RENUNGAN YEREMIA 31: 7-9, JAHOWA DO PARTOGI JALA MUAL NI OLOPOLOP ( TUHAN PEMIMPIN DAN SUMBER PENGHIBURAN) (Jeremia 31: 7-9) Horas ma di hita. Selamat Ari Minggu dung Natal ( 31 Desember 2023). On ma ari minggu parpudi na laos ari parpudi di hita di bagasan taon 2023 on. Marsogot nunga masuk hita tu taon na imbaru 2024. Bodari nunga tapatupa partangiangan ujung taon, na manghamauliatehon pangaramotion dohot panogunoguon ni Tuhanta di hita saleleng taon 2023. Laos disi ma tauji mangarujiruji sude pangulaon dohot pardalanan ni ngolunta. Tontu molo sude taadophon i tu adopan ni Tuhan i, marhite angka hata dohot pangajarion-Na naung tajalo, boi do berengonta mansai godang angka pambahenanta na so hombar tu lomo ni roha ni Tuhan i. Boi do ala ni i nunga aturan ingkon uhumon ni Debata hita ala ni sude angka pambahenanta na so mangihuthon poda dohot pangajarion ni Tuhanta. Nunga ingkon uhumon ni Debata hita,manang ndang aturan loason-Na be hita mangolu sahat tu tingkion. Alai ala parasi roha do Debata, sai marlambas ni roha do Ibana, maradophon hita naung hinophop ni mudar ni Jesus Kristus, gabe diloas do pe hita mangolu sahat ro di tingkion. Alai sai dihirim Debata do asa sai tatanda dirinta dohot hahuranganta, ro hita manopoti dosanta i tu adopan-Na. Dungi tapauba ma rohanta dohot pangalahonta asa sai hombar tu lomo ni roha ni Tuhan i, jala lam tapatogu rohanta laho mangoloi Ibana tu tingki na ro. Ala ni i di minggu ujung taon on, las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Jeremia 31: 7-9, asa tongtong taihuthon panogunoguon ni Debata di ngolunta, ai Ibana do Partogi jala mual ni olopolop na manghamonanghon hita di ragam ni perjuangan ni ngolunta. 1. Unduk ma hita tu panogunoguon ni Debata di ngolunta. Halak Israel do gombaran ni parngoluon ni hita jolma di portibi on. Songon holong ni roha ni Debata na paluahon nasida sian parhatobanan ni halak Misir, songon i do Debata paluahon hita sian parhatobanan ni dosa. Dung dipalua bangsoi, marpadan do Debata pabangkithon bangso i gabe bangso na hinaholongan ni roha-Na, alai ingkon marpadan do bangso i na holan Debata Jahowa do Debata sisombaon jala sioloan nasida. Angkup ni i ingkon marparange nasida songon bangso ni Debata mangihuthon patik dohot uhum na pinasahat ni Debata tu nasida. Molo dihuthon nasida patik dohot uhum ni Debata, pasupasuon ni Debata ma nasida di sude parngoluon nasida. Alai molo dilaosi nasida do padan nasida tu Debata, ingkon hona torutoru ni Debata do nasida (5 Musa 28: 15 d.u.). Dipardalanan ni sejarah parngoluon nasida, jotjot do bangso i mangalaosi padannna tu Debata. Disomba nasida do angka Debata sileban, jala ndang marparange nasida songon bangso ni Debata. Diula do angka hajahaton songon na niula ni angka bangso parbegu i. Gabe ala ni i jotjot do hona uhum ni Debata nasida, sahat ro di na marujung harajaon i ala ditaban jala digomgomi harajaon na asing. Sai disuru Debata do angka panurirang parhitean ni Debata laho paingothon nasida asa muba rohana nian, manadinghon angka pangulaon nasida na roa i. Alai ndang ditangihon nasida angka panurirang i. Gariada dipabangkit angka raja do panurirang na manghatahon hata na hombar tu hagiot nasida. Alai angka panurirang pargapgap do nasida. Ndang olo panuirang pargapgap i mamissang pangalaho ni angka raja songon i dohot pangalaho ni bangso i. Alai anggo panurirang na sintong, songon panurirang Jeremia, koras do maminssang pangalaho ni bangso i, nang pe ala ni gabe hasosogo do ibana di bangso i, pola sai diusahahon naeng mamunu ibana. Nunga dilumbahon Debata asa unduk bangso i tu panogunoguon ni Debata. Tiruanna di tingki panurirang Jeremia, nunga ro harajaon Babel mamorangi nasida. Didok panurirang Jeremia do asa unang pola mangalo nasida tu halak Babel i, dalan ni Debata do i laho papatarhon huaso-Na. Alai ndang ditangihon bangso i soarana. Mangalo do nasida, jala ro muse hata ni panurirang pargapgap (Hanania), asa mangalo nasida, ai ndang mungkin pasombuon ni Debata bangso-Na taluhonon ni bangso parbegu. Alai ujungna dipatunduk harajaon Babel do harajaon Juda i, jala diboan ma angka na pistar ro di angka pangituai ni bangso i tarbuang tu Babel. Alai di situasi na songon i ro do panurirang paposhon roha nasida, asa dijalo nasida na masa i songon panogunogu on ni Debata di nasida. Ai molo tung pe diloas Debata nasida tarbuang, paluaon ni Debata do muse nasida sian habuangan i dung salpu pitupulu taon. (Jer. 29: 10). Ala ni diarahon panurirang i do bangso i, asa tongtong unduk tu panogunoguon ni Debata, jala tongtong dijouhon nasida, asa dipalua Debata nasida songon pasipasi ni bangso i, na so sadia be bilanganna dung marujung harajaon Israel Utara ala ni uhum ni Debata tu nasida. Laos joujou ni na sinoarahon ni panurirang Jeremia on do tongtong jouhononta di ngolunta naung pinarhatoban ni dosa i, asa dipalua Debata hita sian ragam ni angka parngoluon na porsuk hinorhon ni dosa i. 2. Ditogihon Debata do bangso-Na tu parngoluon na lam tu dengganna. Ditogutogo Debata do bangso-Na gabe bangso na marpanghirimon. Nang pe jotjot ingkon mamolus godang