RENUNGAN PSALMEN (MAZMUR) 25: 1-10, JAHOWA PABOTOHON ANGKA DALANNA (TUHAN MENUNJUKKAN JALAN KEPADAKU )

 JAHOWA PABOTOHON ANGKA DALANNA (TUHAN MENUNJUKKAN JALAN KEPADAKU )

Psalmen 25: 1-10

Horas ma di hita sude. Selamat Ari Minggu Invocavit (18 Feruari 2024). Invocavit lapatanna: "Jouonna ma Ahu jadi alusanHu ma ibana", na marojahan sian Psalmen 91: 15 a. Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian Psalmen 25: 1-10, na dipabotohon Jahowa do angka dalan-Na tu angka na porsea di Ibana. Adong do manang piga na disosohon marhite turpuk i sihangoluhononta.

1. Jou ma Debata di sude na masa di ngolum.

Manjou Debata dos i dohot na martangiang tu Debata, ai marhite tangiang i do hita manjou Debata di ngolunta. Boi do nang manjou Debata marhite na marende hita, mangendehon ende pujipujian tu Debata. Turpuk on sada ende do, alai na gabe tangiang, dohot panindangion haporseaon, sian naposo ni Debata, i ma si David. Di tangiangna i di pasahat ibana sandok ngoluna tu Debata. Didok ibana, Ho do ale Jahowa dihalungunhon rohangku. Lapatanna mangasahon Debata Jahowa do ibana di sandok ngoluna. Songon raja na pinabangkit ni Debata, adong do di ibana huaso dohot hagogoon. Alai ndang dipangasahon ibana i laho pasauthon hagiot dohot sangkap ni rohana. Tongtong do ibana sadar, ingkon sai mangasahon Jahowa do ibana mamangke huasona laho pasauthon sangkap ni Debata, lumobi manogunogu bangso na pinalumehon ni Debata tu ibana. Songon i do nang di pangido sian hita, ingkon sai malungun manang masihol do rohanta di Debata. Di sihol ni rohanta i do hita tongtong manjou Ibana, asa tapasahat sandok ngolunta tu Ibana. Diturpuk Epistel sadarion (Markus 10: 46-52), malua do sahalak na mapitung na margoar si Bartimeus, gabe marnida ibana dibahen Jesus, ala dipapos rohana manjoujouhon: "O, Jesus, Anak ni si Daud, asi ma roham di ahu". Lan do na maminsang ibana nian na joujou i, ala dirajumi i mangganggu ulaon dohot pardalanan ni Jesus. Alai nionjar ni haporseaonna tu Jesus sai digogo ibana do manjouhon asa asi roha ni Jesus marnida ibana. Dialusi Jesus do pangidoanna i, dipamalum ma ibana gabe marnida. Dungi dohot ma ibana mangihuthon Jesus.

2. Marhaposan tu Debata Jahowa ma ho sian nasa roham. Songon si David na sai tongtong marhaposan tu Debata, songon i do nang hita ingkon sai marhaposan tu Debata di sandok ngolunta.

