RENUNGAN MATIUS 10: 32-39: MANGIHUTHON JESUS JALA MAMORSAN SILANG

 MANGIHUTHON JESUS JALA MAMORSAN SILANG

Horas ma di hita. Selamat Ari Minggu III dung Trinitatis (25 Juni 2023). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, ima na dienet sian Evangelium Mateus 10: 32-39, asa taihuthon Jesus i sian sandok roha dohot ngolunta, atik pe ala ni na mangihuthon Jesus hita ingkon marungkil hita di ngolunta sahat tu na ingkon mamorsan silang songon na tinaon ni Jesus. Mangihuthon Jesus Kristus songon na na tarsurat di turpuk on, na dihatahon tu angka siseanna, i do lapatan ni na gabe Kristen. Goar Kristen na marlapatan siihuthon Kristus parjolo sahali dihonahon tu angka sisean ni Tuhan i di huta Antiokhia ( Ulaon 11: 26). Alai molo didok siihuthon Kristus, ndada holan pangihutihut sambing, alai sian nasa rohana mangihuthon sude parngoluon dohot na niajarhon ni Jesus i, ndada holan di tingki dapotan parsaulian dohot na tabo hita di parngoluon portibi on, alai ingkon dohot di tingki na hansit dohot haporsuhon songon na nitaon ni Jesus. Jadi na mangihuthon Jesus, i ma na:

1. Rade marsihohot manghatindanghon Jesus di jolo ni jolma. On do sada hataridaaon ni halak Kristen manang siihuthon Kristus na tutu, i ma marsihohot manghatindanhon haporseaonna tu Jesus di jolo ni saluhut jolma tagan di ngoluna di portibi on. Manghatindanghon Jesus ndada holan di tingki ibadah manang parmingguan, songon naung somal taulahon hombar tu naung diaturhon di agenda ni parminguon i. Alai di sude parngoluon do haporseaonta di Jesus i hatindanghononta, i ma di ulaon siganup ari, di parsaoran siganup ari dohot dongan jolma. Manghatindanghon Kristus na nidokna ndada holan marhite hata, manang marhite simbolsimbol, isara ni marhite na mamangke perhiasan tanda silang, alai lumobi marhite pambahenan dohot sikap hakristenon na denggan do tu saluhut dongan jolma. Ndang jadi hita maila patuduhon dirinta na Kristen, di sude inganan dohot situasi na taadopi. Alai ndang secara demonstratif i ulahononta, marhite parsihohoton di haporseaon i do. Torop do na maila patuduhon ibana na Kristen maradophon halak na asing ala maila. Jala adong do na sampe olo mansoadahon hapoeseaonna tu Jesus, maninggalhon agamana ala ni na tarela di bahen jabatan, pangkat, parsaripeon, sinadongan, manang angka paruntungan portibion . Tarela ala ni hinatabo ni ngolu parsatongkinan na di portibion, gabe ndang diargahon be panghophopon ni Jesus na gok sitaonon i di dirina dohot di sude jolma pardosa. Didok Jesus holan angka na satia manghatindanhon Jesus i do di jolo ni jolma na di portibion, hatindanghonon ni Jesus di jolo ni Debata Ama na di banuginjang i, na mangalehon upa ni angka na marsihohot manghatindanghon Kristus i tagan di ngoluna di portibi on, i ma surgo hasonangan i. Alai angka na mansoadahon Jesus i tagan di ngoluna na di portibion, soadahonon ni Jesus do i sogot di jolo ni Debata Amanta na di banuaginjang i. Dungi hona uhum ni Debata ma nasida tu hamagoan salelenglengna.

2. Rade manghaholongi Jesus sumurung sian dongan na di portibion tarmasuk keluarga. Antar maol do antusan pandohan ni Jesus na di ayat 34-36 i. Didok Jesus, ndang na ro Ibana mamboan dame tu portibion, tung podang do. Pabadahon anak tu amana, boru tu inana, parumaen tu simatuana boru. Marhite i seolah-olah Jesus patubuhon porang manang parbadaan di portibion, di tongatonga ni hajolmaon. Hape sai disoarahon do di buku na badia i, na mamboan dame do Jesus ro tu portibion, padamehon Debata tu jolma pardosa, jala padamehon jolma tu donganna jolma. Alai ingkon taantusi do ayat on di bagasan konteks parsuruon ni Jesus di angka siseanNa mamaritahon barita na uli i tu tongatonga bangso na so tumanda Jesus do pe. Marhite barira na uli i adong ma na porsea di Jesus, adong na so olo porsea. Boi do i masa di sadasada keluarga. Angka anakhon ni keluarga i manjalo barita na uli i gabe porsea tu Jesus. Hape natorasna ndang olo porsea di Jesus, gabe tubu ma paraloan ni angka anak i tu natorasna. Di angka daerah penginjilan di mulana i tarjotjot do masa na songon i. Isarana di daerah Jawa jotjot do masa na songon i di parmulaan ni hamamasuk ni parbarira na uli tu daerah i. Olo do di sadasada keluarga adong manjalo barita na uli i gabe porsea di Jesus. Alai dihasogohon keluarga i ma na manjalo i, sahat ro di na dipaduru , ndang boi mardomu be tu keluarga i. Tarmasuk hak warisna di keluarga i pe ndang dilehon be. Alai dipapungu angka parbarita na uli ma na di paduru i, di sada parhutaan gabe tubu ma parhutaan ni halak Kristen. Diajari ma angka Kristen i marusaha sandiri. Di parhutaan i dipatupa ma angka pelayanan sosial, dipajongjong parsingkolaan laho manogunogu angka halak kristen i dohot masyarakat na humaliang.Di tingki sisaonari on boi masa do pe masa na songon i, paraloan ni na porsea dohot na so porsea di Jesus. Molo di tongatonga ni sada keluarga masa na songon i, ingkon patuduhonon ni na porsea i ma na humolong rohana di Jesus sian keluargana. Ndang na mandok ndang haholonganna be keluargana ala ni holong ni rohana tu Jesus. Ingkon tongtong do holong rohana di keluarga i, alai ingkon sumurung ma holong ni rohana tu Jesus. Lapatanna ndang boi ambatan ni holong ni rohana tu keluargana na so porsea i do pe holong ni rohana tu Jesus. Jadi ndang boi keluarga mangambati na porsea i laho mangihuthon Kristus i. Jala angka na porsea i pe ndang jadi sumurut haporseaonna ala ni keluarga manang lingkungan i na so olo porsea.