angka hamaolon, tantangan sian angka na humaliang, ro di ragam ni angka hasusaan, sahat ro di na ingkon madabu tu tangan ni angka musu, alai tongtong do ditogutogu Debata nasida marpanghirimon. Di naung marserak angka pinompar ni si Jakob, i ma bangso na pinabangkit ni Debata gabe bangso-Na, dilehon Debata do tu nasida panghirimon na ingkon paluaon ni Debata do nasida jala papunguon ni Debata tu inganan na pinarade ni Debata. Ditogihon sian sude inganan parsearahanna i, adong sian tungkan utara dohot sian ujung ni tano on, ndang mardia imbar manang songon dia rumang ni parngoluonna, na mapitung, na pangpang, na gabegabeagabean manang na tubutubuan, dipapungu tu sada inganan na gabe sada luhutan bolon. Apulapul do on tu bangso naung marserak i asa tongtong nasida di bagasan panghirimon. Nang pe naung marserak nasida tu luat ni angka sipele begu, alai togihonon ni Debata do nasida mulak tu inganan na pinarade ni Debata di nasida. I ma pataridahon na hot do holong ni roha ni Debata di bangso-Na i atik pe jotjot nasida manimbil sian dalan ni Debata.Alai sada panurirangon do on sian si Jeremia, martudutudu tu haluaon na umbalga na pinatupa ni Debata marhite Jesus Kristus tu sandok hajolmaon naung marserak di sandok tano on . Sudena i dipatupa Debata marhite Jesus Kristus na ro tu portibi on. Nunga dipapungu Debata sandok angka na porsea di Jesus gabe sada luhutan bolon di bagasan huria i sian ragam ni horong ni masyarakat dohot status sosial. Nunga dipabangkit Debata angka na porsea i, gabe anak buhabaju na niasian jala hinaholongan-Na. Mangasahon i do hita di bagasan pos ni roha mangalangka tu jolo, i ma tu taon na ro naung jonok di jolonta. 3. Taloas ma tongtong Debata na gabe Partogi di hita. Godang do angka partogi di tongatonga ni hajolmaon di portibion. Adong do partogi ni pemerintahan manang negara, adong partogi di ngolu parugamoon isara ni partogi di huria i, adong partogi di angka organisasi masyarakat, adong partogi di organisasi politik. Sudena angka partogi i ingkon mandalanhon ulaonna hombar tu angka hatontuan naung diaturhon di badan manang organisasi na niuluhonna. Nang pe sude angka partogi dihirim angka halak na niuluhonna do boi gabe pangondian di nasida, boi be gabe mual ni angka olopolop dohot las ni roha di na niuluhonna, alai ndang sude angka partogi ni portibi on mamboan songon na hinirim ni na niuluhonna i. Torop do angka partogi holan mamingkirhon dirina be, mangalului huaso, hasangapon dohot paruntungan portibi on. Ndang songon i anggo Debata na gabe Partogi di sandok pardalanan ni ngolunta. Sandok marojahan di holong ni roha na polin di hita jolma na tinompaNa i do Ibana manogunogu manang manogihon hita na hinaholongan ni roha-Na tu ngolu na lam tu dengganna, Songon na nidokna marhite hata panurirangon ni si Jeremia: "Ahu ma manogihon nasida tu angka batang aek di dalan na hornop, ndang tagamon tarsulandit nasida disi". Hata on tongtong na gabe pos ni roha di hita laho mangalangka tu taon na imbaru naung jonok di jolonta. Ra tahilala do i di pardalanan ni ngolunta di taon na salpu. Debata do na manogihon hita di batang aek na gabe mual ni hangoluanta, mardalan di tano na hornop, na mambahen hita ndang tarsulandit. Tutu boi do sai adong angka siparungkilhononta, boi do alani masalah ekonomi, boi ala ni sahit, dohot angka na asing. Ala i di bagasan sude na dokdok na taalami, tongtong do tahilala tangan ni Tuhan i mampargogoi hita jala manogunogu hita malua sian angka na pasorathon rohanta. Ala ni i hata ni Tuhanta sadarion, paposhon rohanta asa taloas tongtong Debata na gabe Partogi di nglolunta. Ibana do mual ni apulapul di hita uju masa arsak ni roha. Ibana do na mangondihon hita maradophon angka musunta. Ibana do manarihon ngolunta na so jadi hurangan. Ibana do na margogoihon hita uju masa angka siparungkilhononta. __________________________ Evangelium: Jeremia 31:7-9 7 Ai songon on do hata ni Jahowa: Marhinsa ni roha ma hamu marsuraksurak mida si Jakkob, jala marolopolop ma hamu mida ihutan ni angka bangso parbegu! Pangiar hamu ma soaramuna mamujimuji jala dok hamu ma: Sai palua ma ale Jahowa bangsoM, pasipasi ni Israel! 8 Ida ma, ingkon ahu manogihon nasida sian tano na tungkan utara jala ahu papunguhon nasida sian angka ujung ni tano on rap dohot angka na mapitung dohot na pangpang, na gabegabean dohot pangintubu di tongatonganasida. Tung luhutan na bolon do nasida angka na mulak i. 9 Ro do nasida tutu huhut tumatangis dohot marhuraja. Ahu ma manogihon nasida tu angka batang aek di dalan na hornop, ndang tagamon tarsulandit nasida disi; ai Ahu do gabe ama di Israel jala Epraim gabe anak buhabajungKu. Epistel: Epesus 1:3-6 3 Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, di bagasan Kristus. 4 Ai dipillit do hita di bagasan Ibana, andorang so ojak dope tano on, asa badia hita jala so hasurahan di adopanNa i, di bagasan holong ni roha. 5 Ditodo hian do hita bahen anakNa, marhitehite Jesus Kristus, asa tu Ibana, mangihuthon halomoan ni rohaNa, 6 asa tarpuji asi ni rohaNa na marmulia i, na niasihonNa tu hita di bagasan na hinaholonganNa i.

