na dipangke sibolis i do ulok i laho pasauthon sangkapna laho mandabuhon jolma i tu dosa, manang mangalo Debata. Marhite habisuhonna i dipaotooto sibolis i jolma i marhite na pabalikhon hata ni Debata. Ala naeng dos jolma i dohot Debata, gabe dioloi nasida ma hata ni sibolis i. Ala ni sega ma hubungan ni jolma tu Debata. Songon i do sahat tu saonari dibahen sobolis i tu jolma, mangunjuni jolma asa dipados dirina dohot Debata marhite parbinotoanna, marhite sinadonganna, marhite huasona dohot jabatanna. Ujungna dirina manang na adong di dirina i pe dipardebata ma, ndang unduk be tu Debata, ndang unduk be tu hata dohot patik ni Debata. Ujungna aha na pinarhagiot ni rohana i ma diulahon, na dirajumi boi pasombuhon uas ni rohana. Angka halak na songon on ndang hea boi manghasabamhon na adong di ibana, ndang diboto manghamaulistehon basabasa ni Debata, ala dirina dohot gogona do dipangasahon.

2. Habisuhon na sian sibolis patubuhon pangiburuon dohot hatongkaron. Pangiburuon i ma na so olo manghamauliatehon na adong di dirina. Ndang las rohana molo dumenggan parngoluon ni donganna sian ibana. Tubu pangalaho na songon on ala sai torus mamparbandingkon dirina tu donganna na asing. Boi do jorbut panghorhon ni pangiburuon on, boi do i manghorhon roha late, boi manghorhon sogo ni roha, hosom dohot parmusuon sahat ro di na masibunuan. Mangiburu do si Kain mamereng anggina si Abel, ala pelean ni si Abel dijalo Debata, ia peleanna ndang dijalo, gabe sogo ma rohana mamereng anggina i laos dibunu ( 1 Musa 4: 2-16). Mangiburu do do si Saul mamereng si David, ala si David dipapujipuji natorop dung marhasil manaluhon musunasida halak Falistin. Alani i sai naeng ma bunuon ni Saul si David i ( 1 Sam. 18: 16 d.u). Pangiburuon na tubu do i sian roha diri, dohot na so adong panandaon ni dirina. Domu tuson do nang hatongkaron. Ummura antusan na di hata Indonesia i i ma " mementingkan diri sendiri". Na mementingkan diri sendiri do halak na tongkar, na mangarajumi dirina sumintong jala humebat sian donganna. Ala ni na sai adong do halak mementingkan diri sandiri umbahen olo tubu partongkaron manamg pargulutan, na manghorhon hagaoron dohot ulaon hajahaton. Pangalaho on do deba jotjot mambahen sega hasadaon ni sadasada punguan.

3. Hangoluhon ma habisuhon na sian ginjang i ma habisuhon na sian Debata. Suharsuhar ni habisuhon tanoon do habisuhon na sian ginjang.

Silehonlehon ni Debata do i na dapot marhite biar mida Jahowa (Poda 1: 7; 9: 1; Psalmen 111: 10). Ndang dapot i guruhonon marhite na mamangke utokutok, holan marhite biar mida Debata do i dapot. Molo didok biar mida Debata ndang dos i dohot na mandao sian Debata. Di Bibel si sada ihot do pangantusion ni biar mida Jahowa dohot haporseaon tu Debata dohot holong tu Debata. Na mabiar tu Debata i ma na porsea tu Debata jala na holong rohana di Debata.Biar tu Debata mambahen hita tongtong masihol tu Debata, mangolu di bagasan Debata, mauas tongtong di hata ni Debata. Marhite ngolu na songon i tubu habisuhon na sian Debata. Hataridaanna, i ma ngolu na bontor, olo mardame, lambok, pangoloi, gok asi ni roha dohot parbue hadengganon, dao sian hagangguon dohot pangansion. Jadi habisuhon ndada holan di hata alai marhite parange do dohot pambahenan. Na bontor, i ma halak polin rohana, ndang marlaok maradophon Debata nang dongan jolma. Na olo mardame i ma na olo mamolushon na hurang na binahen ni dongan, ndada na pajujurjur hatigoranna sambing. Halak na songon on do na nidok Jesus halak na martua, ai goaron do nasida anak ni Debata ( Mat. 5: 9). Na lambok roha ( peramah didok di hata Indonesia), ima na sai tabo hatana tu panghilalaan ni donganna.Ndang kasar hatana na boi parohon rimas dohot hansit ni roha. Halak na lambok roha pe digoari Jesus do halak na martua, ai teanon nasida do tanoon ( Mat. 5: 5). Angkup ni didok halak na bisuk i ma pangoloi di Debata, pangoloi di patik dohot uhum ni Debata. Gok asi ni roha dohot ragam ni ulaon na denggan do angka na bisuk, ai parasi roha jala pardenggan basa do Debata silehon habisuhon i. Ndang ganggu rohana di ngoluna ala pos do rohana tongtong di panarihon dohot pandonganion ni Debata. Ias do rohana, songon i di bagasan songon i do di duru, ndang adong pangansion (munafik). Na manggabusi dirina dohot manggabusi Debata do halak pangansi manang na munafik.

_____________________

Jakobus 3:13-18 Habisuhon na sian ginjang

13 Ise hamu na bisuk jala na pantas marroha? Sian denggan ni parangena ma dipataridahon ibana angka ulaonna marhitehite halambohon ni habisuhon!

14 Alai molo ditiop hamu pangiburuon na paet dohot hatongkaron di bagasan rohamuna, unang ma puji hamu dirimuna maralohon hasintongan, huhut margabus!

15 Ndada i habisuhon na ro sian ginjang; na sian tano do i, sian roha ni jolma, sian sibolis.

16 Ai ia disi pangiburuon dohot hatongkaron, disi ma hagaoron dohot sandok ulaon hajahaton.

17 Alai anggo habisuhon na sian ginjang i, sandok na bontor do i, olo mardame, lambok, pangoloi, gok asi ni roha dohot parbue hadengganon, dao sian hagangguon nang pangansion.

18 Alai di bagasan dame do disaburhon parbue hatigoran di angka na mangulahon dame i.