RENUNGAN MATIUS 14: 13-21: SILEHONLEHON NI DEBATA DO SIPANGANON DOHOT SIINUMON

 SILEHONLEHON NI DEBATA DO SIPANGANON DOHOT SIINUMON

Horas ma di hita. Selamat Ari Minggu IX dung Trinitatis (6 Agustus 2023). Las ma rohanta marsomba tu Debata sadarion, mamuji pasangaphon goarNa, huhut tumangihon hataNa sihangoluhononta. Disoarahon hata ni Debata sadarion na dienet sian Mateus 14: 13-21, na tuk do Debata manarihon angka na porsea di Ibana di sipanganon dohot siinumon, manang na gabe hangoluan siganup ari, ai Ibana do nampuna i.

1. Asi do roha ni Tuhan i di angka na ro mandapothon Ibana.

Umbege barita hamamate ni si Johannes Pandidi na diponggol si Herodes uluna holan laho palashon roha ni si Herodias jolma ni anggina si Philipus na dibuat si Herodes gabe jolmana, sumurut ma Jesus tu inganan na lungun marparau di tao Galilea i rap dohot angka siseanna. Ndang na mabiar Ibana mida si Herodes so tung dohot ibana maon dibunu, ala dirimpu si Herodes i do Jesus i si Johannes Pandidi na mulak mangolu muse. Alai ndang olo Jesus bunuon ni si Herodes ala diboto Ibana ndang sun do pe ulaonna di portibion. Ala ni do dipaholang Jesus jolo diriNa sian na torop i. Di tingki i baru mulak muse do pe angka siseanNa i sian ulaonnasida marbarita na uli hombar tu parsuruon ni Jesus tu na sampulu dua halak i. Ala ni i do diarahon Jesus angka siseaNa i sumurut tu inganan na lungun songon na pahosahon saotik.

Alai nang pe songon i diboto na torop i do manang tu dia lao Jesus. Ala ni i di dapothon natorop i do Jesus mardalan tur ( darat) mamolus angka huta. Di na ruar Jesus dohot angka siseanNa sian parau, nunga paimahon angka na torop i di nasida. Nang pe diuji Jesus dohot angka siseanNa sumurut paholanghon diri sian natorop i, ndang sumurut anggo asi ni roha ni Jesus mida nasida. Nunga dibereng Jesus pola diolohon natorop i loja mardalan sian darat holan laho mandapothon Jesus. Sian mulai ditanda nasida Jesus, godang do dihirim nasida sipatupaon ni Jesus di nasida. Asing na masihol mambege hata ni Jesus na boi pasonanghon roha nasida, torop do nang na mamboan angka na marsahit asa pamalumon ni Jesus. Diboto Jesus do sihol ni roha nasida i. Jadi asi do roha ni Jesus di angka na ro mandapothon Ibana. Di evangelium Markus didok do, di asi ni rohaNa i dibereng Jesus do nasida songon biru na na tardempar na so marparmahan.Alai ro ma nuaeng Jesus songon Parmahan di nasida. Ala ni i do di na ro nasida mandapothon Jesus, dipodai Jesus ma nasida laho patoguhon roha nasida na loja jala maheu i. I do deba sian ulaon ni Jesus di na ro tu portibion, mamodai jala mangajari hajolmaon asa di tanda Debata jala asa diboto mambahen angka na denggan. Angkup ni i, ala dibereng Jesus godang do na maboan na marsahit di pamalum Jesus ma angka na marsahit i. Sandok sian holong dohot asi ni rohaNa Jesus paluahon angka na ro mandapothon Ibana mangido asi ni rohaNa, asa malua sian angka haporsuhon dohot pardangolanna na di tano on.