JAHOWA DO PARTOGI JALA MUAL NI OLOPOLOP ( TUHAN PEMIMPIN DAN SUMBER PENGHIBURAN)

(Jeremia 31: 7-9)

Horas ma di hita. Selamat Ari Minggu dung Natal ( 31 Desember 2023). On ma ari minggu parpudi na laos ari parpudi di hita di bagasan taon 2023 on. Marsogot nunga masuk hita tu taon na imbaru 2024. Bodari nunga tapatupa partangiangan ujung taon, na manghamauliatehon pangaramotion dohot panogunoguon ni Tuhanta di hita saleleng taon 2023. Laos disi ma tauji mangarujiruji sude pangulaon dohot pardalanan ni ngolunta. Tontu molo sude taadophon i tu adopan ni Tuhan i, marhite angka hata dohot pangajarion-Na naung tajalo, boi do berengonta mansai godang angka pambahenanta na so hombar tu lomo ni roha ni Tuhan i. Boi do ala ni i nunga aturan ingkon uhumon ni Debata hita ala ni sude angka pambahenanta na so mangihuthon poda dohot pangajarion ni Tuhanta. Nunga ingkon uhumon ni Debata hita,manang ndang aturan loason-Na be hita mangolu sahat tu tingkion. Alai ala parasi roha do Debata, sai marlambas ni roha do Ibana, maradophon hita naung hinophop ni mudar ni Jesus Kristus, gabe diloas do pe hita mangolu sahat ro di tingkion. Alai sai dihirim Debata do asa sai tatanda dirinta dohot hahuranganta, ro hita manopoti dosanta i tu adopan-Na. Dungi tapauba ma rohanta dohot pangalahonta asa sai hombar tu lomo ni roha ni Tuhan i, jala lam tapatogu rohanta laho mangoloi Ibana tu tingki na ro. Ala ni i di minggu ujung taon on, las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Jeremia 31: 7-9, asa tongtong taihuthon panogunoguon ni Debata di ngolunta, ai Ibana do Partogi jala mual ni olopolop na manghamonanghon hita di ragam ni perjuangan ni ngolunta.