3. Rade mamorsan silang na tu ibana, ala ni Kristus. Didok Tuhan Jesus tu angka sisean-Na (ay.38): "Jala na so mamorsan silang na tu ibana i, laho mangihuthon Ahu, ndang na tama i siseanHu". Lapatan ni hata ni Jesus on, ingkon rade do halak Kristen manang siihuthon Kristus mamorsan silang na tu ibana. Laos marlapatan do i ganup halak adong be do silangna na marasingasing. Silang i i ma gombaran ni sitaonon na tabolus, alai ndang sude sitaonon tardok gabe silang. Adong do sitaonon ala ni hasalaanta, manang ala ni halembaonta, manang ala ni parulaonnta na so sintong. Alai silang na nidokna ima sitaonon ala ni na mangihuthon Jesus Kristus, manang sitaonon ala ni na marsihohot di haporseaonna tu Jesus. Isarana songon sitaonon ni halak Kristen na parjolo i, hona lele, manaon na porsuk, hona persekusi, hona tindas, sahat ro di na hona bunu alani na mangihuthon Jesus. Mungkin di tingki sisaonari nunga marasing rumang ni silang na ingkon siporsanonta.. Di zamanta sisaonari, boi do silang i ro sian na humaliang hita, boi sian keluarganta, sian dongan saulaonta. Alai ingkon porsanonta do i di bagasan habengeton huhut pasahathon tu Tuhan i asa dipargogoi hita mamorsan silang na tu hita be.

4. Rade sumeahon ngoluna ala ni Kristus. Didok di ay. 39: "Ai na marhamaolhon ngoluna, ngolu ni i do na mago sogot; alai na sumeahon ngoluna ala ni Ahu, i do jumpangan ngolu sogot". Tontu pengorbanan do na nidokna dison. Rade mengorbankan diri ala ni Kristus, dohot ala ni sude ulaon ni Jesus i. Molo tabandingkon tu ayat na sejajar di evangelium na asing, isarana Luk.17: 33, hata hosa do dipangke. Didok: "Agoan hosa ma na naeng paluahon hosana; alai na agoan hosa, i do na pangoluhonsa." Hata hosa dohot ngolu na diterjehaon sian hata na sarupa di hata Gorik, ima " psukhe". Alai hira sarupa do pangantusion ni, maneahon ngolu manang maneahon hosa, olo korban ala ni Kristus, dohot ala ni na mangihuthon Kristus, manang ala ni na mangulahon sude ulaon dohot pangajarion ni Kristus. Isarana olo korban sahat tu na agoan hosa ala ni hasintongan dohot hatigoran. Olo korban laho manghophop dongan na diperlakukan tidak adil. Halak na songon i do didok Jesus na pangoluhon hosana manang na jumpangan ngolu sogot. Alai na olo mansoadahon hasintongan, margabus, mangangkalangkali dongan ala ni nanaeng marhamaolhon ngoluna manang paluahon hosana, ido na agoan hosa, manang agoan ngolu sogot. Torop do tabereng di zaman on na so paduli di hasintongan, gari ada olo mansoadahon uhum hasintongan, ala ni na marhamaolhon ngoluna na di portibion, asa dapotan paruntungan na di portibi on. Sahat tu na so alang rohana mengorbankan donganna, manjehehon donganna ala ni na mangalului pangomoan portibi on, manang ngolu na di portibion. Hape marhite i di na so sinadaranna nunga agoan hosa manang agoan ngolu sogot i.

________________

Mateus 10:32-39

32 Ai ganup na mangkatindanghon Ahu di jolo ni jolma, i do hatindangkononHu di jolo ni Damang na di banua ginjang i;

33 alai ganup na mansoadahon Ahu di jolo ni jolma, laos soadahononHu do i di jolo ni Damang na di banua ginjang i!

34 Unang ma dirimpu rohamuna, na mamboan dame Ahu, umbahen na ro tu tano on; ndada na ro Ahu mamboan dame, tung podang do!

35 Ai na ro do Ahu pabadahon anak tu amana, boru tu inana, parumaen tu simatuana boru;

36 jala tung donganna sajabu gabe musu ni jolma i.

37 Na humolong roha di amana manang di inana asa di Ahu, ndang tama i siseanHu; jala na humolong roha di anakna dohot di boruna asa di Ahu, ndang tama i siseanHu.

38 Jala na so mamorsan silang na tu ibana i, laho mangihuthon Ahu, ndang na tama i siseanHu.

39 Ai na marhamaolhon ngoluna, ngolu ni i do na mago sogot; alai na sumeahon ngoluna ala ni Ahu, i do jumpangan ngolu sogot.

RENUNGAN ROMA 7: 15-25: MANGHAHOLONGI PATIK NI DEBATA

 MANGHAHOLONGI PATIK NI DEBATA

Horas ma di hita. Selamat Ari Minggu V dung Trinitatis ( 9 Juli 2023). Las ma rohanta marsomba tu Tuhanta sadarion, mamuji pasangaphon goarNa, huhut tumangihon hataNa sihangoluhononta. Disoarahon hata ni Debata sadarion do tu hita, na dienet sian Roma 7: 15-25, asa tahaholongi huhut tahangoluhon patik ni Debata na manogunogu hita mangulahon na denggan na hombar tu lomo ni roha ni Debata. Nunga dipasingkop Tuhan Jesus patik i tagan di portibi on do pe Ibana. Alai ndada patik dalan haluaon songon na niantusan ni halak Jahudi. Tuhan Jesus do dalan haluaon tu banua ginjang, panogunogu do patik i di hita tagan di ngolunta di pirtibi on laho patupa angka na denggan, manghaholongi Debata sian nasa rohanta, jala manghaholongi dongan jolma songon dirinta.Ala ni ingkon taargahon jala tahaholingi do patik i. Domu tusi tapasahat dirinta tongtong tu Tuhan Jesus Sipalua hita sian dosa, jala tapangido hagogoon ni Tondi Parbadia laho mangulahon patik i dohot manaluhon huaso ni dosa sian dirinta. Turpuk jamita on laos manogunogu hita do mangantusi hadirionta songon jolma na tinompa ni Debata jala songon jolma na madabu tu dosa.

1. Jolma na tinompa ni Debata tudos tu rupa dohot pangalaho ni Debata. Songon na boi jahaonta di barita panompaon ni jolma di buku 1 Musa 1-2, ditompa do hita jolma tudos tu rupaNa dohot pangalahoNa. Sada silehonlehon ni Debata tu jolma domu tompa ni jolma na tudos tu rupa dohot pangalaho ni Debata, i ma habebason ni hagiot ni roha( kebebasan kehendak). Jala laos dilehon do tu hita jolma pingkiran dohot hapistaran. Ndang ditompa Debata jolma i songon robot na nikendalihon ni nampunasa. Alai ditompa Debata do di jolma i adong habebason laho mamutushon dia siulahononnna. Marhite silehonlehon on ma boi jolma mamillit manang mamutushon siulaonna na hombar tu hagiot ni roha. Domu tu tuson laos disuanhon Debata do tu roha ni jolma i parbinotoan di na denggan siulahononna dohot parbinotoan ni na roa sipasidingonna, marhite patik na disuanhon tu roha ni jolma i. Marhite kemampuan na adong di dirina do jolma i laho pahembangkon dirina tu tingkat parngoluon na tumimbo dohot tu parbinotoan na lam tu majuna. Aut sugari ndang adong kemampuan na songon i, hot do songonsongon i jolma i ndang adong perkembangan. Ido membedahon jolma sian angka mahluk na asing.Alai disalagunahon jolma i do habebason na adong di dirina. Ndang diihuthon panggora ni rohana i, alai na diihuthon hagiot ni dagingna do. Mulai sian i ma, hadadabu ni jolma tu dosa, marhite na mangoloi elaela ni sibolis. Sian mulai i gabe dosa i ma mangarajai roha ni hita jolma na tinompa ni Debata tudos tu rupaNa dohot pangalahoNa i.