Halak na marhaposan tu Debata Jahowa tongtong do pos rohana na so pasombuon ni Debata ibana manang aha pe na masa tu ngoluna. Pos do tongtong rohana na so paila on ni Debata ibana maradophon angka musuna. Ndang loason ni Debata marsuraksurak angka musuna maradophon angka na porsea i. Molo tarsosak pe angka na porsea i, sai na patuduhonon ni Debata do dalan tu nasida asa boi malua sian hasosahan i. Sandok halak na marhaposan tu Jahowa tongtong do pos rohana pasahathon sandok ngoluna tu Debata. Ala ni ndang ganggu rohana mandalani ariari ni ngolu on, nang taringot tu ngoluna di pudian ni ari, atik pe jotjot do na masa tu ngoluna ndang sai hombar tu na hinirim ni rohana. Sasintongna, di tangiang ni angka na marhaposan tu Jahowa, jala na pasahathon sandok ngoluna tu Debata, nang pe so sai digoari sude angka na ringkot di ngoluna silehonon ni Tuhan i, sai na lehonon ni Tuhan i do hombar tu lomo ni roha ni Tuhan i. Tumangkas do Debata mamereng aha na ringkot di ngolunta sian hita sandiri.. Jala halak na marhaposan tu Tuhan i sai na patuduhonon ni Tuhan i do tu ibana dalan sidalananna. Tongtong do pos do rohana sai hot do denggan basa dohot asi ni roha ni Tuhan i. Jala ala marningot asi ni roha dohot denggan ni basa-Na, ndang sai dipaingotingot Debata be angka dosa na taula di tingki na salpu, lumobi dosa di tingki haposoonta. Hasesaan ni dosanta, lumobi nunga dipasingkop di bagasan Jesus Kristus, di na rade Ibana gabe pelean hasesaan ni dosanta. Jadi nang pe sipata hita madabu jala hira na so marhasil tahilala di ngolu on, ndang mura be hita mandele, ala taboto do Tuhan i tongtong manogu hita tu dalan-Na na tigor, na mamboan hita tu parngoluon na dumenggan dohot haluaon sian dosanta. Angka na marhaposan tu Jahowa, ndang hea ganggu rohana joujou tu Debata marhite tangiang, ai pos do rohana sai alusan ni Debata do ibana. Ala ni sai tapasahat ma tu Debata, aha na pasorahothon rohanta di ngolu on, aha na mansusai rohanra, jala aha na taparungkilhon, asa dipargogoi Tuhan i hita laho mangatasi saluhut parsoalan ni ngolunta, songon parpsalmen i na pasahathon aha na pinarungkilhonna tu Debata.

3. Mardalan ma ho di dalan ni Jahowa.

Tanda ni na marhaposan hita tu Debata ingkon sai mardalan di hita di dalan ni Debata. Di tangiangna i, dipangidohon parpsalmen i do, asa dipabotohon Debata Jahowa tu ibana angka dalan ni Jahowa, jala diajarhon tu ibana angka bogas-Na. Porsea do parpsalmen i, molo mardalan ibana di dalan ni Jahowa, sai na togihonon ni Debata do ibana tu hatuaon manang haluaon na sintong. Ala ni i do umbahen dipangido parpsalmen i asa diajari ibana boi marsihohot mardalan di dalan ni Jahowa. Dalan ni Tuhan i songon na diajarhon tu bangso-Na marhite si Musa, i ma mangulahon hatigoran dohot uhum ( 1 Musa 18: 19). Jadi dalan ni Jahowa i ma songon naung niaturhon-Na dipatik dohot uhum na pinasahat-Na tu bangso i. Sudena i marojahan di asi ni roha dohot dengggan basa ni Debata. Jala i do tong na hinatindanghon ni parpsalmen i di turpuk on, songon na tarida di ayat 10 na mandok: "Asi ni roha dohot hasintongan do sude dalan ni Jahowa di angka na mangaradoti padanNa dohot angka panindangionNa". Asi ni roha-Na nunga tangkas dipatuduhon tu bangso-Na, na paluahon bangso i sian parhatobanan, jala manogunogu nasida marparange songon bangso ni Debata, na mangihuthon patik dohot uhum na pinasahat-Na tu bangso i marhite padan, rodi angka singotsingot molo manimbil nasida sian dalan ni Debata. Marhite padan-Na dipatuduhon do na hot do asi ni roha ni Debata di bangso i, alai ingkon marpadan do nang bangso i manghangoluhon uhum hasintongan ni Debata. Memang disadari parpsalmen i do ndada na mura mardalan di dalan ni Debata, ala ni i do dipangido ibana sian Debata asa ditogutogu Debata ibana tongtong mardalan di hasintongan ni Debata. Lapatanna ingkon mangasahon huaso dohot hahogoon ni Debata do nang hita mardalan ni dalan ni Debata. Mardalan di dalan ni Debata ndang holan sekedar mamboto dalan ni Debata alai dohot do manghangoluhonsa. Ala ni molo taboto asi ni roha do dalan ni Debata dohot hasintongan, ingkon dohot do hita manghangoluhon asi ni roha dohot hasintongan i. Asi ni roha dohot hasintongan i nunga dipapatar di bagasan diri ni Jesus Kristus. Jesus Kristus do dalan i na mamboan hita tu haluaon sian gogoman ni dosa dohot huaso ni sibolis i tu hangoluan na saleleng ni lelengna songon na nidok ni Jesus di Johannes 14: 6: " Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu". Jadi mardalan di dalan ni Jahowa, marlapatan mangihuthon Jesus dohot sude pangajarion-Na. Jesus Kristus do hapataran ni asi ni roha dohot hasintongan ni Debata. Mangihuthon Jesus lapatanna rade manaon songon panaonon ni Jesus, na mamelehon diri-Na laho manaluhon huaso ni sibolis i. Rade nang marparrohaon songon parrohaon ni Jesus Kristus, na rade mansoadahon dirina di bagasan haserepon. (Fil. 2: 5 d.u).