1. Unduk ma hita tu panogunoguon ni Debata di ngolunta. Halak Israel do gombaran ni parngoluon ni hita jolma di portibi on. Songon holong ni roha ni Debata na paluahon nasida sian parhatobanan ni halak Misir, songon i do Debata paluahon hita sian parhatobanan ni dosa. Dung dipalua bangsoi, marpadan do Debata pabangkithon bangso i gabe bangso na hinaholongan ni roha-Na, alai ingkon marpadan do bangso i na holan Debata Jahowa do Debata sisombaon jala sioloan nasida. Angkup ni i ingkon marparange nasida songon bangso ni Debata mangihuthon patik dohot uhum na pinasahat ni Debata tu nasida. Molo dihuthon nasida patik dohot uhum ni Debata, pasupasuon ni Debata ma nasida di sude parngoluon nasida. Alai molo dilaosi nasida do padan nasida tu Debata, ingkon hona torutoru ni Debata do nasida (5 Musa 28: 15 d.u.). Dipardalanan ni sejarah parngoluon nasida, jotjot do bangso i mangalaosi padannna tu Debata. Disomba nasida do angka Debata sileban, jala ndang marparange nasida songon bangso ni Debata. Diula do angka hajahaton songon na niula ni angka bangso parbegu i. Gabe ala ni i jotjot do hona uhum ni Debata nasida, sahat ro di na marujung harajaon i ala ditaban jala digomgomi harajaon na asing. Sai disuru Debata do angka panurirang parhitean ni Debata laho paingothon nasida asa muba rohana nian, manadinghon angka pangulaon nasida na roa i. Alai ndang ditangihon nasida angka panurirang i. Gariada dipabangkit angka raja do panurirang na manghatahon hata na hombar tu hagiot nasida. Alai angka panurirang pargapgap do nasida. Ndang olo panuirang pargapgap i mamissang pangalaho ni angka raja songon i dohot pangalaho ni bangso i. Alai anggo panurirang na sintong, songon panurirang Jeremia, koras do maminssang pangalaho ni bangso i, nang pe ala ni gabe hasosogo do ibana di bangso i, pola sai diusahahon naeng mamunu ibana. Nunga dilumbahon Debata asa unduk bangso i tu panogunoguon ni Debata. Tiruanna di tingki panurirang Jeremia, nunga ro harajaon Babel mamorangi nasida. Didok panurirang Jeremia do asa unang pola mangalo nasida tu halak Babel i, dalan ni Debata do i laho papatarhon huaso-Na. Alai ndang ditangihon bangso i soarana. Mangalo do nasida, jala ro muse hata ni panurirang pargapgap (Hanania), asa mangalo nasida, ai ndang mungkin pasombuon ni Debata bangso-Na taluhonon ni bangso parbegu. Alai ujungna dipatunduk harajaon Babel do harajaon Juda i, jala diboan ma angka na pistar ro di angka pangituai ni bangso i tarbuang tu Babel. Alai di situasi na songon i ro do panurirang paposhon roha nasida, asa dijalo nasida na masa i songon panogunogu on ni Debata di nasida. Ai molo tung pe diloas Debata nasida tarbuang, paluaon ni Debata do muse nasida sian habuangan i dung salpu pitupulu taon. (Jer. 29: 10). Ala ni diarahon panurirang i do bangso i, asa tongtong unduk tu panogunoguon ni Debata, jala tongtong dijouhon nasida, asa dipalua Debata nasida songon pasipasi ni bangso i, na so sadia be bilanganna dung marujung harajaon Israel Utara ala ni uhum ni Debata tu nasida. Laos joujou ni na sinoarahon ni panurirang Jeremia on do tongtong jouhononta di ngolunta naung pinarhatoban ni dosa i, asa dipalua Debata hita sian ragam ni angka parngoluon na porsuk hinorhon ni dosa i.