2. Huaso ni dosa di bagasan diri ni jolma. Dung madabu jolma tu dosa, torus ma jolma i di bagasan dirina hira na marporang laho mangalo dosa i. Di sada sisi jolma i sian dirina marusaha laho mangula lomo ni roha ni Debata marhite na manguji mangaradoti patik ni Debata, alai ndang tarbahensa be. Gariada dung madabu jolma tu dosa hira na torus nama jolma i mangalo dompak Debata. Angka na denggan na sinuanhon Debata di bagasan roha ni jolma i ndang diulahon. Na hinagigihon ni Debata i do diula, ndada na hinalomohon ni Debata. Jadi dosa na so manghalomohon hita mangula na denggan, i na ma mangarajai ngolunta. Dosa i nama na marhuaso di dirinta, nang pe nian maralo do i tu panggora ni rohanta. Di na songon i do hita jotjot marungkil di bagasan ngolunta songon na nialaman ni si Paulus. Di hilala ibana adong dua hadirion na masialoan di bagasan dirina. Sada i ma hadirion na sasintongna na manghalomohon na denggan dohot roha na dame. Alai na sada nari, ima hadirion na palsu naung mangarajai ngoluna. Hagogoon na so boi be ditaluhon, i ma na so hinalomohon ni roha parbagasan, huhut na so hinalomohon ni Debata. Di pangalaho na songon i ma si Paulus mandok: ndada ahu na mangulahonsa tung dosa i do na mangingani ahu. Disi ma masialoan panggora ni rohana dohot na niulahonna. Na niulana i ma na mangihuthon sangkapsangkap ni daging, na maralo tu hagiot ni Tondi ni Debata. Alai maralo do i dohot rohana parbagasan.

3. Dipatunduk dosa i do hagiot ni rohanta. Nang pe taparhagiot do nian mangula na denggan hombar tu patik i i, alai ndang tarbahen hita ala nunga diparhatoban dosa i hita. Nunga sude pardagingonta diingani dosa i. Ndang adong be na so dirajai dosa i. Ala ni i do didok si Paulus ma, ala ni dosa nunga gabe jolma na dangol hita, na so boi be hita malua sian gomgoman ni dosa i anggo sian dirinta. Patik na nilehon ni Debata pe ndang tarbahensa be paluahon hita. Alana ternyata nang pe taboto do isi ni patik i, alai ndang tuk parbinotoanta di patik i be paluahon hita. Ala ni i do taharingkothon adong na gabe sipalua hita.

4. Jesus Kristus do Sipalua hita sian dosa. Ala nunga sude hadirionta dirajai dosa i, ndang tarbahen hita paluahon dirinta sian dosa i. Manang beha pe perjuangannta sian dirinta ndang tuk be i paluahon hita. Gariada boi do lam bingung hita di ngolunta on. Ala ni disosohon apostel Paulus do hombar tu naung nialamanna di ngoluna asa tapasahat sandok ngolunta tu Jesus Kristus. Ibana do Anak ni Debata naung tuat tu portibion na gabe Sipalua hita sian dosa. Ibana naung manaon na porsuk di portibion sahat ro di na mate di hau pinarsilang, nunga manaluhon huaso dohot gogo ni dosa i. Alai laos ditogurogu do hita manghaholongi patik ni Debata ai marhite patik i do Debata manogunogu hita mananda dohot mangokuhon dosanta diadopan ni Tuhanta. Dungi taboan ma dosanta i tu adopan ni Debata marhite Jesus Kristus, asa dipalua hita sian dosanta i, jala dipargogoi hita marhite tondiNa laho mangalo dohot manaluhon dosa i di ngolunta siganup ari. Marhite hagogoon ni Tondi i tarbahen hita ma mangoloi patik ni Debata, ndada mangoloi patik ni dosa i be.

_____________

Rom 7:15-25

15 Ai ndang hutolopi na hubahen i; ai na huhagigihon, i do huula, ndada na huhalomohon i.

16 Alai ia huula na so hinalomohon ni rohangku, na manolopi ma ahu di hinadenggan ni patik i.

17 Asa ndada ahu na mangulahonsa, tung dosa i do na mangingani ahu.

18 Ai huboto do, ndang adong na denggan maringanan di bagasan ahu, mandok di bagasan dagingku. Ia hagioton dapot do nian di ahu; alai ndang dapot anggo na patupahon na denggan.

19 Ai ndada huula na denggan, na pinarhagiot ni rohangku; na roa i, na so huhalomohon, i do huula.

20 Alai molo huula na so hinalomohon ni rohangku, ndang apala ahu mangulasa dosa i do tahe, na maringanan di bagasan ahu.

21 Asa jumpang ahu songon aturan: Na roa do dapot di ahu, nang pe dipangido rohangku mangulahon na denggan.

22 Ai dihalashon jolma parbagasan na di ahu do nian patik ni Debata.

23 Alai huida do patik na asing di bagasan angka ruas ni dagingku, na marmusu dompak patik na di bagasan rohangku; gabe dipatunduk do ahu tu gomgoman ni patik ni dosa, na di bagasan ruas ni dagingku.

24 Oe, ahu jolma na dangol on! Ise ma paluahon ahu sian pamatang hamatean on?

25 Mauliate ma hudok tu Debata marhitehite Jesus Kristus Tuhanta i. Dibahen i, ahu sandiri mangoloi patik ni Debata di bagasan rohangku; alai mangihuthon daging i, patik ni dosa i do huoloi.

Semua tanggapan:

16Jones Simamora, Sinta Uli Panjaitan dan 14 lainnya

RENUNGAN 5 MUSA 30: 11-14: ULAHON MA HATA NI DEBATA

 ULAHON MA HATA NI DEBATA

Horas ma di hita. Selamat Ari Minggu IV dung Trinitatis. Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata di tu hita sadarion, na dienet sian 5 Musa 30: 11-14, asa taulahon hata ni Debata, i ma patik-Na na dipasahat tu hita, asa dapotan hangoluan dohot hatuaon hita. Ragam do rumang ni hapataran ni hata ni Debata tu hita, na sudena i nunga disurathonn di Buku Na Badia i. Boi do hata ni Debata marrumang patik na gabe aturan manang pedoman siihuthononta songon angka anak ni Debata, asa taboto mangulahon na denggan maradophon Debata, maradophon dongan jolma nang maradophon sude lingkungan ni panrngoluonta. Adong do hata ni Debata na pabotohon holong ni roha, rodi sude angka pambahenan-Na na gok asi ni roha, asa unang ganggu hita mangihuthon dohot mangoloi Ibana. Adong do hata ni Debata na gabe apulapul di hita uju marsak hita, adong do na mangalehon panghirimon tu ngolu sogot, dohot rumang angka na na asing. Sudena i patoguhon parsaoran, manang hubunganta tu Debata, asa unang ganggu hita mangolu di bagasan Ibana. Sada hasadaon do sude

ni hata ni Debata nang pe marragam rumangna, ndang boi papulikon na sada sian na sada.Alai sipata ringkot do diondolhon Debata angka rumang ni hata-Na i hombar tu sangkap ni Debata marhite hataNa i.

