RENUNGAN 1 MUSA (KEJADIAN 18: 22-33), TANGIANG MANGIDOHON HALUAON (DOA MEMOHON KESELAMATAN)

 TANGIANG MANGIDOHON HALUAON (DOA MEMOHON KESELAMATAN)

1 Musa 18: 22-33

Horas ma di hita. Selamat Ari Minggu VI dung Trinitatis ( 27 Juli 2025). Las ma rohanta marsomba tu Tuhanta, mamuji pasangaohon goar-Na, huhut tumangihon hata-Na sihangoluhononta. Disoarahon hatani Debata do tu hita sadarion, na dienet sian buku 1 Musa 18: 22-33, asa taharingkothon martangiang tuTuhan i mangido haluaonta dohot haluaon ni donganta. Domu tusi dipatuduhon do tu hita marhite turpuk on:

1 Gogo ni tangiang ni na porsea mangondihon halak partigor.

Turpukta on i ma tangiang sisahalak na porsea tu Debata Jahowa, i ma si Abraham. Si Abraham, ala ni pangoloionna mangihuthuthon panjouon dohot panogunoguon ni Debata di ngoluna, gabe targoar do ibana ompu ni angka na porsea. Dioloi ibana do bungkas sian tano hagodanganna tu tano sipatuduhonon ni Debata tu ibana gabe maringanan ma ibana di Sikem Tano Kanaan. Di jolo ni turpuk on (ay. 1-16) na ro do Debata Jahowa marrumang jolma rap dohot dua halak susuruan manopot si Abraham si Sikem pabotohon na tubuan anak ma jolmana si Sarah, hombar tu naung binagabagahon-Na hian, ingkon torop pinomparna. Barita las ni roha do i, na hinaporseaan ni si Abraham ingkon saut do i, nang pe ibana dohot jolmana nunga matua situtu. Alai udut tusi laos dipabotohon Debata Jahowa do sangkap ni haroro- Na na naeng mandabu uhum tu huta Sodom dohot Gomora, marhite na mangaripashon huta i. Didok Debata Jahowa tu si Abraham: "Maungaung do angguhangguk badar sian Sodom dohot Gomorra, ai manahatang do dosanasida i." (ay. 20) Lapatanna nunga tung jorbut hajahaton ni pangisi ni huta ai i holan dosa na ma diula nasida. Huta i do dipillit si Lot bahen ingananna, di na dipangido si Abraham, asa dipillit si Lot dia inganan na denggan di rohana, bahen ingananna. Alai mambege sangkap i, ro ma pangidoan ni si Abraham, laho mangondihon angka partigor na di huta i, lumobi ala marningot si Lot anak ni hahana i, na rap bungkas dohot ibana sian Haran. Alai laos ro do tu roha ni si Abraham, asing ni si Lot nda tung so adong angka partigor na asing na tinggal di huta i rap dohot si Lot. Ala ni tubu ma panghataion ni si Abraham dohot Jahowa na pasahathon pangondihononna tu angka partigor marningot ala parasi roha jala parholong ni roha do Debata, asa unang diripashon Debata angka partigor rap dohot angka parjahat. Dungi di panghataion masa ma hira na marrunding si Abraham dohot Debata. Didok si Abraham ma: "Atek tung adong limapulu halak, angka na tigor di bagasan huta i, tung ripashononmu ma i, ndang olananmu huta i ala na limapulu na tigor i, angka na di bagasan i.(Ay. 24) Alus ni Jahowa tu pangidoan ni si Abraham i: "Molo tung jumpang Ahu di bagasan huta Sodom limapulu halak, angka na tigor, sai na olanangKu do na saluat i ala nasida." Songon i ma pangidoan ni si Abraham muse, tu na 45 halak, 40 halak, 30 halak, 20 halak, sahat tu parpudi 10 halak. Sude na i dioloi Debata do, tung sura pe holan 10 halak partigor di huta i, ndang ripashonon ni Debata huta i ala ni na 10 halak i. Alai olat ni i do panghataion ni si Abraham dohot Jahowa, dungi laho ma Jahowa manadinghon di Abraham. Dipaso di Abraham panghataion i, ala olat ni i na ma didok rohana kelompok masyarakat na ummetmet. Di toru ni i, tardok angka pribadi manang keluarga nama.