2. Ditogihon Debata do bangso-Na tu parngoluon na lam tu dengganna. Ditogutogo Debata do bangso-Na gabe

bangso na marpanghirimon. Nang pe jotjot ingkon mamolus godang angka hamaolon, tantangan sian angka na humaliang, ro di ragam ni angka hasusaan, sahat ro di na ingkon madabu tu tangan ni angka musu, alai tongtong do ditogutogu Debata nasida marpanghirimon. Di naung marserak angka pinompar ni si Jakob, i ma bangso na pinabangkit ni Debata gabe bangso-Na, dilehon Debata do tu nasida panghirimon na ingkon paluaon ni Debata do nasida jala papunguon ni Debata tu inganan na pinarade ni Debata. Ditogihon sian sude inganan parsearahanna i, adong sian tungkan utara dohot sian ujung ni tano on, ndang mardia imbar manang songon dia rumang ni parngoluonna, na mapitung, na pangpang, na gabegabeagabean manang na tubutubuan, dipapungu tu sada inganan na gabe sada luhutan bolon. Apulapul do on tu bangso naung marserak i asa tongtong nasida di bagasan panghirimon. Nang pe naung marserak nasida tu luat ni angka sipele begu, alai togihonon ni Debata do nasida mulak tu inganan na pinarade ni Debata di nasida. I ma pataridahon na hot do holong ni roha ni Debata di bangso-Na i atik pe jotjot nasida manimbil sian dalan ni Debata.Alai sada panurirangon do on sian si Jeremia, martudutudu tu haluaon na umbalga na pinatupa ni Debata marhite Jesus Kristus tu sandok hajolmaon naung marserak di sandok tano on . Sudena i dipatupa Debata marhite Jesus Kristus na ro tu portibi on. Nunga dipapungu Debata sandok angka na porsea di Jesus gabe sada luhutan bolon di bagasan huria i sian ragam ni horong ni masyarakat dohot status sosial. Nunga dipabangkit Debata angka na porsea i, gabe anak buhabaju na niasian jala hinaholongan-Na. Mangasahon i do hita di bagasan pos ni roha mangalangka tu jolo, i ma tu taon na ro naung jonok di jolonta.

3. Taloas ma tongtong Debata na gabe Partogi di hita. Godang do angka partogi di tongatonga ni hajolmaon di portibion. Adong do partogi ni pemerintahan manang negara, adong partogi di ngolu parugamoon isara ni partogi di huria i, adong partogi di angka organisasi masyarakat, adong partogi di organisasi politik. Sudena angka partogi i ingkon mandalanhon ulaonna hombar tu angka hatontuan naung diaturhon di badan manang organisasi na niuluhonna. Nang pe sude angka partogi dihirim angka halak na niuluhonna do boi gabe pangondian di nasida, boi be gabe mual ni angka olopolop dohot las ni roha di na niuluhonna, alai ndang sude angka partogi ni portibi on mamboan songon na hinirim ni na niuluhonna i. Torop do angka partogi holan mamingkirhon dirina be, mangalului huaso, hasangapon dohot paruntungan portibi on. Ndang songon i anggo Debata na gabe Partogi di sandok pardalanan ni ngolunta. Sandok marojahan di holong ni roha na polin di hita jolma na tinompaNa i do Ibana manogunogu manang manogihon hita na hinaholongan ni roha-Na tu ngolu na lam tu dengganna, Songon na nidokna marhite hata panurirangon ni si Jeremia: "Ahu ma manogihon nasida tu angka batang aek di dalan na hornop, ndang tagamon tarsulandit nasida disi". Hata on tongtong na gabe pos ni roha di hita laho mangalangka tu taon na imbaru naung jonok di jolonta. Ra tahilala do i di pardalanan ni ngolunta di taon na salpu. Debata do na manogihon hita di batang aek na gabe mual ni hangoluanta, mardalan di tano na hornop, na mambahen hita ndang tarsulandit. Tutu boi do sai adong angka siparungkilhononta, boi do alani masalah ekonomi, boi ala ni sahit, dohot angka na asing. Ala i di bagasan sude na dokdok na taalami, tongtong do tahilala tangan ni Tuhan i mampargogoi hita jala manogunogu hita malua sian angka na pasorathon rohanta. Ala ni i hata ni Tuhanta sadarion, paposhon rohanta asa taloas tongtong Debata na gabe Partogi di nglolunta. Ibana do mual ni apulapul di hita uju masa arsak ni roha. Ibana do na mangondihon hita maradophon angka musunta. Ibana do manarihon ngolunta na so jadi hurangan. Ibana do na margogoihon hita uju masa angka siparungkilhononta.

__________________________

Evangelium: Jeremia 31:7-9

7 Ai songon on do hata ni Jahowa: Marhinsa ni roha ma hamu marsuraksurak mida si Jakkob, jala marolopolop ma hamu mida ihutan ni angka bangso parbegu! Pangiar hamu ma soaramuna mamujimuji jala dok hamu ma: Sai palua ma ale Jahowa bangsoM, pasipasi ni Israel!

8 Ida ma, ingkon ahu manogihon nasida sian tano na tungkan utara jala ahu papunguhon nasida sian angka ujung ni tano on rap dohot angka na mapitung dohot na pangpang, na gabegabean dohot pangintubu di tongatonganasida. Tung luhutan na bolon do nasida angka na mulak i.

9 Ro do nasida tutu huhut tumatangis dohot marhuraja. Ahu ma manogihon nasida tu angka batang aek di dalan na hornop, ndang tagamon tarsulandit nasida disi; ai Ahu do gabe ama di Israel jala Epraim gabe anak buhabajungKu.