1. Ndang masongkalhu hata ni Debata. Lapatanna ndang ma maolhu antusan dohot dungdungon ni pingkiran hata ni Debata. Molo manghatai Debata dihatahon do i di bagasan hata na na niantusan ni jolma. Ndang adong hata ni Debata na khusus di banuaginjang, ai sude do parhataan ni jolma naung marribu ragamna na jinadihon ni Debata. Jadi ndang ingkon di bagasan hata na tontu

Debata pasahathon hata-Na. Dipahombar Debata do tongtong hataNa i tu tingkat hatauon ni jolma laho mangantusi. Jadi di bagasan parhataanta do Debata manghata i dohot hita, jala hita pe manghatai dohot Debata di bagasan parhataanta i do. Ala ni olo do sipata hata ni Debata na tajaha di Buku Na Badia i hira na maralo tu parbinotoan ni jolma di tingki on. Isarana di buku 1 Musa 1-2, onom ari do Debata manompa nasa na adong. Hape mangihuthon parbinotoan ilmu alamiah na ginuruhon ni angka na pistar di tingki on marjuta taon do proses hajajadi ni hasiangan on, ndada onom ari sambing. Ndang gabe ganggu hita di hata ni Debata na songo i, ala hira na maralo tu parbinotoan ni jolma , ai ndang dos hata ni Debat dohot ilmu parbinotoan ni portibion. Molo pe songon i hata ni Debata tarsurat di Buku Na Badia, na naeng hatindangkonon ni hata ni Debata disi, i ma na Debata do na manjadihon nasa na adong, ndang na tubu sandiri i songon i hombar tu proses ni alam. Ala Debata do na manjadihon, ba laos Debata do nampumasa, dohot nampuna huaso disi, ndang boi jolma mambahen lomolomona tu na jinadihon ni Debata.

2. Ndang maholanghu hata ni Debata, alai mansai donok do. Ndada di banuaginjang hata ni Debata, manang di bariba laut umbahen so pola ingkon adong suruon laho mangalapsa tu inganan i. Ndang pola sialapon hata ni Debata, ai dipasahat Debata do hataNa i di ganup ingananta be. Ragam do dalan ni Debata laho pasahathon hata tu jolma. Adong do marhite naposona, ima halak na jinou jala diparade Debata laho pasahathon hata-Na i. Na jolo tu bangso Israel di pasahat do i marhite uluan ni bangso i, isara si Musa, manang marhite panurirang, songon i dohot malim. Sude hata ni Debata na disurathon di Buku Na Badia, na sinurat ni angka na poso ni Debata do i. Sude na manurathon i jolma do, i ma angka na porsea di Debata, naung gabe hasahatan ni hata ni Debata. Marhite angka naposo ni Debata nunga sahat hata ni Debata tu sude pamangan ni roha dohot pamangan ni jolma. Jadi ndang na didabuhon Buku Na Badia i sian banua ginjang, songon na niantusan ni deba halak taringot Buku Na Badiana.Alai na sinurat ni jolma do i marhite panogunogu on ni Tondi Debata. Di 2 Tim. 3: 16-17, didok: " Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran,

asa rimpas halak ni Debata, hobas tu nasa ulaon na denggan".

3. Hapataran ni hata ni Debata tu jolma dipasingkop marhite Jesus Kristus. Jesus Kristus i ma hata ni Debata na gabe jolma. Marhite Jesus tangkas ma dipanghilalahon jolma Debata ro mandapothon jolma, ndang dao be Debata manghatai tu jolma, ai ndang dao be Debata sian jolma. Debata nunga mian ditongatonga ni jolma. Ala ni mangulahon hata ni Debata ima mangulahon patik na imbaru na binoan ni Jesus. Patik na imbaru na binoan ni Jesus, asa masihaholongan sandok hita angka anak ni Debata. Songon holong ni roha ni Kristus di hita, songon i ma dohot hita masihaholongan ( Johannes 13: 34).

4. Siulahononhon do hata ni Debata ndang holan sibegeon. Didok apostel Jakobus ( 1: 22): Alai gabe siulahon Hata i ma hamu, unang holan pananginangi, angka na paotootohon dirina!" Domu tusi dipodahon Jesus do tu angka sisean-Na di Matius 7: 26: "Alai na umbege hatangki, hape ndang diulahon, i ma sipatudoson tu halak na oto, na paulihon bagasna di atas rihit". Jadi ndang sae holan manangihon alai ingkon ulahonon do, jala marhtite na mangulahon i do manghatindanghon hata ni Debata, manang majamitahon hata ni Debata. Lam torop do halak nuaeng mangharingkothon holan mambege hata ni Debata alai ndang diulahon hata ni Debata na nibegena i. Jadi sipareonna do na butongan ndang rohana manang ngoluna.I do umbahen torop halak Keisten di tingkinon mangalului jamira na holan pageokgeokhon pinggol songon na nidok ni apostel Paulus tu sisesanna si Timoteus ( 2 Tim. 4: 3). Ala ni angka parjamita pe gabe torop do tarunjun, mangarade jamitana gabe jamita na boi pageokgeohon pinggol ni na umbegesa. Boha asa las roha ni halak mambege jamitana. Alai olo do las ni roha ni halak holan di tingki na mambege jamita i, alai dung salpu lupa do di jamita i gabe ndang adong diboto dia siulahononna.

5 Musa 30:11-14.

Jonok do patik i di na ringkot roha disi

11.Ai patikon, na hutonahon i tu ho sadarion, ndang masongkalhu di ho, manang maholangku.

12.Ndada di banua ginjang hata i, umbahen pola ingkon dohononmu: Ise ulaning singkatnami manaek tu banua ginjang, asa mangalapsa di hami dohot pabegehonsa tu hami, asa ulahononnami nian?

13. Jala ndada di bariba ni laut hata i, umbahen pola ingkon dohononmu: Ise ulaning singkatnami taripar laut mangalapsa di hami dohot patubegehonsa, asa ulahononnami nian?