2. Ndang diloas Tuhan i anturaparon na mangihuthon Ibana.

Mareak botari marpingkir ma angka sisean i songon dia ma parmangan ni halak na songon i toropna di halongonan i. Asi do nian roha ni angka sisean i marnida na torop i, alai sian dia ma dapot nasida sipanganon lehononna tu nasida. Ala ni ni didok angka sisean i ma tu Jesus: "pamuli ma natorop i, asa laho nasida tu angka huta manuhor sipanganon". On ma dalan na dumenggan na boi dipingkiri angka sisean i, asa unang anturaparon na torop i. Alai didok Jesus ma tu angka siseanNa i: "Ndang pola laho nasida, lehon hamu ma nasida mangan". Tontu sungkunsungkun do roha ni angka sisean i di hata ni Jesus i. Ndang manigor laho rohanasida na naeng adong patupaon ni Jesus tanda halongan hatiha i. Ndang laho do pe rohanasida na naeng tamuean ni Jesus natorop marhite na naeng mangalehon mangan, jala angka siseanNa i mangurupi songon parhobas. Ndang diboto nasida sian Tuhan i do haroroan ni sipanganon dohot siinumon, na boi paroonNa i hombar tu ringkotna di jolma na tinompaNa i. Ala na so diantusi angka sisean i do pe huaso ni Jesus songon Anak ni Debata Ibana di sipanganon dohot siinumon, gabe ro ma alus ni angka sisean i tu Jesus: Holan lima roti dohot dua dengke do hupeop hami dison. Disura roha diboan angka disean inon i songon bohal nasida di pardalanan nasida. Alai manang songon dia pe umbahen na rade si lima roti dohot dua dengke i, ndang apala i na ringkot botoonta. Alai na porlu botoonta songon dia huaso ni Jesus na tuk mambahen na lima roti dohot dua dengke i boi marsipanganon lobi lima ribu halak toropna. Umbege hata ni angka sisean i, manigor didok Jesus do tu nasida: Boan hamu ma i tu Ahu. Diargahon Jesus do si lima roti dohot dua dengke i,na boi pasupasuonNa marlompitlompit. Ai gari sian na so adong gabe adong tarbahen Jesus do patupahon. Lumobi hatiha i ndang jadi anturaparon angka na torop i ai ndang lomo roha ni Jesus anturaparon angka na mangihuthon Ibana. Alai ndang di sude pangalaho ingkon songon i patupaon ni Jesus. Ai ndang lomo roha ni Jesus angka na mangihuthon Ibana sala mangantusi huasoNa i. Songon na dibaritahon di evangelium Johannes, mamereng tanda halonganan na pinatupa ni Jesus mangalehon mangan lima ribu halak marhite lima roti dohot dua dengke naeng pajongjongon ni natorop i do Jesus gabe raja dohot panghirimon molo Jesus raja ndang anturaparon be nasida nang pe so loja mulaulaon. Alai ndang lomo roha ni Jesus i, ai molo taihuthon pe Jesus ndang na gabe so mulaulaon hita, ai marhite ulaonta i do hita dapotan pasupasu ni Tuhan i di sipanganon dohot siinumon, asa unang anturaparon hita.

3. Huaso ni Debata lobi sian na so tapingkiri. Halongangan do na binahen ni Jesus boi mangalehon mangan lobi lima ribu halak marhite lima roti dohot dua dengke. Ndang siat i tu pingkiran ni jolma. Alai huaso ni Debata do i. Tontu angka na sai mangasahon huaso ni Debata di ngoluna, boi do hilalaaonna na godang na nialamanna di ngoluna na so boi niantusanna. I do haporseaon. Porsea hita na tuk do Debata patupahon lobi sian na tapingkiri. Dung dipabotohon angka sisean i na adong do ditiop nasida lima roti dohot dua dengke, didok Jesus ma tu nasida: boan hamu ma i tu ahu. Dijalo Jesus ma i sian angka siseanNa i. Dungi disuru ma angka na torop i hundul dohot denggan di duhutduhut i.

Di evangelium Markus didok do, hundul nasida marpanggungpanggung ( markelompok), adong marsasaratus, adong marlimalimapulu, hombar tu partipak ni inganan i. Alai tujuan na disi asa maratur do nasida, gabe ummura bagihononna sipanganon na naeng sibagihononna tu nasida. Unang adong annon na masisosahan ala ni masisoroan. Dung denggan nasida saluhutna hundul, ditiop Jesus ma roti na lima i dohot dengke na dua i.