Epistel: Epesus 1:3-6

3 Pinuji ma Debata, Ama ni Tuhanta Jesus Kristus, naung umpasupasuhon tu hita ragam ni pasupasu partondion sian banua ginjang, di bagasan Kristus.

4 Ai dipillit do hita di bagasan Ibana, andorang so ojak dope tano on, asa badia hita jala so hasurahan di adopanNa i, di bagasan holong ni roha.

5 Ditodo hian do hita bahen anakNa, marhitehite Jesus Kristus, asa tu Ibana, mangihuthon halomoan ni rohaNa,

6 asa tarpuji asi ni rohaNa na marmulia i, na niasihonNa tu hita di bagasan na hinaholonganNa i.

Semua tanggapan:

11Sinta Uli Panjaitan, Krisman Davit Hutapea dan 9 lainnya

1

Suka

Komentari

Bagikan

 

RENUNGAN YESAYA 35: 1-4, RO DO JAHOWA TONGON PALUAHON BANGSONA ( ALLAH DATANG MENYELAMATKAN UMATNYA)

 RO DO JAHOWA TONGON PALUAHON BANGSONA ( ALLAH DATANG MENYELAMATKAN UMATNYA)

Horas ma di hita. Selamat Ari Minggu Advent IV (24 Desember 2023), i ma minggu Advent na parpudi. Marsogot sahat ma hia tu Ari Pesta Parningotan Hatutubu ni Jesus. Di bagasan Jesus ro do Debata paluahon hita jolma sian dosa.

1. Konteks historis ni turpuk (Jesaya 35: 1-4).

Sian mulai madabu jolma tu dosa, nunga dosa i na mangarajai ngoluna, na mambahen hita jolma mangihuthon hagiothagiot ni portibion.

Dibereng Debata do songon dia jorbut ni parngoluon ni hita jolma molo dipasombu dosa i mangarajai ngolunta . Asing ni na lam rarat hajahaton, halumlamon, hamagoan na saleleng ni lelengna na ma jambarta. Alai ala holong do roha ni Debata di jolma na tinompa-Na i manigor disangkapi Debata do paluahon hita jolma sian gomgoman ni dosa i. Realisasi ni sangkap i, mulai tarida di usaha ni Debata pajongjonghon sada bangso gabe bangso-Na, asa marhite bangso i Debata mandalanhon missi-Na i ma paluahon saluhut jolma sian gomgoman ni dosa. Di mulai ma i sian pamilliton-Na di si Abraham. Dipasupasu Debata si Abraham asa gabe pasupasu tu saluhut bangso, jala dibahen maringanan di tano Kanan, i ma tano na strategis, na boi dohonon pusat ni portibion, na manghubunghon tolu benua, i ma Asia, Afrika dohot Eropa. Sian pinompar ni si Abraham ma, i ma halak Israel dipajongjong Debata sada bangso gabe bangso-Na, na diihoti Debata marhite sada padan na dipatolhas di dolok Sinai, di pardalananan ni halak Israel ruar sian parhatobanan ni bangso i di tano Misir manuju tu tano Kanan, ima tano na nijanjihon ni Debata bahen ingananan nasida. Marhite saluhut pengalaman ni parngoluon ni bangso i di bagasan panogunoguon ni Debata Jahowa, i ma Debata naung nipadanhon ni bangso i gabe Debata nasida, Debata na gabe sisombaon jala siihuthonon nasida di sandok parngoluon. Alai songon bangso ni Debata nasida ingkon radotan nasida do patik naung pinasahat ni Debata tu nasida marhite si Musa, asa marhite i boi gabe tiruan nasida di haporseaon dohot parange na denggan di sude rumang ni parngoluon tu angka bangso na humaliang. Domu tusi marpadan do Debata, molo diradoti nasida patik i ingkon sai tarpasupasu ma nasida, alai molo dilaosi do jala manimbil nasida gabe siihuthon debata sileban ingkon uhumon ni Debata do nasida. Di bagasan sejarah ni ngolu nasida na gok tantangan dohot perjuangan, sai ditogutogu Debata do nasida marhite angka naposo na pinabangkit ni Debata, asa tangkas nasida mananda jala manghaporseai na Sasada Debata Jahowa do Debata na sintong na patut sisombaon jala sioloan ni sandok jolma manang bangso. I do sasintongna missi Debata pabangkithon nasida gabe bangso-Na asa sude bangso na di portibion mananda jala manghaporseai Debata Jahowa, jala marhite haporseaon i ma boi nasida malua sian gogomgoman ni