14. Ai mansai donok do hata i di ho, di bagasan pamanganmu tahe dohot di bagasan roham, asa ulahononmu i.

RENUNGAN MAZMUR 65: 1-9: PUJI JALA PASANGAP MA DEBATA NA MANGARAMOTI BANGSONA DOHOT NASA NA TINOMPANA

 PUJI JALA PASANGAP MA DEBATA NA MANGARAMOTI BANGSONA DOHOT NASA NA TINOMPANA

Horas ma di hita. Selamat Ari Minggu VI dung Trinitatis (16 Juli 2023). Las ma rohanta marsomba tu Tuhanta sadarion mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Psalmen 65: 1-9, asa tapuji jala tapasangap Tuhan Debata, siala denggan ni basa-Na na mangaramoti huhut marmudumuduhon hita bangso-Na dohot sude na tinompa-Na. Pangaramotion-Na i ndada holan na mardomu tu ngolu pardagingonta, alai dohot do na mardomu tu partondionta, i ma haluaon ni tondinta.

Pangaramotion-Na i tarida di pambahenan-Na maradophon hita.

1. Na rade manangihon tangiangta. Digoari par-psalmen i do Debata, Sitangihon tangiang, na marojahan do i di pengalaman ni ngoluna na manghilalahon sai ditangihon Debata do tangiangna. Ala ni i disosohon parpsalmen i do asa sude angka na porsea mamuji pasangaphon Debata.Mansai sonang do panghilalaanta molo taboto na ditangihon Debata do tangiangta. Tangiang do dalanta marparsaoran dohot Debata. Marhite tangiang i do hita mangalualu tu Debata, pasahathon panghilalaan dohot sude angka na taparungkilhon di ngolu on asa diurupi hita. Molo tu dongan jolma hita mangalualu, ndang sai manigor adong na manangihon hita. Memang hita di bagasan haporseaon tu Debata marhite Jesus Kristus ditogutogu do hita asa gabe sipartangiang. Nang halak Israel pe songon bangso ni Debata ditogutogu do asa gabe sipartangiang, tangiang pribadi marsasahalak manang tangiang rap dohot angka dongan di tingki patupahon ibadah manang parsombaon tu Debata. Buku Psalmen na pinatomutomu ni angka halak sipartangiang songon si David godang do i dipangke songon buku tangiang tu Debata, na dipangke halak Israel di tingki maribadah tu Debata di bagas joro. Jadi molo digoari si David na manurat turpukta on Debata, Sitangihon tangiang, laos sada dorongan do i tu halak Israel asa sai girgir rohana martangiang tu Debata. Alai molo tahaporseai Debata Sitangihon tangiang, ndang marlapatan i sude tangiangta dioloi Debata. Ingkon tongtong do tangiangta hombar ru lomo ni roha ni Debata, ai umbotoan do Debata aha na ringkot di ngolunta sian hita sandiri. Ala ni i nang jotjot angka na tapangido di tangiangta ndang sai sude dilehon Debata, ala na tapangido i olo do jotjot holan na hombar tu hagiotta sandiri na maralo tu lomo ni roha ni Debata. I do umbahen hea didok apostel Jakobus di suratna tu angka halak Kristen na na parjolo i di Jakobus 4:3:" Na martangiang do hamu nian; alai ndang manjalo, ala sala tangiangmuna, ai naeng pansuasaehononmuna do i di bagasan hahisaponmuna." Jadi pangidoan na nionjar ni hahisapon dohot roha diri, ndang sai dioloi Debata. Alai na pasti Sitangihon tangiang do Debata, jala tongtong dipasahat alus ni tangiangta i aha na dumenggan di hita hombar tu lomo ni roha.

2. Rade do Debata manesa dosanta. Di panandaonta, parlambas ni roha do Debata, nang pe di pihak na asing parrimas do Ibana. Ai tarrimas do Debata marnida jolma pardosa, songon rimas ni Debata uju i tu si Adam dohot si Hawa ala madabu nasida tu dosa. Alai tongtong umbalga do holong ni roha ni Debata sian rimasna. Ai ndang lomo rohana mida hamagoan ni angka pardosa, alai mulak ma nian pardosa i tumadingkon dalanna asa mangolu ibana, i do dihalomohon Debata. Di bagasan roha na songon i do Debata rade tongtong manesa dosa ni jolma pardosa. I do tong na hinatindangkon ni parpsalmen i di turpukta on, hombar tu na nialamanna di ngoluna. Ai sadar do si David jotjot do mangulahon dosa na mambahen tarrimas Debata mida ibana. Songon na nilangkupna si Batseba, jolma ni si Uria panglima porang ni si David i, tarrimas situtu do Debata songon na pinasahatna, marhite panurirang Natan ( 2 Sam. 12: 1 d.u.) Alai marpangulahi do roha ni Debata mida ibana, disesa Debata do dosana i dung manopoti dosa ibana tu Debata.

Porlu do tong antusanta, molo tahatindangkon na rade Debata manesa dosanta, ndang boi i parsidalianhononta asa sai mandatdati mangulahon dosa. Ndang jadi adong tubu di bagasan rohanta mandok, ndang pola boha molo sai taulahon do pe dosa saleleng di portibi on, ai parasi roha do Debata, sesaon ni Debata do i molo ro hita pasesahonsa tu adopan-Na. Molo songon i rohanta na mangunjuni Debata do hita disi, hape diorai hata ni Debata do hita mangunjuni Debata songon na nipatikhon ni Debata tu bangsoNa . Di buku 5 Musa 6: 16, didok: "Ndang jadi unjunanmuna, Jahowa Debatamuna i, songon naung niunjunanmuna Ibana di Massa."

Deba na naeng sihangoluhononta, molo taokuhon Debata rade manesa dosanta, ingkon rade do hita manesa dosa ni dongan na mardosa tu hita. Ndang tagamon sesaon ni Debata dosanta, molo ndang rade hita manesa dosa ni donganta. Ala ni i do di tangiang na niajarhon ni Jesus tu angka siseanna, molo tapangido hasesaan ni dosanta tu Debata ingkon rade do hita manesa dosa ni dongan na mardosa tu hita. Molo so songon i, hot do tongtong dosanta i.

3. Rade do Debata mangalehon hatuaon tu angka na ro mandapothon Ibana tu bagasNa. Didok di ay. 5 ni turpuk on: "Martua ma halak na pinillitMi, jala niloasMi dumonok, manginganhon angka alamanMi!". Hatuaon do di hita molo dohot hita dipillit Debata panean di harajaonNa, jala diloas hita dumonok manginganhon alaman ni Debata. Dipasupasu Debata do angka na ro mandapothon Ibana di bagasNa, jala marsinondang do hamuliaon ni Debata tu ganup halak na ro tusi, gabe las roha jala sabam roha nasida mulak sian i. I do hatuaon ni angka na porsea, molo boi tongtong las roha jala sabam roha di ngolu on, so marojahan ni arta manang sinadongan portibi on, alai marojahan di las ni roha ala manghilala di panarihonon ni Debata di ngoluna. Manang ise na manghilala di bagasan linggoman ni Debata ngoluna, ngolu ni i do na martua, ala manghilala ndang hea hurangan ngoluna, ala singkop do saluhutna di adopan ni Debata. Di bagasan panghilaan na songon i ndang tagamon so ingkon pujion jala pasangaponta Debata di ngolunta.