_______________________________

Evangelium: Psalmen 25:1-10

1 Ende sian si Daud. Ho do, ale Jahowa, dihalungunhon rohangku.

2 Ale Debatangku, marhaposan tu Ho do ahu, unang tung paila ahu, asa unang marsuraksurak angka musungku mida ahu.

3 Ndang tahe tagamon tarurak sude angka na mangkaposi Ho, sai maila do sogot angka pangose soada alana.

4 Ale Jahowa, sai pabotohon ma tu ahu angka dalanMu, jala ajarhon tu ahu angka bogasMu.

5 Sai togutogu ma ahu tubagasan hasintonganMu, jala ajari ahu, ai Ho do Debata ni hatuaonhu, Ho do na huhaposi ganup ari.

6 Sai ingot ma, ale Jahowa, angka denggan ni basaM dohot asi ni rohaM, ai sian na robi do angka i.

7 Sai unang paingotingot angka dosa ni haposoonhu dohot pangalaosinghu, sai ingot ma ahu, ale Jahowa, hombar tu asi ni rohaM, ala ni denggan ni basaM.

8 Pardenggan basa jala na bonar do Jahowa, ala ni dipodahon do dalan na tigor i tu angka pardosa.

9 Diparnonohon do uhum tu angka na dangol jala diajarhon dalanNa tu angka na tarjepol.

10 Asi ni roha dohot hasintongan do sude dalan ni Jahowa di angka na mangaradoti padanna dohot angka panindangionna.

Epistel: Markus 10:46-52

46 Dung i dibongoti nasida ma huta Jeriko. Jadi di na ruar Ibana sian Jeriko raphon siseanna dohot halak natorop, adong ma hundul disi di pinggol ni dalan i sahalak sipanehenehe na mapitung, si Bartimeus, anak ni si Timeus.

47 Jadi dung dibege ibana, Jesus na sian Nasaret do i hape, dipungka ma manjoujouhon: O Jesus, Anak ni si Daud, asi ma roham mida ahu!

48 Lan do maminsang ibana, asa sip nian; alai lam digogo do manjouhon: Ale Anak ni si Daud, asi ma roham di ahu!

49 Jadi sulon ma Jesus, didok ma: Jou hamu ma ibana! Gabe dijou ma na mapitung i, didok ma mandok ibana: Pos ma roham! Hehe ma ho! Dijou do ho!

50 Jadi hatop ma ibana hehe, laho mandapothon Jesus; laos tading do anggo ulosna.

51 Dipanghulingi Jesus ma ibana: Aha dipangido roham sibahenonhu tu ho? Jala didok na mapitung i ma tu ibana: Gurunami, naeng marnida ma nian matangku!

52 Dung i didok Jesus ma tu ibana: Laho ma ho! Dipangolu haporseaonmi do ho. Jala mamintor marnida ma matana, laos diihuthon ma Jesus di sidalananna i.

Semua tanggapan:

5Drs Banuasi Simamora, Rosa Rosita dan 3 lainnya

2

Suka

Komentari

Bagikan

Lihat komentar lain

Sinta Uli Panjaitan

Amen

• 33 menit
• Suka
• Balas

Tulis komentar...

Aktif

RENUNGAN MARKUS 9: 2-9, JESUS DO ANAK NI DEBATA, TANGIHON HAMU MA IBANA ( JESUS ANAK ALLAH DENGARKANLAH DIA)

 JESUS DO ANAK NI DEBATA, TANGIHON HAMU MA IBANA ( JESUS ANAK ALLAH DENGARKANLAH DIA)

Markus 9: 2-9.

