RENUNGAN YESAYA 58: 9b-14: PASUPASU NI DEBATA TU ANGKA NA MARHADAULATON NA TUTU

 

RENUNGAN  YESAYA 58: 9b-14: PASUPASU NI DEBATA TU ANGKA NA MARHADAULATON NA TUTU

Horas ma di hita. Selamat Ari Minggu pa X dung Trinitatis( 21 Agust. 2022). Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangolujononta. Disoarahon hata ni Debata do tu hita sadarion na dienet sian Jesaya 58: 9b-14, asa tahangoluhon hadaulaton na tutu, ndada hadaulaton sipalensem, ai taruli pasupasu ni Debata do na marhadaulaton na tutu.

1.Pasiding ma hadaulaton sipalensem. Hadaulaton sipalensem i ma hadaulaton sipaulaula, idaon sian ruhut parduru hira halak na daulat roha ibana, hape rohana dohot pangulaonna digohi hajahaton do.

Torop do halak mangarajumi dirina naung halak na daulat roha molo nunga diulahon ruhutruhut parduru ni parugamaonna. Alai boi do marmara pangarajumion sisongon i, molo ruhut parugamoonna i diulahon ala ni onjar ni roha na sala, isara ni asa dipuji halak, asa dianggap halak ibana halak na daulat roha manang parugamo na tutu. Sada hadaulaton sipalensem na ditaringoti si Jesaya di jolo ni turpuk on i ma parpuasoon na sala. Nunga singkop dirajumi puasana i molo boi diulahon ndang mangan jala ndang minum. Alai penindasan, pangarupaon, penipuan, ro di ragam ni angka hajahaton na asing di ngolu siganup ari tong do diulahon. Ndang adong rasa kepedulian tu angka halak na susa dohot na patut siurupan. Hadaulaton sipaotooto na marsipalensem do na songon i. Didok Tuhan Jesus di Padan Na imbaru marjea do halak sisongon i (Mat. 25. d.u)

2. Mangulahon hadaulaton na tutu. Marhite ngolu hadaulaton (ibadah) isara ni parpuasoon, parsombaon tu Debata, partangiangon, ditogutogu do hita ndada holan mangaradoti hubungan tu Debata alai dohot do hubungan tu dongan jolma. Marhite parsombaon tu Debata, ditogutogu do hita asa mananda ise dirinta diadopan ni Debata, asa tapatutoru dirinta, songon jolma na lea nian di adopan ni Debata, alai dihaholongi jala diasii Debata do hita. Marhite i ditogutogu do hita manghaholongi Debata jala pasangaphon Debata. Alai tandana i ma marhite na holong rohanta tu dongan jolma jala olo hita mangargahon dohot mangasii dongan jolma lumobi angka na susa na patut siurupan.Marhite na mananda ise Debata, jala mananda dirinta ise diadopan ni Debata, ditogutogu do hita, paholangkon diri sian pangarupaon, sian tudutudu ni jarijari, dohot panghuling hajahaton. Pangarupaon i ma ragam ni penindasan tu dongan jolma, na mangampehon auga manang boban na borat tu dongan jolma. Tudutudu ni jarijari i ma na jotjot manudu hasalaan ni dongan, patubutubu hasalaan ni dongan laho manutupi hasalaanna sandiri. Mansai mura do mangampehon sala tu dongan jala mangampini diri sandiri. Panghuling hajahaton i ma angka pangkuling na sai girgir mangaleai manang mamurai dongan jolma manang pahatahata dongan. Alai ndang sae holanghon diri sian angka pangalaho sisongon i. Ingkon dohot do mangulahon angka na denggan isara ni mangalehon asi ni roha tu halak na male, dohot pasabam roha ni angka na dangol. Tontu diulahon i marhite angka ulaon parasi ni rohaon tu angka na patut siurupan, paluahon sian angka hasusaanna. Sandok molo tapangido asa dipasupasu Debata hita, ingkon rade do hita gabe pasupasu tu dongan na humaliang hita.