Manaili ma Jesus dompak ginjang laho mamasumasu. Di na manaili Jesus dompak ginjang na mandok mauliate do Ibana tu Amai, huhut mangidohon asa dipasupasu Ama i sipanganon i. Marhite na mandok mauliate i do sipanganon i diparbadia i jala dipasupasu Ama i. Nunga hasomalan di halak Jahudi, ganup laho marsipanganon sai jolo dipasahat do mauliate tu Debata, ala dihaporseai nasida silehonlehon ni Debata do sipanganon i di nasida, laos marhite i mangidohon asa dipasupasu Debata sipanganon i. Mangihuthon haporseaon nasida, ganup laho marsipanganon, molo so jolo didok mauliate, hira na manangko do nasida di sipanganon i sian Debata. Hasomalan on do na tiniru ni halak Kristen umbahen hita halak Kristen ingkon jolo martangiang andorang so marsipanganon. Dung didok Jesus mauliate, jala dipasahat sipanganon i tu Ama i asa dipasupasu, disi do dipapatar Debata huasoNa, na Ibana do nampuna sipanganon dohot siinumon. Ndang hasudaan nasida be sipanganon i, dibagibagi ma tu nasida, ris saluhutna dapotan, pola dung sidung nasida na marsipanganon, adong do pe lobina dipapungu nasida godangna sampulu dua ampang. Ndang diambolonghon na lobi i songon sampah. Alai disuru Jesus do i asa dipapungu, ai adong do na boi do pe manghaporluhon i. Di Jahannes 6: 12 didok Jesus do: " Papungu hamu ma angka ebaeba i asa unang magopo". Diajarhon i do tu hita, asa taargahon silehonlehon ni Debata tu hita. Unang adong saotik pe na magopo tabahen. Sude na nilehon ni Debata tu hita ingkon pelehononta do i muse tu Debata. Ndang deba pelehononta, alai ingkon sude do. Jadi na tapangke pe di ngolunta bahen haporluanta siganup ari, ingkon jolo pasahatonta do i tu Debata marhite tangiang, asa jolo dipasupasu Debata, baru pe asa tapargunahon. Unang adong silehonlehon ni Debata na magopo tabahen, manang tapangke holan pasauthon hagiot ni rohanta sandiri. ..

_________________

Mateus 14: 13-21

13 Alai umbege i, borhat ma Jesus sian i marparau tu luat na lungun, punjung sasadasa. Jadi umbege i natorop, mardalan tur ma nasida sian angka huta i mandapothon Ibana.

14 Dung ro Jesus sian i, diida ma halak mansai torop, jadi asi ma rohana mida nasida, dipamalum ma angka na marsahit na di nasida.

15 Alai mareak bot ari didapothon siseannnNa ma Ibana, angka ninna ma: Halongonan do dison jala na bot ne ma ari; pamuli ma natorop i, asa laho nasida tu angka huta manuhor sipanganon!

16 Alai didok Jesus ma tu nasida: Ndang pola laho nasida, lehon hamu ma nasida mangan!

17 Dung i ro ma hatanasida: Holan lima roti dohot dua dengke sambing do hupeop hami dison.

18 Alai ninna ma: Boan hamu ma i tu Ahu!

19 Dung i didokkon ma natorop i hundul di duhutduhut, ditiop ma roti na lima dohot dengke na dua i, manaili ma Ibana tu ginjang laho mamasumasu, dibagi ma roti i, diparlehon ma tu angka siseanna, asa nasida mangalehon tu natorop i.

20 Jadi mangan ma saluhutna jadi bosur be ma; dung i dipapungu ma angka ebaeba na lobi i, gok sampuludua ampang.

21 Alai anggo torop ni baoa na mangan i arga limaribu do, so padohot angka parompuan dohot dakdanak.

Semua tanggapan:

7Sinta Uli Panjaitan, Hotma dan 5 lainnya

2

Suka

Komentari

Bagikan

RENUNGAN 2 MUSA 19 :1 - 8 : MARSIHOHOT MANGULAHON HATA NI DEBATA

 MARSIHOHOT MANGULAHON HATA NI DEBATA

Horas ma di hita. Selamat Ari Minggu II dung Trinitatis ( 18 Juni 2023). Las ma rohanta marsomba tu Tuhanta, mamuji pasangaphon goarNa, huhut tumangihon hataNa sihangoluhononta. Disoarahon hata ni Debata na dienet sian 2 Musa 19: 1-8 do sadarion, asa marsihohot hita mangulahon hata ni Debata hombar tu naung tapadanhon dung gabe siihuthon Jesus Kristus hita di pardalanan ni ngolunta di portibion manuju tu surgo hasonangan naung pinarbaga ni Debata lehononNa tu hita angka hinophop ni Jesus Kristus. Di turpuk on, tu bangso Israel do jolo hata i dipasahat Debata, dung dirahut Debata padan-Na tu bangso i di dolok Sinai. Padan ni Debata tu bangso i, ima pabangkitonhon halak Israel gabe bangso ni Debata, alai ingkon marpadan ma bangso i na ingkon tongtong mangokuhon Debata Jahowa gabe Debata nasida, jala marsihohot mangulahon hata ni Debata.

1. Padan ni Debata ni Debata do mangarahut pardomuan ni Debata tu bangso-Na.

Dung sahat halak Israel tu halongangan Sinai, patolu bulanhon dung ruar halak Israel sian Misir, dipabangkit Debata ma halak Israel gabe bangsona. Laho patupahon i diihot Debata ma Jahowa ma padan tu bangso i. Padan i dibahen Debata tu halak Israel dung jolo dipatandahon Debata Jahowa hadirion-Na tu bangso i, mulai sian na mamillit ompunasida si Abraham, si Isak dohot si Jakob, naung manjou nasida maringanan di tano na nijanjihon ni Debata di Tano Kanan, asa disi nasida dung dipasupasu Debata gabe pasupasu tu angka bangso. Disi nunga dipapatar Debata Jahowa diri-Na songon Debata nampuna huaso di saluhut bangso dohot portibion jala Debata parholong ni roha, tu ompu nasida i. Marserak ma pinompar ni si Jakob tu Tano Misir, mansai torop ma nasida disi. Alai gabe diparhatoban halak Misir do halak Israel i. Siala haporsuhon naniae ni halak Israel siala parhatobanan i, mangangguhi ma nasida tu Debata Jahowa naung papatarhon diri-Na tu ompunasida. Dungi ditangihon Jahowa ma anggukangguk nasida i. Dipabangkit Debata ma si Musa manguluhon nasida asa malua sian parhatobanan i. Dipatuduhon Debata ma huaso-Na na andul gumogo sian huaso ni portibion laho paluahon nasida. Peristiwa na balga situtu do haluaon ni bangso sian parhatobanan Misir na dirayahon nasida muse di Ari Raya Paskah nasida. Marudut ma muse tusi dipapatar Debata huaso-Na tu bangso manaripari Laut Rara, jala mangaripashon parangan ni halak Misir na mangalele halak Israel di laut i. Diboan Debata ma nasida mamolus parhorsihan na so adong dapot disi sipanganon dohot siinumon. Alai dalan ni Debata do i manogunogu nasida asa lam tangkas mananda huaso ni Debata Jahowa, ai di parhorsihan disarihon Debata do nasida sungkup di sipanganon dohot siinumon. Jadi nunga tingkina di roha ni Debata pabangkiton ni Debata ma nasida gabe bangso-Na marhite padan. Laho patupahon padan i disuru ma bangso i marsaro di halongonan Sinai, jala dijou Debata ma si Musa nangkok tu dolok Sinai. Si Musa ma parhitean ni Debata pasahathon hata-Na tu halak Israel Dipasahat ma tu si Musa laho mangarahon halak Israel mamereng jala mangauhon sude naung binahen ni Debata tu nasida. Dunghon i patupaon ni Debata ma padan-Na tu bangso i, marhite sada upacara na khidmat, i ma: parjolo, Debata papatarhon hamuliaon-Na songon Debata ni halak Israel. Paduahon Debata pasahathon hata-Na marrumang patik siulahonon ni bangso i. Patoluhon, Debata pahehehon roha ni halak Israel asa sian nasa roha manjalo hajongjongan nasida huhut mangulahon kewajiban dohot tanggung-jawab nasida songon bangso ni Debata.

2. Hajongjongan ni halak Israel songon bangso ni Debata. Di padan na binahen ni Debata, dibangkit Debata do halak Israel gabe:

- hasian ni Debata sian nasa bangso.

- harajaon malimmalim.