4. Pangaramotion ni Debata di na tinompaNa. Ndada holan na manompa hasiangan on ro di nasa isina Debata, alai dohot do mangaramoti sude na jinadihonNa i. Diramoti do na tinompaNa i ro di nasa isina marhite huasoNa na na sun gogo i. Dipatuduhon jadijadianNa i do habalgaon dohot hamuluaon ni Debata. Dipaojak do angka dolok na timbo na boi mangondingi angka na tinompa i, dohot mangatur parhusoran ni tingki arian dohot borngin, ro di parhusoran ni partingkian ni musim. Di angka dolok i do hatubuan ni harangan na boi mangaramoti ekosistem ni portibion. On mangombarhon na Debata do mangaramoti angka jolma na tinompa i, asa boi marhasonangan. Dipaso do angka hasak ni laut, hasak ni galumbang asa unang marmara angka na mamolus laut i ro di angka pangisi ni na humaliang laut i. Sude hasiangan on di bagasan kendali ni Debata. Di paro do nang udan laho mamornohi tano na jinadihonna i asa denggan hatubuan ni angka suansuanan, na gabe hangoluan ni jolma na tinompaNa i. Alai molo songon i pe pangaramotion dohot pemeliharaan ni Debata di na tinompana i, na manungguli hita jolma do i asa dohot hita mangaramoti na tinompa ni Debata. Molo disosoi hita asa tapuji jala tapasangap Debata siala pangaramotina di jadijadianNa i, naeng patuduhononta i marhite parsidohotonta mangargahon dohot mangaramoti jadijadian ni Debata, isarana marhite na manjagahon haiason ni lingkungan, manjagahon asa unang tasegai jadijadian ni Debata, tajagahon asa unang masa bencana banjir, ai hita do ditompa Debata songon wakilna di portibion laho mangaramoti na tinompaNa i. Jadi marhite pambahenan na songon i do hita mamuji pasangaphon Debata. Ndada holan marhite hata, manang ende na uli begeon ni sipareon. Boi do uli endenta, alai ndang adong tindakan manang pambahenanta mamuji pasangap Debata, sisoada do endenta. Ai jotjot do marhite parendeon i, ndada Debata na tapauji alai dirinta sandiri na marende i do na tapuji, ai olo do dihirim rohanta pujion ni halak hita marhite endenta. Jadi molo tapuji jala tapasangap Debata marhite endenta, ingkon dohot nang pambahenanta dohot ngolunta mamuji pasangap Debata.

________________

Psalmen 65:1-9

1 Ende sian si Daud.

2 Ingkon nalom ni roha di Ho do pujipujian, ale Debata di Sion, jala gararon do tu Ho bagabaga.

3 Ale sitangihon tangiang! Tu Ho do ro nasa sibuk.

4 Gumogo do angka alualu ni hajahaton asa ahu, sai Ho ma manesa angka pangalaosionnami.

5 Martua ma halak na pinillitMi, jala niloasMi dumonok, manginganhon angka alamanMi! Sai pasabam ma rohanami binahen ni hinadenggan ni bagasMu, joroM na badia i.

6 Tung na songkal do pangalusiM tu hami di bagasan hatigoran, ale Debata ni hatuaonnami, haposan ni saluhut ujung ni tano on dohot laut, angka na dao i.

7 Ho do sipaojak angka dolok marhitehite gogoM, marhohos hagogoon.

8 Ho do sipaso hasak di angka laut, hasak ni angka galumbangna i dohot ogaoga ni angka bangso.

9 Jadi mabiar ma angka partopi laut maradophon tanda angka na binahenMi, marolopolop ma dibahen Ho angka parmulaan ni habinsaran dohot hasundutan.

NDANG MULAK BOTI HATA NI DEBATA (RENUNGAN YESYA 55: 10-13)

 

RENUNGAN YESYA 55: 10-13,   NDANG MULAK BOTI HATA NI DEBATA

 

Horas ma di hita.Selamat Ari Minggu. Nuaeng nunga sahat hita tu minggu Estomihi na marlapatan: "Sai Ho ma na gabe partano batoanhu'" ( Psalmen 25: 6). Las ma rohanta marsomba tu Tuhanta, mamuji pasangaphon goar-Na, huhut tumangihon hata sihangoluhononta. Disoarahon hata ni Debata do tu hita sian Jesaya 55: 10-13: NDANG MULAK BOTI HATA NI DEBATA. Alani ingkon sai tajangkon jala taauhon do Hata ni Debata gabe hagogoon na pangoluhon hita.

1. Ndada holan hata-hata sambing hata ni Debata, alai di bagasan hataNa i do hagogoon dohot huaso ni Debata. Ala ni ndang tarsirang hata ni Debata sian hadirion-Na. Marhite hata-Na do Debata manompa langit dohot tanoon ro di nasa isina. Laos marhite hata-Na i do Debata marmudumudu, mangaramoti dohot mangondihon na tinompa-Na, asa gabe hapataran ni hadirion ni Debata na tinompaNa i. Marhite jadi-jadian-Na i boi tabereng huaso dohot hamuliaon ni Debata. Laos marhite hata-Na i do Debata paluaon hita jolma pardosa. Jesus Kristus na gabe Sipalua hajolmaon i ma hata ni Debata na gabe jolma.

2. Ala di bagasan hata-Na do huaso dohot hagogoon ni Debata, hata ni Debata na ruar sian pamangan-Na ndang mulak boti tu Debata. Ingkon manjadi do i hombar tu na sinangkapan ni Debata. Marhuaso do hata ni Debata pasauthon lomo ni roha-Na di ngolunta. Ala ni i do molo naeng saut sangkap dohot lomo ni roha ni Debata di ngolunta, ingkon sai hata ni Debata do mangingani rohanta. Molo so mian hata ni Debata di ngolunta, gabe lomo ni rohanta sambing ma na taulahon, pasauthon hagiothagiot ni rohanta, na mambahen hita madabu tu hamagoan. Ala ni i ingkon sai taparade ma rohanta gabe inganan ni hata ni Debata.

3. Dipatudos do hata ni Debata na ruar sian pamangan-Na tu udan dohot ambolas na madabu sian langit, ndang mulak boti tu langit ia so jolo dibornohi tano hadabuanna, gabe martubuan ma di tano i angka suansuan na marpaue, jala parbuena ma muse deba gabe boni tu angka panabur asa boi marudut panompaon ni Debata. Na deba nari gabe sipanganon ni jolma dohot angka na tinompa na asing.Jadi marhite dalan na songon i ma Debata marmudumudu dohot mangaramoti na tinompana. Nunga diatur parngoluon ni na tinompaNa i marhite ekosistem, na saling tergantung do na tinompa na sada tu na tinompa na sada nari..Ala ni.molo sega ekosistem i ala ni pangalaho ni hita jolma na so unduk tu hata ni Debata, gabe sega ( hona bencana) ma jadijadian ni Debata na mansusai ngolu ni hita jolma.