Horas ma di hita. Selamat Ari Minggu Estomihi ( 11 Februari 2024). Estomihi lapatanna, sai Ho ma gabe partanobatoan di ahu. Tanobato lapatanna, batu na togu, na boi gabe parondingondingan maradophon musu. Marojahan do i di Psalmen 31: 3b, i ma sada tangiang tu Debata Jahowa, asa Ibana gabe partanobatoan di hita, na mangondingi hita maradophon musunta, i ma sibolis i, na sai rongom laho mangaliluhon haporseaonta tu Tuhan i. Manang beha pe gogo ni dibolis i, sai na talu do i molo nunga Debata, marhite hata-Na na gabe partanobatoan manang pangondinganta. Ala ni las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evangelium Markus 9: 2-9, na mandok: Jesus do Anak ni Debata, tangihon hamu Ibana.

1. Nang pe ro Jesus i di bagasan haleaon, alai sasintongna na sangap situtu do Ibana, ai Anak ni Debata do Ibana. Ndang adong tudosan ni hasangapon ni Jesus di portibion. Di na ro sungkunsungkun ni Jesus tu angka sisean-Na, ise do Ibana mangihuthon angka sisean i, alus ni si Petrus mandok, Kristus i do Ho. Kristus na ro sian hata Gorik "Christos", dos do lapatan ni i dohot Mesias di hata Heber, na marlapatan na miniahan ni Debata. Jadi mangihuthon si Petrus, Jesus do Mesias i, naung sinuriranghon ni angka panurirang di Padan na Robi, gabe Raja dohot Sipalua hajolnaon. Alus ni si Petrus on nunga gabe sada panindangion na tubu nian sian haporseaonna tu Jesus.

Alai nang pe nunga dihatindanghon ibana Jesus i Mesias, ndang tarjalo ibana hata ni Jesus na mandok na ingkon marsitaonon do Jesus i jala mate tarbunu. Hata ni Jesus i, ndang hombar tu gombaran na adong di pingkiranna taringot tu Mesias. Anggo di pingkiranna, ia Mesias i, i ma songon sada raja na marhuaso, na marhasangapon situtu

jala na marmulia, ndada na marsitaonon, apalagi sahat tu na mate tarbunu. Alai aha naung ditotophon Debata, i do na ingkon saut. Panulahon ni si Petrus i ndang boi i paubahon missi naung niampehon Debata tu Jesus. Alai sian asi ni roha ni Debata, dilehon do pe kesempatan tu angka sisean i laho mananda Jesus i ndada holan marhite sian gombaran na adong di pingkiran nasida taringot tu Mesias, alai ingkon dohot do sian pamerengan ni Debata. Di na disolsoli si Petrus Jesus ala didok Jesus, ingkon marsitaonon do Ibana sahat tu na mate tarbunu, didok Jesus do tu ibana: "Laho ma ne ho, bolis, sian lambunghon; ai ndang na diparrohahon ho na di Debata, angka na di jolma do" (8: 33). Ala ni onom ari dunghon panindangion ni si Petrus i, ditogihon Jesus do tolu halak sisean-Na i, i ma si Petrus, si Jakobus dohot si Johannes tu sada dolok na timbo. Ndang dipaboa tu dolok na timbo dia na nidokna diarahon Jesus nasida. Adong do mandok i dolok Tabor, alai adong do mandok dolok Hermon, ala i do dolok na tumimbo di tano Israel, na jonok muse tu huta Kaesarea Filipi, na disi si Petrus manghatindanghon, Jesus do Mesias i. Alai manang dia pe dolok i, na ringkot berengonta sai diusahahon Jesus do manogunogu sisean i tu panandaon na sasintongna di Jesus . Ndang diloas angka sisean i lilu di panandaon na lipe, alai tu pandaon na sasintongna do.