dosa dohot sian panghorhon ni dosa i. Alai jotjot do bangso i ndang mangingot padanna, ala jotjot do nasida mangihuthon angka debata sileban, jala ndang marparange songon bangso ni Debata. Ala ni jotjot do hona uhum ni Debata nasida, disosak angka bangso na humaliang. Ala manabu do angka raja ni bangso i holan manggulut huaso harajaon portibi, lupa ma nasida songon bangso ni Debata, na ingkon tongtong marrajahon Debata, ujungna dung salpu raja Salomo, mabola dua do harajaon Israel i, i ma harajaon Israel Utara (sampulu marga) na marpusat di huta Samaria, jala harajaon Selatan ( dua marga) na margoar harajaon Juda marpusat di Yerusalem. Harajaon Israel Utara na so marrajahon dinasti ni si David be, gabe hona uhum ni Debata, madabu ma nasida tu gomgoman ni harajaon Assur taon 722 sM. Sian mulai i nunga mago be harajaon i.Tading ma holan harajaon Juda na holan dua marga nama ima marga Juda dohot Benjamin mamboanhon goar Israel i, alai on pe boi martahan olat ni taon 587 sM do. Ai madabu do nasida marsorinsorin tu gomgoman ni harajaon na asing, mulai sian harajaon Babel, Persia, Junani dohot Rom. Si Jesaya dipabangkit Debata gabe panurirang di tongatonga ni harajaon Juda, mulai sian taon 740 sM. Situasi na krisis do hatiha i di bidang politik. Nunga manggogo harajaon Assur naeng manguasai Israel Utara, jala ujungna taon 722 sM madabu ma haraon i tu tangan ni harajaon Assur. Harajaon Juda i pe disosak harajaon Assur do sian Utara, harajaon Mesir sian Selatan jala harajaon Babel sian Timur. Hira na targogot ma panghilaan nasida. Disituasi na songon i ma ro hata ni Debata paposhon rohanasida, asa unang mabiar jala asa tongtong marsihohot marsigantung tu Debata Jahowa. Dibagabagahon ma na ro do Jahowa paluahon bangsona i, sian hagogotan i, asalma tongtong marpos ni roha nasida tu Debata.

2. Haroro ni Tuhan i manghorhon las ni roha dohot ololop. Dijouhon panurirang Jesaya do tu bangso ni Debata asa marlas ni roha manjanghon haroro ni Tuhan i paluahon bangso-Na. Dipatudos do bangso naung mandate i songon halongonan, songon tano bangkal bangkal dohot adaran naung hasang, na so tubuan manang be. Secara geografisna, memang gomodang do Tano Juda songon halongonan, parhorsihan, manang tano bangkalbangkal ro di adaran na so tubuan manang aha. Tudos tusi ma ngolu ni halak Israel naung mansai hasang ala so dibornohi hata ni Debata be, gabe ndang marparbuehon angka na uli dohot na denggan be di ngoluna di adopan ni Ddebata nang tu angka na humaliang. Laos songon i do nang parngoluon ni hita jolma naung digomgomi dosa, jala naung mansai dao sian Debata gabe patuduhon angka pangalaho na mansai jorbut, i ma angka na masihosoman, masilatean sahat ro di na masibunuan. Alai molo dung ro Tuhan i paluahon bangso-Na sian dosa, muba ma tano parhorsihan dohot tano bangkalbangkal i gabe tano na napu hatubuan ni hau na denggan, hau na uli ro di angka bunga na uli na mambahen las jala dame roha ni halak na jonok tu inganan i. Dipatudos do hamubaon ni tano parhorsihan dohot tano bangkalbangkal i, gabe songon hamuliaon ni Libanon dohot haulion ni Karmel dohot Saron. Di buku Padan Na Robi tarbarita do Libanon ala ni haulion ni luat i dohot ala ni hamoraon ni luat i di sumber daya alam i ma angka hau na mansai denggan, isara ni hau ares na mansai denggan dipangke bahen parhau ni jabu. Parhau ni bagas joro na di Jerusalem pe godang do mamangke hau ares sian Libanon. Hamubaon i dipatudos nang tu hinauli ni Karmel dohot Saron. Karmel i ma sada pegunungan di tano Israel di pesisir ni Laut Tengah. Mansai uli do inganan i ala ni angka suansuanan na marragam disi , jala sahat saonari ditata pemerintahan Israel do inganan i na gabe daerah wisata na uli situtu. Saron sada dataran na mansai bidang di holangholang ni dolok Tabor dohot Tao Tiberias (2 Kronika 5: 16) na tarbarita ala hatutubuan ni bunga "panssur" (mawar). Tarbarita do di sandok portibi on, haulion ni bunga mawar Saron na mansai dihalomohon halak, na marragam rupana, adong na bontar, na rara, da merah jambu dohot na ungu. Tudos tu hamuliaon ni Libanon, dohot hinauli ni Karmel dohot Saron ma muse hamuliaon dohot haulion ni parrohaon ni jolma naung sinodangan ni hamuliaon ni Debata na ro paubahon parrohaon ni jolma i. Haroro ni Debata na disuriranghon si Jesaya dipasaut marhite haroro ni Jesus Kristus. Haroro ni Jesus i manosohon tu ganup hita laho paubahon roha, sian parrohaon na hasang, parrohaon na mansai roa, gabe parrohaon marmulia jala uli, na gabe sihalomohonon ni Debata dohot dongan jolma.