4. Dihatahon panurirang Jesaya hata on tu halak Israel na di habuangan Babel, asa pos roha nasida di hata ni Debata na manariashon haluaon nasida sian habuangan i. Ingkon saut do naung sinangkapan ni Debata tu nasida. Molo dihatahon Debata uhum ala ni hajahaton nasida ingkon saut do uhum i, songon na niae nasida di habuangan Babel i. Alai molo didok paluaon-Na ma nasida ingkon saut do malua. Ai boi do patupaon ni Debata sibahenon-Na di ruar ni pangantusion dohot kemampuan ni bangso i. Di bagasan tingki na jonok na ma paluaon ni Debata nasida, jala ndada holan malua boti, . alai ingkon pataruon ni Debata do nasida sahat tu tano nasida di bagasan las ni roha dohot hadameon marhite raja Kores na dipangke Debata paluahon.nasida sian habuangan Babel i. Sude jadijadian ni Debata dohot marlas ni roha jala marolopolop siala ni i. Jala molo porsea nasida, muba ma parngoluon nasida. Tarpasupasu ma parngoluon nasida, tubu ma angka suansuanan na denggan di tano nasida ganti ni angka suansuanan na so marguna na tubu disi ala naung leleng tarulang tano i.

5. Dipangido Tuhanta do nang hita tongtong porsea di hata ni Debata, manghangoluhon hata ni Debata, mangaloas hata ni Debata mangingani roha dohot pingkiranta, asa dipalua hita sian roha portibi na mangarajai ngolunta, jala tarbahen hita mangadopi dohot mangalo ragam ni angka elaela ni portibion na boi mangagohon hita. Tabahen ma hata ni Debata gogonta na mamboan hita tu parngoluon na lam tu dengganna.

__________________________ 

10 Ai songon hadadabu ni udan dohot ambolas sian langit, jala ndada mulak boti tusi, nda jolo dibornohi tano i jala dipagabe, asa martumburi, jala dilehon boni tu halak panabur dohot roti tu halak na manganhon.

11 Ingkon songon i do hatangki na ruar sian pamanganku: Ndang mulak boti tu ahu, ingkon bahenonna do lomo ni rohangku, jala manjadi tu na hutongos.

12 Ai ingkon di bagasan * las ni roha hamu borhat, jala di bagasan hadameon hamu pataruon; pangiaron ni angka * dolok dohot robean soarana marolopolop di jolomuna, jala nasa hau di ladang martopaptopap tangan.

13 Singkat ni tadatada tubu ma sampinur, jala singkat ni latong tubu ma bunga na hushus; i ma bahen barita di goar ni Jahowa, bahen tanda salelenglelengna, na so olo hambar.

 

 

 

 

TAJANGKON MA JESUS AI DI BAGASAN IBANA GABE DONGANTA MA DEBATA( IMMANUEL) (RENUNGAN YESAYA 7: 10-16)

 

TAJANGKON MA JESUS AI DI BAGASAN IBANA GABE DONGANTA MA DEBATA( IMMANUEL) (RENUNGAN YESAYA 7: 10-16)

 

Horas ma di hita. Selamat ari minggu Adven IV. On ma minggu Adven na parpudi di pangaradeonta laho manomunomu haroro ni Jesus tu tongatonganta. Ndang piga ari nari sahat ma hita tu ari na balga jala na badia situtu di hita, ima ari parningotan hatutubu ni Jesus manang na somal tadok ari Natal. Las ma rohanta laho marsomba tu Tuhanta sadarion mamuji pasangaphon goar-Na, huhut tumangihon hata-Na na gabe hangoluanta, asa tarbahen hita laho mangantusi lapatan ni hatutubu ni Jesus i di ngolunta dohot di tongatonga ni hajolmaon. Disosohon hata ni Debata do tu hita, asa "tajangkon ma Jesus i, ai di bagasan Ibana gabe donganta ma Debata (Immanuel)", songon na sinuriranghon ni Panurirang Jesaya di Jesaya 7: 10-16.

1. Hatutubu ni Jesus songon jolma, ndang sian sangkap ni jolma, jala ndang ulaon ni jolma non i, alai sian sangkap dohot ulaon ni Debata sambing do. I do umbahen na tubu Ibana sian sada na marbaju na so habubuhan.

2. Atik pe tubu Ibana songon jolma, di na mamestahon hatubu ni Jesus hita marhite pesta Natal i, ndang dos i dohot na mamestahon ari hatutu ni jolma ( ulang tahun). Ala ni nang pola sidohononta songon na somal tadok tu dongan jolma na marulang tahun, selamat ulang tahun tu Jesus, ai ndang na marulang tahun Jesus marhite pesta Natal i. Angkup ni i tu dongan jolma do sidohonon ucapan selamat ulang tahun, anggo tu Jesus ndang pola sidohonon ucapan selamat, ai siboan keselamatan do Ibana di hita jolma marhite hatutubuNa i.

3. Rade Debata saor di tongatonganta gabe donganta, ala ni holong ni roha ni Debata do di hita jolma na tinompaNa i asa unang mago ala ni dosa, songon na hinatindangkonna di Johannes 3: 16: " Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di Ibana".

4. Di haradeonNa gabe dongan ni hita jolma, rade do Jesus tubu di bagasan hapogoson, di bagasan haleaon, manaon godang haporsuhon, sahat tu rade muse maneahon hosa-Na laho manghophop hita jolma na hinaholongan-Na. Dipatuduhon Jesus do nang tiruan di hita jolma, ai molo olo Debata gabe dongan di hita jolma, asa hita pe angka na porsea di Ibana, ingkon olo do gabe dongan na tutu manang aleale tu ganup dongan jolma na manghaporluhon pangarupionta. Unang ma hita olo gabe dongan holan tu halak na taetong boi tongtong mangalehon paruntungan manang pangomoan tu dirinta sambing.

5. Dipagodanggodang do Jesus songon jolma na somal. Ditingki dakdanak Ibana, mantega dohot situak ni loba do sipanganonna, i ma sipanganon na margizi hatiha i tu dakdanak asa denggan magodang gabe jolma na cerdas jala marroha. Di Lukas 2: 40 didok: "Ia Dakdanak (Jesus) i, lam magodang do, lam margogo huhut marroha situtu, laos didongani asi ni roha ni Debata Ibana". Alai mambahen lam magodang jolma gabe umboto mambolonghon na jat jala mamillit na denggan, ndada holan sipanganon pardagingon sambing ala i dohot do ala ni sipanganon partontion ima hata ni Debata. Jala ido nang na tarida di diri ni Jesus, ai Hata ni Debata na gabe jolma do Ibana.