Ndang sahali sude angka sisean i ditogihon, alai holan tolu halak do. Nasida na tolu ma didok roha ni Jesus na boi songon perwakilan ni angka siseanna i, laho manaksihon aha na masa tu Jesus di dolok i. Di tingki i dibereng angka sisean na tolu i ma muba rupa ni Jesus. Disi ma dipatuduhon tu hita marrsangap Jesus, ala masa hamubaon ni rupa (transfigurasi) ni Jesus, songon na sangap situtu, na so adong tudosna di portibi on, ai marsinondang bohi-Na jala marsillam pahean-Na disi. Mangangkupi Ibana tarida do si Musa dohot si Elia. Tangkas do na dua halak on, songon halak na pinarsangapan di tongatonga ni halak Jahudi. Musa i ma perwakilan ni padan na robi na mamboan patik ni Debata, na so tarulahon bangso i sian diri nasida sandiri. Alai saluhutna i digohi di bagasan diri ni Jesus marhite na rade Ibana manaon sahat ro di hamamate-Na. Elia i ma panurirang na umbalga di halak Israel na pajongjonghon saluhutna sangkap ni Debata( ay.12). Jadi haroro ni si Musa dohot si Elia, patuduhon naung donok sitaonon ni Jesus, jala lam tangkas ma hasaaut ni sangkap ni Debata tu jolma.

2. Tangihon hamu ma Ibana.

Di tingki hamubaon ni rupa ni Jesus i ma tarbege ma soara ni Debata sian ginjang na patangkashon hadirion ni Jesus i songon Anak ni Debata. Didok:

"On do Anak haholonganku, tangihon hamu ma Ibana!" Soara on mangulahi pandohan naung hea tarbege di tingki pandidion na pinatupa ni si Johannes Pandidi tu Jesus di Sunge Jordan (1: 11). Hata ni Debata na di atas dolok i, patuduhon hasangapon ni Jesus lumobi sian hasangapon ni si Musa dohot si Elia. Songon Anak ni Debata, huaso ni Jesus i mangalobi i angka panurirang dohot angka partogi ni halak Israel. Soara na tarbege sian ginjang i laos, mamarentahon angka sisean i asa tumangihon Jesus, ala sahat tu hatiha i ndang apala tangkas do pe panangihonon ni angka sisean i di Jesus. Bereng ma rupani na disolsoli si Petrus Jesus di na hinatahon ni Jesus tu angka sisean i mandok: "Ia anak ni jolma i ingkon godang do sitaononna, ingkon bolongkonon ni angka sintua dohot malim dohot sibotosurat do ibana, laos pusaonna do; dung i mulak mangolu do di ari patoluhon". (8: 32). Sian hata ni Jesus i holan hata sitaonon dohot hamamate ni Jesus i do na diparrohahon nasida, alai anggo hata mulak mangolu di ari patoluhon i ndang diparrohahon nasida. Ndang singkop hata ni Jesus i ditangihon, gabe manigor alo ma tu roha nasida. Ala ni i, laos patangkashon do hata ni Debata na bienge nasida didolok i do i, paboa nang pe ditulak angka halak Jahudi Jesus, jala diparsilanghon angka tentera ni halak Rom i Ibana, tongtong do lomo roha ni Debata di Jesus, ai dipangolu do Ibana di ari patoluhon. Laos di patangkas do tu angka sisean i, na hombar do hamesiason ni Jesus tu naung sinuriranghon ni angka panurirang di Padan Na Robi. Jadi ala ni nunga ingkon ndang ganggu be roha ni angka sisean i di hadirion ni Jesus songon Mesias dohot songon Anak ni Debata. Jadi soara sian ginjang na mandok tu angka sisean i: tangihon hamu ma Ibana marlapatan do i: porsea ma hamu di Ibana. Ndada holan si Petrus na marhagiot asa hombar tu hagiotna pambahenan ni Debata di ngoluna, alai dohot do nang hita di tingkinta sisaonari. Jotjot do hita naeng masaksahon hagiotta sipatupaon ni Debata tu hita. Ala ni parenta ni Debata asa manangihon Jesus dohot do i mangona i tu hita. Molo manangihon hata ni Tuhan i ingkon seutuhna do hata ni Debata i sitangihononta. Ndada holan na hombar tu rohanta, manang na mambahen las rohanta di ngolu portibion. Sipata do hata ni Debata maminsang manang paingothon hita di parngoluonta na manimbil sian dalan ni Debata. Ndada hita naeng mangatur Tuhan i, alai hita do na ingkon tumangihon Ibana jala mangihuthon na nidok-Na. Ndada holan pangidoanta manang hoihointa didok rohanta ringkot tangihonon ni Tuhan i, alai hita pe ingkon rade tongtong manangihon hata ni Tuhan i sihangoluhononta.