2. Dioloi Debata do tangiang ni angka na porsea. Di sude pangidoanna i, ndang dipaksahon si Abraham ingkon oloan ni Debata pangidoanna i. Alai tongtong do dipasahat ibana tu panimbangion ni Debata na hombar tu lomo ni roha-Na, jala rade do si Abraham manjalo songon dia alus ni Debata tu pangidoanna i. Alai ala naung ditanda si Abraham Debata Jahowa, diboto ibana do songon dia lomo ni roha ni Debata mida jolma pardosa i. Diboto ibana, ndang lomo roha ni Debata mida hamatean ni angka pardosa, alai mulak ma nian angka pardosa i tumanidonghon dalanna, asa mangolu ibana, i do dihalomohon roha ni Debata. Alai na binahenna tu huta Sodom dohot Gomora, gabe singotsingot tu halak na asing asa adong hamubaon ni roha.

Jala laos mangalehon parsiajaran do turpuk on di sude na porsea, songon dia ringkotna tangiang pangondianon mangondihon dongan jolma asa dilehon Debata haluson sian dosa, jala asa adong hamubaon ni roha.

3. Tongtong do Debata marojahan di holong dohot hatigoran-Na mangalusi tangiangta. Tudos tu tangiang do pangidoan ni si Abraham i na mangondihon angka partigor asa unang hona uhum rap dohot angka parjahat. Jala dipatuduhon Jahowa do holong ni rohana tu si Abraham na rade mangoloi pangidoanna i. Alai di sude pambahenan ni Debata tongtong do Ibana marojahan di hatigoran ni Debata. Hatigoran ni Debata, ndang jadi halak partigor hona uhum rap dohot parjahat. Boi do malua angka parjahat ala ni angka partigor. Hadirion ni Debata, asing ni parrimas, alai laos tong do parasi roha. Ulaon-Na na nyata di ngolu ni hita jolma, i ma mamasumasu, mangaramoti, marmudumuduhon, paluahon jala manesa dosa dohot hasalaan ni jolma sian lambas ni rohan-Na. Alai dipangido Debata do asa adong hubungan ni jolma na denggan tu Debata, mangungkap rohana, jala pasahathon pangidoanna. Hubunganta tu Debata, i ma marhite tangiang. Tuhan Jesus pe diajari do angk asisean-Na martangiang, singon na dipatuduhn di turpuk Epistelta sadarion

Tongtong do tangi Debata, di tangiangta, jala ungkap do roha-Na, maradophon tangiangta i, alai ndang boi hita mamaksahon hagiotta ingkon oloan ni Debata, tongtong do marguru tu lomo ni roha ni Debata.***

Evangelium: 1 Musa 18:22-33

22 Dung i manirpang ma sian i na dua baoa i mardalan dompak Sodom; alai jongjong dope ianggo si Abraham di jolo ni Jahowa.

23 Dung i dipajonok si Abraham, jala ninna ma: "Tung ripashononMu ma na tigor rap dohot parjahat?

24 Atek tung adong limapulu halak, angka na tigor di bagasan huta i, tung ripashononMu ma i, ndang olananMu huta i ala na limapulu na tigor i, angka na di bagasan i.

25 Dao ma i sian Ho mangulahon sisongon i: mambunu na tigor rap dohot parjahat; tung sobokkon parjahat ma na tigor i? Palias ma i sian Ho, tung na so uhum ma bahenon ni Siuhumi liat portibi on?"

26 Jadi ninna Jahowa ma: "Molo tung jumpang Ahu di bagasan huta Sodom limapulu halak, angka na tigor, sai na olananHu na saluat i ala nasida.

27 Dung i ninna si Abraham ma mangalusi: "Sombangku ale Tuhan, nunga sapala hum ahu mamungka manghatai dohot Ho; atek pe orbuk jala sirabun ahu.

28 Ua tung moru lima halak sian na limapulu angka na pintor i, tung ripashononmu ma luhut huta i ala ni na lima i?" Jadi ninna ma: "Ndang ripashononHu molo tung jumpang Ahu disi opatpulu lima."

29 Dung i diulahi si Abraham muse dope mandok tu Ibana, ninna ma: "Ua tung opatpulu jumpang disi." Jadi ninna Jahowa ma: "Ndang hahuaonHu nasida ala ni na opatpulu i."

30 Dung i ninna si Abraham ma: "Ua unang tung tarrimas Ho, ale Tuhan, ala hudatdati mandok: Atek tung jumpang disi tolupulu." Jadi ninna Jahowa ma: "Ndang hahuaonku nasida, molo tung jumpang Ahu tolupulu disi."