- bangso na badia

Aha do lapatanna molo dipabangkit Debata nasida gabe hasianNa sian nasa bangso. Hasian lapatanna na hinaholongan. Sude do bangso dihaholongi Debata, alai lumobi ma holong ni roha-Na i dipatuduhon tu bangso Israel, ala dipabangkit Debata nasida gabe bangso-Na. Alai ndada sihaginjanghonon ni bangso i non i songon keistimewaan nasida, alai sihamauliatehononna do, jala sipertanggung-jawabhonona. Ai ndada ala na sumurung manang humebat nasida sian angka bangso na asing, umbahen na dipabangkit nasida gabe hasianNa.Alai marhite i naeng pangkeon ni Debata nasida laho pasauthon sangkap hatuaon ni Debata tu sandok bangso. Ala ni molo dipabangkit Debata nasida gabe hasian-Na, ndada nanaeng bahenon ni Debata nasida gabe bangso na dimanjakan, na boi marlomolomo di adopan ni Debata. Alai tanggung-jawab na balga do i ai naeng pangkeon ni Debata nasida gabe ulaulaNa laho mangulahon sangkap hatuaon (rencana keselamatan) ni Debata tu sandok bangso.

- harajaon malimmalim. Dipabangkit Debata bangso i gabe harajaon malimmalim do, harajaon na manogunogu hajolmaon mananda harajaon ni Debata, harajaon na mamabahen Debata gabe Raja sisombaon jala sioloan. I do sasintongna hajongjongan ni bangso i, ndada harajaon portibi na mangasahon huaso haportibion secara politis. Mardalan do i manang sadia leleng di tongatonga ni halak Israel. Debata langsung na gabe Rajanasida marhitehite angka Panguhum.Alai madabu do nasida muse tu harajaon politis, ai dituntut nasida ingkon adong raja nasida songon angka bangso na asing. Saut ma adong raja nasida mulai sian si Saul, David dohot Salomo. Di tingki ni raja Daud dahot Salomo, mangerbang do harajaon i. Alai songon harajaon portibi masa ma disi parsiguluton ni huaso gabe raja. Ujungna ndang murni be harajaon i mangasahon holan Debata, nunga mangasahon huaso portibi on. Mabola dua ma harajaon Israel i dung salpu si Salomo. Sada harajaon utara na mamamgke goar Israel ( 10 marga), sada harajaon selatan mamangke goar Jehuda ( 2 marga). Dung mardalan harajaon Utara hirahira dua abad lelengna, taon 722 sM hancur do harajaon i hona uhum ni Debata ala ndang marsihohot nasida tu hata ni Debata. Harajaon selatan martahan do pe sahat tu taon 596 sM, dung i gabe tarbuang ma nasida muse tu harajaon Babel, ala tong madabu tu pangalaho ni harajaon portibi. Sian mulai i ndang adong be harajaon Israel na mardaulat, angka bangso na asing na ma mangomgomi nasida songon bangso terjajah.

-Bangso na badia do nasida, ala dipapulik Debata nasida sian angka bangso na di portibion, asa boi patar marhite nasida habadiaon ni Debata, marhite na mamarangehon parange habadiaon. Alai ndang dituruti bangso i non i, ai gabe diramuni nasida do dirina marhite haramunon ni portibion naung nirajaan ni dosa.

3.Ingkon marsihohot do di hata ni Debata asa dapot haluaon. Dilaosi bangso i do padan naung niundukhon nasida tu Debata. Adong do syarat dipasahat Debata na ingkon siradotan ni bangso i, asa mardalan songon na nipadanhon ni Debata. Syarat i ima: ingkon tongtong ditangihon nasida soara ni Debata, jala diradoti nasida hata dohot patik ni Debata naung pinasahat ni Debata tu nasida marhite si Musa. Hape di na pinasahat ni Musa hata dohot tona ni Debata i tu nasida, sahata do nasida mandok: saluhut na pinaboa ni Debata bahenonnami ma. Jadi ndang otomatis naung nipadanhon ni Debata marlaku dohot sandirina. Ingkon tongtong do nasida marsihohot mangulahon na nidok ni Debata, i ma hataNa dohot patikNa songon haparan ni lomo ni roha ni Debata. Saleleng di pardalanan nasida diparhorsihan sai dirataratai si Musa do i tu bangso i padan ni Debata tu nasida dohot padan nasida tu Debata. Molo dilaosi nasida naung niundukhon nasida ulahononna, hona uhum (torutoru) ni Debata do nasida di sude parngoluonnasida. Isarana di buku 5 Musa 28: 15, didok: "Alai tung sura so ditangihon ho soara ni Jahowa, Debatam, asa mangaringkoti mangulahon angka uhumna dohot aturanna, angka na hutonahon i tu ho sadarion, songgop ma tu ho sude

angka torutoru on jala mangonai tu ho."