____________________________

Evangelium: Markus 9:2-9

2 Dung i salpu onom ari diarahon Jesus ma si Petrus, Jakobus dohot Johannes, ditogihon ma nasida nangkok tu sada dolok na timbo, tu na suhi, holan nasida; gabe muba ma rupaNa diida nasida.

3 Gabe marsillam ma angka ulosNa, bontar sahali; na so dapot botoon ni panunsi di tano on mambahen bontar songon i.

4 Dung i diida nasida ma si Elia rap dohot si Musa; na mangkatai do nasida dohot Jesus.

5 Jadi didok si Petrus na mangkuling i Jesus: Guru, dengganna i dison! Hupauli hami ma dison soposopo tolu: Sada di Ho, sada di si Musa, sada di si Elia!

6 Ai ndang diboto na nidokna i, ai tung hatahutan situtu do nasida.

7 Jala ro ma ombun sada mangalinggomi nasida, laos mangkuling ma soara sian bagasan ombun i, didok ma: On do Anak haholonganHu, tangihon hamu ma Ibana!

8 Alai di na manaili nasida, ndang agia ise be diida; sasada Jesus do angkupnasida.

9 Jadi laho tuat sian dolok i, dipopai ma nasida, unang dipajojor na niidanasida i tu halak, ia so jolo hehe Anak ni jolma i sian na mate.

Epistel: Psalmen 50:1-6

1 Ende sian si Asap. Mangkuling do Debata Jahowa, jala martingting tu tano on sian habinsaran tolhas ro di hasundutan.

2 Sian Sion, situan ni hinadenggan marsinondang Debata.

3 Sai na ro Debatanta, jala ndang tagamon hohom Ibana, di joloNa do api mandilatdilat, jala ronggur na gogo situtu humaliang Ibana.

4 Dipio do angka langit sian ginjang, ro di tano on, asa diuhum bangsoNa.

5 Papungu hamu ma tu Ahu angka na daulat marroha angka na marpadan dohot Ahu marhitehite pelean.

6 Jadi dibaritahon angka langit ma hatigoranNa, ai apala Debata do panguhum. Sela!

Semua tanggapan:

7Sawanna Panjaitan, Bu Napit dan 5 lainnya

RENUNGAN YESAYA 40: 21-31, DEBATA SALELENGLELENGNA DO JAHOWA

 DEBATA SALELENGLELENGNA DO JAHOWA

(TUHAN ADALAH ALLAH YANG KEKAL) : Jesaya 40: 21-31

Horas ma di hita. Selamat Ari Minggu Sexagesima ( 4 Februari 2024). Sexagesima marlapatan, onom pulu ari andorang so ari haheheon ni Tuhan Jesus. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Jesaya 40: 21-31,

asa tongtong hita marhaposan tu Debata Jahowa, ai Debata salelenglelengna do Ibana.

1. Jahowa do na manggomgomi langit dohot tanoon. Ibana do na marhuaso di nasa na adong. Dipaingot Debata bangso-Na na di habuangan Babel marhite panurirang Jesaya taringot tu hadirion ni Debata Jahowa, i ma Debata na pabangkithon bangso i gabe bangso-Na. Disungguli Debata nasida marhite sungkunsungkun, aha naung binoto, naung binege, naung binereng, jala naung diajarhon tu nasida mulai sian dakdanak dope taringot tu Debata Jahowa dohot naung binahen ni Jahowa tu nasida. Nunga leleng sai diajarhon tu nasida, paboa Jahowa do nampuna langit dohot tanoon ro di nasa isina, ai Ibana do na manompa i sudena. Marhabangsa Ibana di atas liat portibion. Sude pangisi ni portibion dipatudos do tu sihapor sambing, na so adong huasona, jala na mura salpu. Molo tung pe adong huaso ni angka panggomgomi ni portibion, di bagasan satongkin hira sisoada sambing do i. Ai didok do: "Ibana pasahathon angka panggomgom gabe soada, angka panguhum di tano on gabe marlea dibahen". Jadi manang songon dia pe hebat ni jolma na di portibi on, tung so dia do i martimbanghon huaso ni Debata. Boi do huaso ni jolma i gabe sisoada manang ndang marlapatan manang aha pe. Hata on dipasahat Debata tu bangso-Na na di habuangan i asa unang gabe sumurut haporseaon nasida tu Debata Jahowa. Ndang torus nasida pasombuon ni Debata di habuangan i, asal ma tongtong nasida marhaposan tu Debata. Manang songon dia pe huaso ni harajaon Babel naung manggomgomi nasida hatiha i, di sada tingki marujung do i bahenon ni Debata, dungi boi ma nasida malua sian habuangan i. Laos sunggulsunggul do on tu sude na porsea di Debata, asa unang mura ganggu rohana molo pe sipata mamolus parungkilon dohot hasusaan di portibi on. Boi do diloas Debata hita mamolus ragam ni sitaonon laho patorashon haporseaonta, jala asa lam tangkas mamereng huaso dohot habalgaon ni Debata di ngolunta. Ai di bagasan sude na masa di ngolunta tongtong rade Tuhanta i mangurupi hita asalma tongtong tapasahat sandok ngolunta tu Ibana.