31 Dung i ninna si Abraham ma: Ida ma, nunga sapala hum ahu mamungka mandok tu Tuhanhi: Ua tung jumpang disi duapulu." Jadi ninna Jahowa ma: Ndang ripashononku ala ni na duapulu i.

32 Jadi ninna si Abraham ma: "Unang tung tarrimas Ho, ale Tuhanhi, ala na mandok ahu dope holan sahali on: Atek tung jumpang disi sampulu?" Jadi ninna Jahowa ma: "Ndang ripashononHu nasida ala ni na sampulu i."

33 Jadi dung sun Jahowa mangkatai dohot si Abraham, laho ma Ibana, mulak ma dohot si Abraham tu ingananna.

Epistel: Mateus 6:9-13

9 Songon on ma tangiangmuna: Ale Amanami na di banua ginjang! Sai pinarbadia ma goarMu!

10 Sai ro ma harajaonMu! Sai saut ma lomo ni rohaM di banua tonga on songon na di banua ginjang!

11 Lehon ma di hami sadari on hangoluan siap ari!

12 Sesa ma dosanami songon panesanami di dosa ni angka na mardosa tu hami!

13 Unang hami togihon tu pangunjunan! Palua ma hami sian na jahat! Ai Ho do nampuna harajaon dohot hagogoon dohot hasangapon ro di saleleng ni lelengna. Amen!

RENUNGAN LUKAS10: 38-42, MAMILLIT TOHAP NA UMMULI ( MEMILIH BAGIAN YANG TERBAIK)

 MAMILLIT TOHAP NA UMMULI ( MEMILIH BAGIAN YANG TERBAIK)

Lukas 10: 38-42

Horas ma di hita. Selamat Ari Minggu V dung Trinitatis ( 20 Juli 2025). Las ma rohanta marsomba tu Tuhanta, mamuji pasangaphon goar-Na huhut tumangihon hata-Na, sihangoluhononta. Disoarahon hata ni Debata do tu hita sadarion, na dienet sian Evangelium Lukas 10: 38-42, mamillit tohap na ummuli di ngolunta, asa dapotan hangoluan hita sian Tuhanta i. Songon dia dalanna laho patupahon i.

1. Patujolohon parsaoran tu Tuhan i, jala tumangihon hata-Na, i do tohap na ummuli. Di pardalanan ni Jesus sian Galilea tu Jerusalem, dibolus nasida do sada huta na margoar Betania, jala maradian di bagas ni aleale-Na, i ma keluarga ni si Marta dohot si Maria. Iboto nasida do si Lazarus na dipangolu Jesus sian na mate, alai ndang dibaritahon di turpuk on taringot tu si Lazarus. Somal do Jesus dohot angka sisean-Na molo laho mangebati huta Jerusalem maradian di huta on, di bagas ni aleale-Na i. Alai pangebation na ditaringoti di turpuk on, i na ma pangebation ni Jesus na parpudi dompak hamamate-Na i. Ndang tagamon so torop na mangudurhon Ibana, i ma angka siseanNa dohot angka na mangihuthon Ibana, ai laos na naeng mangarayahon paskah ma nasida di Jerusalem. Diboto Jesus do na ingkon marutang hosa Ibana bahenon ni rapot godang ni halak Jahudi, ala so porsea nasida di Jesus ndang tarjalo roha nasida angka na niula dohot naniajarhon ni Jesus tu na torop i. Ala ni i songon jolma Ibana, ndang tagamon so diparungkilhon Jesus na naeng masa tu diri-Na. I do umbahen diharingkothon Ibana mangulon, mangalap gogo sian Debata Ama i, marhite na maradian di jabu ni si Marta. Dua nasida parompuan na marhahaanggi, marasing do cara na binahennasida laho manjanghon Jesus. Si Marta, si angkangan manigor

diharonsothon do marmasak sipanganon dohot siinumon mambahen sada"pesta" parmangon tu tamuena i. Alai anggo anggina si Maria, manigor hundul do di lambung pat ni Jesus, laho tumangihon hata ni Jesus. I do cara na ummuli di rajumi ibana laho pasangaphon tamuena, huhut patuduhon uas ni rohana tumangihon hata ni Jesus. Jala pambahenan ni di Maria i do na hinalomohon ni Jesus. Laos i do na hinalohon ni Jesus sian hita, i ma patujolohon parsaoran tu Tuhan i laho tumangihon hata-Na, na gabe bohal ni tondinta. Ummarga do i sian pangaradotion di angka panghobasion di ngolu pardagingon. Alai torop do halak patujolohon panghobasion di ngolu pardagingon sian ngolu partondion.