__________________________________

Yesaya 7: 10-16

10 Angkup ni didok Jahowa ma mandok si Ahas, songon on:

11 Pangido sada tanda di ho sian Jahowa Debatam, pangido sian banua toru, manang sian banua ginjang sahali.

12 Jadi ninna si Ahas ma: Ndang olo ahu mangido, asa unang huunjuni Jahowa.

13 Jadi ninna si Jesaya ma: Ua tangihon hamu ma, ale pinompar ni si Daud! Ndang dope sae hamu pauruuruhon jolma, dohot do Debatangku naeng lojaanmuna.

14 Dibahen i apala Tuhan i sandiri ma mangalehon sada * tanda di hamu: ** Ida ma, gabegabean ma sada namarbaju, jala tumubuhon sada anak, jala bahenonna ma goarna: * Immanuel.

15 Mantega dohot situak ni loba panganonna, paima diboto mambolongkon na jat, jala mamillit na denggan.

16 Ai * tagan so diboto dakdanak i dope mambolongkon na jat, jala mamillit na denggan, * tarulang ma tano i na nirajaan ni na dua raja hinabiaranmu i

 

MARTUA DO HALAK NA MARHAPOSAN TU JAHOWA (RENUNGAN YEREMIA 17: 5-10)

 

RENUNGAN YEREMIA 17: 5-10,  MARTUA DO HALAK NA MARHAPOSAN TU JAHOWA

 

Horas ma di hita. Selamat Ari Minggu. Sadarion nunga sahat hita tu minggu, Septuagesima, na marlapatan pitu pulu ari andorang so ari haheheon ni Tuhan Jesus. Mulai sian minggu Septuagesima on nunga diarahon hita paihutihut sitaonon ni Jesus laho paluahon hita jolma pardosa, na marhapatean tu hamonangan-Na di hahaheon-Na sian na mate. Las ma rohanta marsomba tu Tuhanta mamuji pasangap goar-Na huhut tumangihon hata-Na na gabe hangoluanta. Disoarahon hata ni Debata sian Jeremia 17: 5-10, : "Martua do na marhaposan tu Jahowa". Martua lapatanna, tarpasupasu, jala marhite pasupasu i sonang parngoluonna, dame panghilaanna, gabe gok las ni roha (berbahagia) ibana di ngoluna.

1. Suharsuhar ni i marhaposan tu Jahowa i ma na marhaposan tu jolma, na mangasahon bolon ni botohonna manang gogona. Halak na songon i ingkon marjea do ujungna. Marjea lapatanna hona bura manang terkutuk, gabe ndang adong hasonangan dohot hadameon di ngoluna. Tongtong gaor pingkiranna. Ai dipatudos do ibana tu halak na marbahudung di tano na mahiang, na so tagamaon marnida na denggan manang na uli, songon suansuanan na rahar di tano bangkalbangkal di halongonan na mansai gersang, manang di tano na ansim, na so niinganan ni halak. Ala ni sai hira na punjung do panghilaanna, ndang hea sonang rohana.

2. Boasa songon i halak na marhaposan tu jolma? Ala jolma na pinangasahonna naung digohi dosa, terbatas do gogogona, terbatas do holong ni rohana, ndang manongtong gogona. Boi sadarion mansai togos berengon alai marsogot nunga peak so margogo be. Ia so i boi do sadarion hira na dilean rohana tu hita, alai marsogot nunga marbalik gabe manghasogohon hita. Jadi ala ni i do ndang sipangasahonon jolma, ise pe halakna, na marhuaso, na marpangkat, na mora, na pistar, na sangap, ala jolma i naung nigomgoman ni dosa, tong do gok hagaleon, gok hahurangan dohot angkalangkal na sai mamingkirhon dirina sandiri. Alai ingkon sihaholonganta do sude dongan jolma songon dirinta sandiri.

3. Hapistaran dohot parbinotoan ni jolma pe ndang sipangasahonon. Boha pe timbo ni hapistaran dohot parbinotoan ni jolma adong do keterbatasan ni i. Tutu silehonlehon ni Debata do i di jolma na boi sipangkeon laho mangeahi hamajuon ni parngoluon dohot mangatasi persoalan ni ngolu. Alai ndang boi sipangasahonon i manang siasanghononhon, alai sipangkeon do di bagasan tanggung-jawab. Nunga tarida i di hamamasa ni pandemi covid 19 naung dua taon ne lelengna di sandok portibion dohot di bangsonta. Tarida ma marhite i keterbatasan ni parbinotoan ni jolma laho mangalo sahit. Alai boi do i gabe pendorong i di jolma patambahon parbinotoanna dohot hapistaran molo dipangke parbinotoan na adong mangasahahon Tuhan i.

4. Ala ni i do disoarahon hata ni Debata marhite panurirang Jeremia tu hita asa tongtong hita marhaposan tu Jahowa jala Jahowa haporusanta tabahen. Halak sisongon i do halak na martua, ai tudos ma ibana tu hau na sinuan di topi ni batang aek, manjarar uratna di topi ni batang aek i, ndang mabiar molo ro hamohopon, tongtong rata bulungna, ndang holsoan di taon haraharon, jala tongtong marparbue. Ido hatuaon ni halak na marhaposan tu Jahowa, sonang panghilalaanna, dame rohana, huhut tongtong aktif marusaha di ngoluna jala tongtong marparbuehon na denggan tu donganna jolma. Halak na mangasahon Tuhan i ima halak ns tarpasupasu jala na gabe pasupasu tu donganna na humaliang.

5. Diboto Debata do roha ni jolma parbagasan, ala i i ndang boi manang ise pe marpalemsem di adopan ni Debata, ndang boi sai songon na Debata dipangasahon, hape dirina, gogona, pingkiranna, parbinotoanna, sinadonganna do dipangasahon. Jahowa do sidodo roha, siuji piapia jala mangalehon tu ganup hombar tu dalanna, hombar tu parbue ni pambahenan. Ala ni ganup do mampartanggung jawabhon na niulana di adopan ni Debata.

___________________________________  

5 Songon on do hata ni Jahowa: Marjea ma baoa na marhaposan tu jolma, manang tu bolon ni botohonna, gabe dipasurut rohana sian Jahowa.

6 Songon halak * parbahudung di tano na mahiang do ibana, ndang tagamon idaonna ro na denggan i, jala maringan ibana di * tano bangkalbangkal di halongonan, di tano na ansim na so hinundulan ni halak.

7 Alai martua ma baoa na marhaposan tu Jahowa, jala Jahowa haporusanna dibahen.

8 Tudos do ibana tu hau na sinuan di topi ni batang aek, jala manjarar uratna di lambung batang aek, jala ndang mabiar ibana molo ro hamohopon, jala tongtong rata bulungna, jala ndang holsoan ibana di taon haraharon, jala ndang mansohot marparbue.

9 Tung na angkal situtu do roha ni jolma, jala na ganggu, tung ise ma na tuk mandodoisa?

10 Ahu Jahowa do * Sidodo roha, siuji piapia jala * mangalehon tu ganup jolma hombar tu dalanna, hombar tu parbue ni pambahenanna.