2. Ndang tarpatudos Jahowa manang tu aha pe na adong di tanoon. Jahowa do Tuhan ni nasa na adong.

Molo adong na marsomba tu angka ganaganaan manang tu suman ni dia pe na adong di tanoon na pinauli ni jolma, i ma patuduhon naung sega hadirion ni jolma ala ni dosa i. Ndang ditanda be Debata sisombaon na sasintongna. Gabe dipauli ma na boi didok rohana suman ni Debata, sisombaonna. Alai angka na mambahen sumansuman ni Debata gabe sisombaonna, na mangaleai hadirion ni Debata do i. Angka i do na nidokna na marsomba tu berhala manang tu angka ganaganaan. Dipados jadijadian ni Debata dohot Debata i sandiri. Jala adong do halak na padoshon dirina dohot Debata, i ma angka na marhaposan tu gogo, hapistaran manang sinadonganna. Molo halak madabu tu ginjang ni roha, na padoshon dirina do i tu Debata.

Halak na mongkus tu arta, jala na manjalahi arta i sian dalan dia pe na so ture, gabe marhaposan tu arta i ngoluna, i ma na padoshon artana i dohot Debata. Aha pe na tapatimbo jala tahaholngi, na tahabiari jala tahirim dos dohot Debata, i ma angka jadijadian ni jolma, na dibahen dos dohot Debata, on ma pangaleaion na umbalga tu Debata, Tuhan ni nasa na adong.

3. Na marhaposan tu Jahowa maruli hagogoon mardapotdapot. Dipapos panurirang Jesaya do roha ni bangso i, songon i nang hita pe di tingkinta on, na Debata Jahowa do nampuna huaso di nasa na adong dohot mual ni nasa hagogoon tu jolma na tinompa-Na i. Siala huaso dohot hagogoon na adong di Ibana, ndang olo loja jala ndang olo mandate Debata. Ala ni i Jahowa do mampargogoi angka halak na marhaposan tu Ibana. Molo pe jotjot didok bangso i: "Buni do dalanhu maradophon Jahowa, jala ndang maruli uhum ahu sian Debatanghu," i ma pataridahon na so marhaposan be bangso i tu Debata Jahowa, alai nunga sai marhaposan tu diri dohot tu gogona sandiri, gabe jotjot ma nasida maheu jala mandate siala angka persoalan na niadopanna. Maheu jala mandate do nasida di habuangan na di huta Babel. Maheu jala mandate do hita di ngolunta on, ala ni ragam ni angka parsoalan na taadopi. Ala ni do disososohon panurirang Jesaya asa sai tongtong hita marhaposan tu Jahowa. Sian hagogoon na adong di Ibana, Debata pasuanghon gogo ni angka na loja jala na gale, ro di sude angka na di bagasan sitaonon dohot hasusasaan. Debata do nang mangalehon hatauon tu angka na marhaposan tu Ibana laho mangatasi angka parsoalan na niadopan nasida be, gabe boi songon pidong rajawali ( didok di turpukta on lali), na habang martongatonga langit. Marhite hagogoon i ma gabe boi hita angka na marhaposan tu Ibana marlojong so pola loja jala torus mardalani so pola mandate, ala nunga dapotan pangurupion sian Debata.Ala ni i rade do Debata mangurupi hita ganup ari, mangalehon angka na tahaporluhon siganup ari, molo dibagasan habengeton do hita tongtong mangasahon Ibana, pasahathon ngolunta tu Ibana marhite tangiang.