2. Unang taambati halak marsaor dohot manangihon hata ni Tuhan i, ala ni ulaon portibion. Songon naung tinaringotan di jolo, asing do cara ni si Marta laho pasangaphon Jesus dohot angka donganna sauduran i. Ibana manigor dihalaputi do naeng patupahon parmanganon na balga, asa las roha ni Jesus dohot angka donganna i didok rohana. Patupahon na sinangkapanna i, didok rohana ma ndang tolapsa mangulahon i sasadasa. Didapothon ibana ma Jesus. Ala naung somal nasida pajumpang dohot manghata i tuJesus, ndang alang be rohana mandok na di bagasan rohana tu Jesus. Songon siangkangan ibana, ndang suman didok rohana, dipasombu anggina i sasadasa manghobasi parmanganon ni angka tamuena i. Gabe didapothon ibana ma Jedus huhut didok: "Tuhan, ndang diantoi rohaM, na pinasombu ni anggingki ahu marhobasi sahalakhu? Dokkon ibana antong mandongani ahu!" Di son ma parasingan ni tipe ni parompuan na dua na marhahaanggi i. Sian sudut pangantusion ni si Marta ndang suman na binahen ni anggina si Maria, na pasombuhon ibana sasadasa manghobasi parmanganon ni angka tamuena. Alai mangihuthon Jesus, na niulahon ni si Maria i do na denggan, ai mamangke ombas na adong laho mamingkirhon ngolu ni tondina, ima marsaor dohot Tuhan i huhut tumangihon hata-Na. Ala ni i do alus niJesus tu si Marta: "O Marta, Marta! Lan do disarihon jala dihasusahon ho! Sada do na ringkot! Dipillit si Maria do tohap na uli i; ndang sibuaton i sian ibana." Jadi godang pe hatiha i disarihon jala dihasusahon si Marta, alai sada na rumingkot sian i sude i ma na pinillit ni si Maria, tumangihon hata ni Tuhan i na gabe ngolu ni tondina.

3. Tapillit ma tohap na ummuli i di ngolunta. Turpuk on manosoi nang hita pe asa tapillit tohap na ummuli i, songon si Maria. Rap denggan do sasintongna na niula ni dua parompuan na marhahaangi i, si Marta dohot si Maria. Denggan do na niula ni si Marta, sian sudut pamerengan budaya dohot adat istiadat hajolmaon. Molo ro tamue lumobi tamue na nianggap na marhasangapon, mangihuthon adat hajolmaon sai manigor nihalaputan do laho manjangkon dohot denggan, dalan laho pasangaphon. Alai asing do pamerengan ni Jesus. Ndada holan marnida ngolu portibion, manang ngolu pardagingon, alai ngolu na salelenglengna i do, i ma ngolu partondion, marhite hata ni Debata, ai i do bohal ni tondinta. I do tohap na ummuli, songon na niulahon ni si Maria. Ala ni na mangharingkothon ngolu ni tondina, pola hum do rohana pasombuhon hahana si Marta, laho manghobasi na ringkot di ngolu pardagingon on. Halobian ni si Maria, ala diboto ibana do mamangke tingki na uli, i ma haroro ni Jesus manopot nasida tu bagasnasida laho manangihon hata ni Jesus na gabe hangoluan ni tondina. Di sada tingki olo do hita diadophon tu situasi na songon on. Olo do sada tingki ro tamuenta, subang ni tuturta, mandapothon hita tongon di na laho tu gareja hita. Olo do hita gabe sundat laho tu gareja marsaor dohot Tuhanta, tumangihon hata-Na, ala subang rohanta manadinghon tondongta i. Na dumenggan ra asa unang sundat hita tu gareja, taarahon dohot tondongta i borhat tu gareja rap dohot hita, dungi rap taruli ma hita di tohap na uli i, i ma hata ni Debata. Jala hita sandiri pe porlu do mamingkirhon, unang gabe tarambat donganta, tondongta, alealenta manangihon hata ni Tuhanta ala ni hita.***

Evangelium: : Lukas 10:38-42

38 Jala di na mardalani nasida, dibongoti ma sada huta. Adong ma disi parompuan sahalak, na margoar si Marta, na manjangkon Ibana tu jabuna.