3. Pasangaphon Debata di ari na pinarbadianna. Hadaulaton na somal taantusi i ma marsomba (beribadah) tu Debata di ari na pinarbadianna. Di Padan na robi digoari do ari na pinarbadiaan ni Debata ari Sabat. Sabat lapatanna ari paradianan na pinarbadiaan ni Debata. Alai nunga dipaimbaru i marhite padan na imbaru, gabe di ari Minggu ma di ulahon angka na porsea di Jesus ari na pinarbadiaan ni Debata. Ari Minggu lapatanna ari ni Tuhan i, ala di ari i do ari hamonangan ni Jesus sian hamatean dohot ari hasasaor ni Tondi Porbadia. Ari minggu i ma gabe ari sabat (paradianan) di halak Kristen na porsea di Jesus. Didok di turpuk on ndang jadi mangulahon lomo ni roha, hagiot manang sangkapsangkap ni roha sambing hita di ari i, manang marhata rari. Marhata rari lapatan, marhata na so maraturan manang omong kosong. Alai ingkon gabe ari hasoloan do ari i tarajumi, ari na marmulia na tau pasangaphon Debata.

4. Pasupasu ni Debata tu angka na marhadaulaton na tutu. Ragam do pasupasu tu angka na mangulahon hadaulaton na tutu Parjolo didok, binsar ma hatiuronmu di bagasan haholomon. Dipatiur Debata roha na golap dohot roha na rundut, gabe tiur roha i jala dapot las ni roha. Paduahon ditogutogu Debata hita di pardalananta asa unang tartuktuk di angka buntulbuntul, jala asa unang tinggang di dalan na landit. Ditogutogu hita asa unang lilu di dalanta. Patoluhon, dipasabam rohanta di inganan na rahar. Pasupasu ni Debata do molo boi tahasabamhon silehonlehon ni Debata na tu hita, manang songon dia pe rumang ni silehonlehon i. Boi tongtong sonang rohana, ala ndang hurangan panghilalaanna. Paopathon, dipapir holiholinta, gabe margogo hita mandalani ariari ni ngolunta, mangula angka siulaonta ro di mangadopi angka tantangan ni ngolunta. Palimahon, dibaen hita songon porlak na nisiniram jala songon mual na so marsik.. Lapatan boi tubu angka suansuanan na denggan sian ngolunta, jala mabaor mual hangoluan. Dungi paonomhon angka pinomparta boi manguduti sundutta jala pahembanghon angka pasupasu ni Debata na sahat tu hita di tingki na salpu . Lapatanna ndang gabe gotap pasupasu ni Debata i olat ni sundutta, alai torus do sahat tu sundut na mangihut. Molo songon i boi ma hita tongtong marlas ni roha raphon Debata Jahowa.

Jesaya 58:9-14

9b Molo dipaholang ho sian tongatongam pangarupaon, tudutudu ni jarijari dohot pangkuling hajahaton.

10 Jala dilehon ho asi ni roham tu na male, jala dipasabam ho roha ni na dangol, jadi binsar ma hatiuronmu di bagasan haholomon, jala hagolaponmu tudoshon hos ni ari.

11 Jadi sai tongtong ma togutoguon ni Jahowa ho jala pasabamonna roham di angka inganan na rahar, jala papironna holiholim, gabe tudoshon porlak na siniram do ho, jala songon mual, na so dung marsik.

12 Jadi paulion ni angka anakmu ma angka pasipasi sian narobi, patindangonmu ma angka ojahan marsundutsundut, jala goaron ni halak ma ho: Sipauli angka riga, sitotas angka dalan balobung asa hainganan.

13 Molo tung ditait ho patmu sian ari Sabbat mangulahon lomo ni roham di ari habadiaonku, jala digoar ho ari Sabbat: Ari hasoloan, marmulia di angka jolma na badia ni Jahowa; jala dipasangap ho ibana, unang diulahon ho angka dalanmu, unang diihutihut ho lomo ni roham manang marhata rari.

14 Jadi marlas ni roha ma ho mida Jahowa, jala ahu manogunogu ho di atas ni angka buntulbuntul ni tano on, jala parmudumuduonku ma ho marhitehite parjambaran ni Jakkob ompumuna i, ai pamangan ni Jahowa do mandok songon i.