3. Haroro ni Tuhan i papirhon tondinta asa unang mabiar. Ala ni dosa nunga digohi biar roha ni hita jolma. Roha biar tubu ala sai hira na adong mangaletei hita naeng mamunu manang mansusai hita. Mabiar do hita mardalan sasada hita so tung adong maon na mangganggu hita. Mabiar do hita taringot ngolunta, manang taringot tu ari pangapudianta. Boi do tubu biar ala manghilala hagaleonna, manang ala so adong parondingondinganna. Bangso Juda di zaman ni si Jesaya mabiar mamereng hagogoon ni bangso na humaliang nasida na sai manosak nasida. Manghilala nasida ndang adong gogo ni tanganna laho mangalo dohot gogo ni patna marlojong laho maringkati paluahon diri, gabe tamba ma biar di roha nasida. Ala ni didok Debata tu angka naposona, pargogoi hamu ma angka tangan na daukdauk dohot angka pat na telluktelluk. Tontu on diulahon marhite na paposhon roha ni bangso i, paboa ro do Tuhan laho paluahon nasida. Debata do nampuna huaso di nasa na adong, tarmasuk angka na gogo ni portibion..Manang songon dia pe huaso ni angka na gogo ni portibi on, ingkon tunduk do i tu huaso ni Debata. Ala ni molo taloas tongtong Debata mandongani hita ndang adong sihabiaranta. Songon na nidok ni apostel Paulus tu huria Rom ( 8: 31), molo Debata dongantan ise ma alonta? Jadi haroro ni Debata mandapothon hita marhite Jesus asa gabe Debata do donganta, jala ala ni umbahen dibahen deba goar ni Jesus i "Immanuel" na marlapatan donganta ma Debata. Alai haroro ni Tuhanta ndada holan paluahon hita sian angka na pasorathon jala mangihoti hita di parngoluon portibion. Na umbalga sian i ima paluahon hita sian dosa. Dosa i do na patubuhon biar di hita, ai ala ni dosa i gabe tubu ma panghilalaan na mandao sian Tuhan i. Alai molo mandao do hita sian Tuhan i, ingkon sai tubu do biar dohot lomos ni rohanta di ngolunta on. Alai molo sai jonok do Tuhan i di lambungta jala Tuhan i tabahen na gabe donganta, dao do biar dohot ganggu ni roha sian ngolunta.

__________________________

Evangelium: Jesaya 35:1-4

1 Marlas ni roha ma halongonan dohot tano bangkalbangkal jala marolopolop ma adaran jala marbunga songon bunga pansur.

2 Marbunga situtu ma i jala marolopolop, masa ma tutu parolopolopon dohot pariaiaon. Hamuliaon ni Libanon dibasabasahon tusi rap dohot hinauli ni Karmel dohot Saron. Idaonnasida ma hamuliaon ni Jahowa, hatongamon ni Debatanta.

3 Pargogoi hamu ma tangan angka na dauk jala pahot hamu angka pat na telluktelluk.

4 Dok hamu ma tu angka parroha na tahuton: Pir ma tondimuna, unang hamu mabiar! Ida ma Debatamuna i ro martubolhon dohot mamaloshon! Ro do Ibana tongon paluahon hamu.

Epistel: Heber 10:5-10

5 Ala ni i, ninna do di habobongotNa i tu portibi on: "Ndang diparhagiot rohaM pelean manang silehonlehon; daging i do dipauli Ho di Ahu! "

6 Ndang lomo rohaM di pelean situtungon manang di pelean pardosaon.

7 Jadi ningku ma: Na ro ma Ahu mangulahon lomo ni rohaM, ale Debata; di pustaha i do tarsurat taringot tu Ahu.

8 Didok jolo: "Ndang diparhagiot Ho pelean dohot silehonlehon, nang pelean situtungon manang pelean pardosaon, jala ndang lomo rohaM di na pinelehon mangihuthon patik. "

9 Dung i didok ma: "Na ro ma Ahu, mangulahon lomo ni rohaM! " Disi ma dipasohot na parjolo i, asa dipajongjong na paduahon.

10 Di bagasan lomo ni rohaNa i gabe angka na badia hita, binahen ni daging ni Jesus Kristus, naung pinelehonNa, na sahali i.

Semua tanggapan:

17Ricky Sitopan II, Drs Banuasi Simamora dan 15 lainnya

5

Suka

Komentari

Bagikan