39 Ianggo anggina na margoar si Maria, hundulhundul do di jolo ni Tuhan i tumangihon hataNa.

40 Diharonsothon si Marta do ragam ni parhobason. Laos dipajonok ma mandok: "Tuhan, ndang diantoi rohaM, na pinasombu ni anggingki ahu marhobasi sahalakhu? Dokkon ibana antong mandongani ahu!"

41 Gabe ninna Tuhan i mangalusi ibana: "O Marta, Marta! Lan do disarihon jala dihasusahon ho!

42 Sada do na ringkot! Dipillit si Maria do tohap na uli i; ndang sibuaton i sian ibana."

Epistel: Amos 8:1-12

Panurirangon taringot tu

Hirang na Marisi Parbue

1 Songon on do dipataridahon Tuhan Jahowa tu ahu, ida ma, sada hirang na marisi parbue naung malamun.

2 Jadi ninna Ibana ma: "Aha do na niidam, ale Amos?" Jadi ningku ma: "Sada hirang marisi parbue naung malamun." Dung i ninna Jahowa ma tu ahu: "Nunga jumpang hasisimpul ni bangsongKu Israel, ndang be marsombusombu ahu mida ibana.

3 Jadi di ari na sasada i andunghononnasida ma angka ende di joro i," ninna Tuhan Jahowa, "dibahen hinadeak ni bangke, sip songon i ditimpalhon margugungugun."

4 Tangihon ma hata on, hamu ale angka na mangarohai halak na pogos, jala disiaphon halak na dangol di tano on.

5 Angka na mandok: "Andigan pe ulaning salpu poltak ni bulan asa manggadis eme hita? Andigan salpu dohot ari Sabbat, asa tarungkap sopo paremean? Laho pametmethon solup, jala pabalgahon arga dohot mangansi marhite sian hatian si paotooto.

6 Laho manuhor halak na parir ali ni perak dohot halak na pogos ali ni sipatu sapasang, asa tagadis lapung singkat ni eme."

Nunga Disangkapi Jahowa

Hasisiap ni BangsoNa

7 Nunga pola marmangmang Jahowa tu hamuliaon ni si Jakob: "Molo tung halupahononHu be salelenglelengna angka pambahenannasida sudena.

8 Tung so humuntal ma tano on taringot tusi, manang so margudompong nasa pangisina? Gabe binsat songon batang aek Nil sandok tano i, jala margalumbang jala moru, songon Nil ni Misir.

9 Di ari na sasada i," ninna Tuhan Jahowa, "sundut ma mata ni ari di hos ni ari, jala paholomonHu tano on arian.

10 PaubaonHu ma ari rayamuna gabe pangandungan, jala saluhut endemuna gabe andung; jala alithononHu tu saluhut gontingmuna ulos hori, jala hapalpalon tu atas saluhut ulu; jala bahenonHu do songon hangaluton marhinamagohon anak sasada, jala ujungna songon ari hinamago.

11 Ida ma, ro do angka ari sogot," ninna Tuhan Jahowa, "tongosonHu ma haraparon tu tano on, ndada haraparon di sagusagu manang hauason di aek ingkon di angka hata ni Jahowa do, naeng begeonna nian.

12 Jadi madoado ma nasida sian laut na sada tu laut nasada nari, jala sian utara tu habinsaran diliati nasida mangalului hata ni Jahowa nian, hape laos so jumpang nasida do.

RENUNGAN 5 MUSA (ULANGAN) 30: 15-20, MANGHAHOLONGI DEBATA JALA MARPARANGE DI ANGKA DALANNA (MENGASIHI TUHAN DAN HIDUP MENURUT JALAN-NYA)

 MANGHAHOLONGI DEBATA JALA MARPARANGE DI ANGKA DALANNA (MENGASIHI TUHAN DAN HIDUP MENURUT JALAN-NYA)

5 Musa 30: 15-20

Horas ma di hita. Selamat Ari Minggu IV dung Trinitatis (13 Juli 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na. Disoarahon hata ni Debata do tu hita sadarion na dienet sian buku 5 Musa 30: 15-20, asa sai tongtong hita manghaholongi Debata, jala marparange di angka dalan-Na. Domu tusi dipangido do sian hita:

1. Mamillit hangoluan dohot hatuaon na sian Debata.

Di naung mandonok halak Israel sahat tu tano Kanaan, i ma tano na ni bagabagahon ni Debata Jahowa bahen inganan nasida songon bangso ni Debata, dijamitai si Musa do nasida muse na papillithon tu nasida hangoluan dohot hatuaon, manang hamatean dohot torutoru. Nunga jotjot nasida dijamitai si Musa laho mangarataratai patik dohot uhum ni Debata siulahonon nasida songon bangso ni Debata. Saleleng di pardalanan naung opat pulu taon ne lelengna nasida mamolus halongonan dohot parhorsihan i, sian mulai ruar sian parhatobanan Misir, nunga godang naung nialaman dohot ginuruhon nasida taringot tu hadirion dohot na binahen ni Debata Jahowa tu nasida, i ma taringot tu huaso, hagogoon dohot holong ni roha-Na tu nasida, na manarihon, manogunogu mangondihon, dohot mangaramoti nasida saleleng di pardalanan i maradophon musu dohot angka parmaraan. Maol do dapot sipanganon dohot siinumon di tano parhorsihan, alai ndang hurangan nasida di sipanganon dohot siinumon dibahen Debata. Jadi di naung sahat nasida tu tano Moab ( bagian ni daerah Jordania nuaeng), andorang so manaripari sunge Jordan, dipapillithon si Musa do tu nasida, hangoluan dohot hatuaon, manang hamatean dohot torutoru. Dilehon si Musa do tu nasida kebebasan laho mamillit, ai ingkon martanggungjawab do nasida taringot tu na pinillitna, jala songon dia panghorhon ni pamilliton nasida i tu dirina dohot tu pinomparna sogot. Alai disosoi si Musa do nasida asa mamillit na dumenggan, i ma mamillit hangoluan dohot hatuaon, ndada mamillit hamatean dohot torutoru manang hamagoan. Mamillit hangoluan dohot hatuaon, marlapatan do i manghaholongi Debata Jahowa sian nasa roha dohot tondi nasida. Marhite patik ni Debata naung dipasahat tu nasida nunga diajarhon tu nasida songon dia manghaholongi Debata, i ma marhite na marparange di dalan ni Debata, mangoloi hata-Na, huhut mangaradoti patik dohot uhum naung dipasahat ni Debata tu nasida. Molo diulahon nasida songon i, dapotan hatuaon ma nasida, marhite ganjang ni umur, manang leleng mangolu nasida di tano na nilehon ni Jahowa di nasida.

2. Unang manimbil gabe marsomba tu debata sileban. Diboto si Musa do sisomba Debata sileban do angka bangso na humaliang tano Kanaan, i ma angka ganaganaan na jinadihon ni jolma. Boi do bangso i terpengaruh tu haporseaon ni halak Kanaan i sumomba angka debata sileban. Ala ni i do umbahen gogo dipaingot si Musa halak Israel i, asa marsihohot sumomba Debata Jahowa.

Molo manimbil nasida sian Debata Jahowa jala gabe marsomba tu debata sileban, marlapatan na mamillit hamatean, hamagoan dohot torutoru ni Debata ma nasida disi. Ai nunga marpadan nasida di dolok Sinai na ingkon satia nasida marsomba tu Debata Jahowa, ai i do Debata na tutu, Debata na mangolu, na marhuaso manggomgomi langit dohot tano on. Haradeon marsomba holan tu sasada Debata Jahowa do tandana naung gabe bangso ni Debata nasida. Molo so unduk nasida di padan nasida tu Debata, mago do muse hadirion nasida songon bangso ni Debata, gariada ingkon mate do nasida hona uhum dohot hona torutoru ni Debata. Jadi dipangido do sian nasida parsihohoton manghaholongi Debata Jahowa marparange di angka dalan ni Jahowa. Jadi molo dipillit Debata pe nasida gabe bangso-Na, sada tanggung-jawab do i di nasida, ingkon boi marhite nasida ditanda angka bangso na asing Debata Jahowa, jala laos dohot porsea. Jadi ndada ala ni hasurungan nasida umbahen nasida dipillit, alai asa boi do dipangke Debata nasida mambaritahon taringot na huaso dohot na binahen ni Debata Jahowa di tongatnga ni portibion. Hita pe nunga dipillit Debata marhite Jesus Kristus gabe bangso-Na, jala nunga marpadan hita gabe siihuthon Ibana. Ala ni i ingkon marsihohot do tongtong rohanta manghaporseai jala manghaholongi Ibana. Marparange hita di sude parngoluonta hombar tu patik dohot uhum naung dipasahat tu hita. Unang manimbil hita sian haporseaonta tu Ibana, ai marhite panghophopon ni Jesus, nunga diparade na gabe hangoluanta saleleng ni lelengna.