Tangkas do on masa tu parngoluon ni bangso i. Jotjot do hona uhum ni Debata nasida songon naung tinaringotan di ginjang.

4. Angka na porsea di Jesus na ma Israel na imbaru. Ala gagal do halak Israel mangulahon songon na nipadanhonna tu Debata, tarlumobi na tinulak nasida Jesus Mesias na sinuru ni Debata laho paluahon nasida dohot angka bangso na di portibion sian gomgoman ni dosa, di bagasan diri ni Jesus dipaimbaru Debata ma padanNa i. Nda mangonai holan tu halak Israel be padan na imbaru i, alai nunga mangonai tu sandok bangso angka na porsea di Jesus Kristus. Molo padan na leleng i dipatupa Debata di dolok Sinai di pardalanan nasida dung ruar sian parhatobanan Misir mandapothon tano bagabaga ni Debata, i ma Tano Kanan, padan na imbaru on dipatupa marhite hamamate ni Jesus di silang i di dolok Golgata. Marhite haporseaon tu Jesus, dipalua ma hita sian parhatobanan ni dosa, gabe di pabangkit gabe bangsoNa, i ma Israel na imbaru. Aha na pinadanhon Debata lehononNa tu halak Israel, i ma gabe bangso na hinaholongan ni Debata, gabe harajaon malimmalim jala bangso na na badia di pasahat ma i tu halak Kristen dohot huria i songon na na nidok ni apostel Petrus di Surat 1 Petrus 2: 9, "Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i". Aha na nidok ni apostel Petrus i, dos do i hajongjongan na na pinasahat ni Debata tu halak Israel songon tarida di turpukta on ( ay.6). Alai ndang na otomatis i sahat tu hita, ingkon na tongtong do hita marsihohot mangulahon hata ni Debata dohot mangaradoti aha naung tapadanhon tu Debata di na tardidi hita dohot di na tahatindanghon haporseaonta tu Debata Sitolusada.

______________

2 Musa 19:1-8

1 Patolubulanhon dung ruar halak Israel sian tano Misir, di ari na sasada i sahat ma nasida tu halongonan Sinai.

2 Ai borhat do nasida sian Rapidim, gabe sahat nasida tu halongonan Sinai, laos marsaro nasida di halongonan i; disi do marsaro Israel tondong ni dolok i.

3 Dung i nangkok ma si Musa tumopot Debata. Jadi dijouhon Jahowa ma tu ibana sian dolok i, ninna ma: Songon on ma dohononmu tu pinompar ni si Jakkob, paboaonmu tu halak Israel.

4 Nunga diida hamu, na hubahen i tu halak Misir, na huboan i hamu hira di atas ni habong ni pidong raja wali pasahat hamu tu Ahu.

5 On pe molo ditangihon hamu soarangKu, jala diradoti hamu padan na Hubahen i, jadi hasianKu ma hamu sian nasa bangso, ai gok di Ahu do liat portibi on.

6 Manjadi harajaon malimmalim ma hamu di Ahu, jala bangso na badia. I ma angka hata sidohononmu tu halak Israel.

7 Jadi ro ma si Musa, dijou ma angka sintua ni bangso i, jala diaturhon tu jolonasida sude angka hata ondeng, angka na tinonahon ni Jahowa tu ibana.

8 Jadi sahata ma sandok bangso i mangalusi, angka didok nasida ma: Saluhut na pinaboa ni Jahowa, bahenonnami ma. Jadi mulak ma si Musa mamboan angka hata ni bangso i tu Jahowa.

Semua tanggapan:

30Jones Simamora, Sinta Uli Panjaitan dan 28 lainnya

7

Suka

Komentari

Bagikan