Haradeon ni Debata mangurupi angka na maheu, angka na loja jala sorat i ma na dipatuduhon Jesus di na ro Ibana tu portibi on, songon na dibaritahon di turpuk epistel sadarion.

_____________________________

Evangelum: Jesaya 40: 21-31

21 Tung so mamoto hamu? Tung so dibege hamu ma i? Tung so pinaboaan tu hamu sian mulamula? Tung so ditimbangi hamu ma angka ojahan ni tano on?

22 Marhabangsa Ibana di atas ni liat portibi on, jala doshon sihapor angka pangisina i. Ibana pahembang angka langit songon dagangan na halus, dipahire nasida songon abit undungundung bahen inganan.

23 Ibana pasahathon angka panggomgom gabe soada, angka panguhum di tano on gabe marlea dibahen.

24 Ipe nasida disuan, ipe nasida disaburhon, ipe marurat pangkalnasida di tano i, asal mangombus Ibana dompak nasida, nunga malos, gabe dihabangkon habahaba i nasida songon rapanrapan.

25 Tung tu ise ma patudosonmu Ahu, paboa suman Ahu tusi ninna Nabadia i.

26 Manaili ma matamuna dompak ginjang, jala ida hamu, tung ise ma na manompa angka i? Tung ise ma paruar parangannasida marbilangan? Ibana tahe manjou luhutna i di goarna be, marguru tu hinagodang ni gogoNa, jala Ibana do na sun hinagogo, ndang tagamon lilis nanggo sada.

27 Boasa ma dohononmu ale Jakkob, jala didok ho ale Israel: "Buni do dalanhu maradophon Jahowa, jala ndang maruli uhum ahu sian Debatanghu."

28 Atehe, ndang diboto ho, manang ndang dung dibege ho? Debata salelenglelengna do Jahowa, sitompa angka ujung ni tano on, ndang olo loja manang mandate Ibana, jala ndang hadodoan pingkiranNa i.

29 Ibana balik mangalehon gogo tu na loja, jala dipargogoi situtu angka na so margellok.

30 Loja pe angka dolidoli jala mandate, jala tarsulandit angka na mardaging na tambos.

31 Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek. Marlojongi nasida ndang olo loja, mardalani nasida ndang olo mandate.

________________________

Epistel: Markus 1:29-39

29 Dung ruar sian parguruan i, manigor dibongoti nasida ma jabu ni si Simon dohot si Andreas raphon si Jakobus dohot si Johannes.

30 Alai na peak do simatua boru ni si Simon i panepaneon, jadi manigor ditaringothon ma i tu Ibana.

31 Jadi didapothon ma ibana, dijama ma tanganna pahehehon; dung i ditadingkon panepane i ma ibana, jadi dihobasi ma di nasida.

32 Alai dung bot, dung sundut mata ni ari, masiboan na marsahitna be ma halak tu joloNa, ro di na sinonggopan ni angka sibolis.

33 Gabe sude nasida na sahuta i marpungu di jolo ruma i.

34 Jadi torop do angka na hansitan na marragamragam sahitna dipamalum jala torop sibolis dipabali; alai ndang diloas angka sibolis i paboahon, naung ditanda nasida Ibana.

35 Dung i manogotna i, borngin situtu dope, hehe ma Ibana tu balian, laho martangiang tu na lungun.

36 Jadi diihuthon si Simon dohot angka donganna ma Ibana tusi.

37Jadi dung jumpangsa, didok nasida ma mandok Ibana: Sude halak mangalului Ho!

38 Alai didok Ibana ma tu nasida: Beta ma hita tu na asing, tu angka lumban na humaliang an, asa dohot disi Ahu marjamita. Ai ala ni i do umbahen na ro Ahu!

39 Laos laho ma Ibana marjamita tu parguruannasida na di liat Galilea jala dipabali angka sibolis.

Semua tanggapan:

6Patar S Napitupulu, Pinantun Simatupang II dan 4 lainnya