3. Unang mangose padanta tu Debata asa unang hona uhum hita. Dijou si Musa do langit dohot tano gabe sitindangi paboa naung dipapillithon tu bangso i hangoluan manang hamatean. Laos i do sitindangi ni aha na pinllit ni bangso i. Jadi ndang boi neang rohanasida di pamilliton i, ai adong do sitindangina, i ma langit dohot tano. Langit dohot tano jadijadian ni Debata, na boi papatarhon huaso ni Debata. Laos boi do i parhitean ni Debata mangalehon pasupasu tu bangso i molo hangoluan dohot hatuaon do na pinillit nasida. Alai laos i do parhitean ni Debata pasahathon torutoru dohot uhum tu bangso i, molo hamatean do na pinillit nasida songon naung dipatorang di ginjang. Mamillit hangoluan dos do i dohot na sai tongtong mamillit Jahowa na gabe Debatana, ai I do na gabe mual ni hangoluan. Mamillit hamatean dos do i dohot na manadinghon Jahowa jala manimbil tu debata sileban, ai debata na mate do debata sileban i, dang adong huaso ni i agia aha mangalean hangoluan ni jolma. Na mamillit Jahowa gabe Debatana, dapotan hangoluan ma i sian Jahowa, marhite na parorohon udan dohot las ni ari, dung i dipatumbuhon tano ima angka suansuanan na gabe hangoluan ni jolma. Jala langit dohot tano boi do tong dipangke Debata parohon uhum tu hita jolma marhite logo ni ari dohot bencana alam. Ala ni i ingkon taargahon do tong jadijadian ni Debata, i ma langit dohot tanoon ri di nasa isina.***

Evangelium: 5 Musa 30:15-20

15 "Ida ma, nunga hupapillithon tu ho sadarion hangoluan dohot hatuaon, hamatean dohot hamagoan.

16 Ahu ma tutu mandokhon ho sadarion: Ingkon haholonganmu Jahowa, Debatam, jala marparange di angka dalanNa, huhut mangaradoti angka patikNa, angka aturanNa dohot uhumNa, asa pangoluonNa ho jala patoroponNa ho, jala pasupasuon ni Jahowa, Debatam ho di tano sitopotonmu nuaeng bahen partalianmu.

17 Alai tung sura marbalik roham, ndang olo ho manangihon, lam olo ho elaelaon marsomba tu angka debata sileban dohot mangoloi angka i:

18 Na pabotohon hian ma ahu tu hamu sadarion, ingkon mago situtu hamu, jala ndang tagamon leleng hamu mangolu di tano sitopotonmu, dung taripar Jordan bahen partalianmu.

19 Jouonhu ma sadarion langit dohot tano gabe sitindanginghu dompak hamu, paboa naung hupapillithon tu hamu hangoluan dohot hamatean, pasupasu dohot torutoru; dibahen i pillit ma hangoluan i, asa mangolu ho dohot pinomparmu sogot.

20 Asa haholonganmu Jahowa, Debatam, jala tangihononmu soarana, jala marsilohot roham tu Ibana, ai Ibana hangoluanmu hian dohot na paginjang umurmu, asa tongtong ho maringan, di tano, naung niuarihon ni Jahowa hian tu angka ompum, tu si Abraham, si Isak dohot si Jakkob, naeng lehononna tu nasida."

Epistel: Epesus 6:21-24

21 Alai paboaon ni si Tikikus do tu hamu saluhutna i, asa diboto hamu na masa di ahu, ro di ulaonku; ai ibana do dongan na hinaholongan jala parhobas haposan di bagasan Tuhan i.

22 Ala ni i do husuru ibana mandapothon hamu, asa dapot botoonmuna na masa di hami, jala asa diapuli rohamuna.

23 Dame ma di angka dongan, dohot holong ni roha raphon haporseaon sian Debata Ama i, nang sian Tuhan Jesus Kristus i.

24 Asi ni roha i ma mandongani saluhut, angka na marsihohot mangkaholongi Tuhanta Jesus Kristus.

RENUNGAN GALATIA 6: 11-18, GABE TINOMPA NA IMBARU (MENJADI CIPTAAN BARU)

 GABE TINOMPA NA IMBARU (MENJADI CIPTAAN BARU)

GALATIA 6: 11-18

Horas ma di hita. Selamat Ari Minggu III dung Trinitatis (6 Juli 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat ni Apostel Paulus tu huria Galatia 6: 11-18, asa gabe na tinompa na imbaru hita.

1. Angka na mangolu di bagasan haporseaon tu Jesus Kristus, nunga gabe na tinompa na imbaru, na suman tu Debata. Di mulana i, ditompa Debata do jolma tumiru rupana-Na, tudos tu pangalaho-Na, laho mangarajai sude angka na tinompa-Na i (1 Musa 1: 26). Alai gabe sega do tudosna i tu Debata, dibahen dosa i, pangalahona pe gabe sega do, ala ndang mangihuthon dalan dohot pangalaho ni Debata be, nunga mangihuthon dalan dohot hagiotna sandiri naung nirajaan ni dosa. Alai di bagasan Jesus ditompa Debata do jolma i gabe jolma na imbaru, jala dipalua sian gomgoman ni dosa. Hira i do pangibulan ni pangajarion ni apostel Paulus nang di angka surat- surat na asing. Ai pangajarion ni apostel Paulus, holan asi ni roha ni Debata do umbahen na dipatupa haluaon di hita, na tajalo marhite haporseaon. Jala i do jolma na imbaru i. Didok apostel Paulus di 2 Kor. 5: 17: "Asa molo di bagasan Kristus halak, na tinompa na imbaru ma i. Nunga salpu pangalaho na robi, gabe na imbaru." Jadi holan haimbaruon di ruhut pardagingon, alai dohot do na mardomu tu ruhut parbagasan, i ma parrohaon dohot pangalaho. Ai marhite haimbaruon na pinatupa ni Jesus, salpu ma pangalaho na robi, gabe na imbaru. Jadi angka adat, hasomalan, dohot angka tradisi na leleng ingkon dipaimbaru do, dipahombar tu patik na imbaru na binoan ni Jesus Kristus, i ma patik holong ni roha. Nian inti ni nasa patik na nilehon ni Tuhanta tu hita jolma, tarmasuk patik na sampulu i na dilehon tu halak Israel, holong ni roha do. Alai dipanghonaan ni patik i, gabe jotjot do gabe mago holong ni roha i, ai olo do dipangke i laho patimbohon dirina, jala patutoruhon donganna jolma.

2. Ndang ingkon marhite na mangulahon patik dapotan haluaon jolma alai marhite asi ni roha ni Debata do. Dung ditadinghon si Paulus huria Galatia, gabe soluk do tubu di tongatonga ni huria i poda haliluon, i ma pangajarion na maralo tu barita na uli naung niajarhonna, i ma na marharoroan sian halak Kristen Yahudi. Nang pe naung tardidi nasida tu bahasan goar ni Kristus, alai sai marsihohot do nasida di adat nasida naung leleng, lumobi ma i taringot tu sunat. Didok nasida, halak Kristen i pe ingkon disunat do, nang pe na ro sian hasipelebeguon (non Jahudi), ingkon di Jahudihon do nasida. Jala dalan laho manjahudihon halak i ma marhite sunat. Pingkiran nasida, malua ma nasida sian pangalelean ni halak Rom, molo dung gabe Jahudi nasida, ai agama Jahudi, agama naung diangkui do i di tongatonga ni harajaon Rom. Jadi halak na marugama Jahudi dilindungi pamarenta Rom do i mangihuthon uhum ni harajaon i. Anggo hakristenon, i ma huria i,ndang diangkui , jala jotjot do dirajumi hakristenon i siboan hagaoron di tongatonga ni harajaon i. Alai sangkap ni halak Kristen Jahudi i, mangarahon sude halak Kristen asa disunat, tong do i marojahan tu haporseaon nasida, na mandok: marhite parsunaton dohot namangulahon angka patik i do dapot pasupasupasu ni Debata. Alai nang pe halak Jahudi do si Paulus, hot do ibana di pangajarionna na marojahan di barita na uli i na mandok: ndang adong usaha ni jolma na boi mambaen ibana dapotan haluaon. Ala ni i do koras ibana mangalo poda haliluon ni halak Jahudi i. Ai halak Jahudi na mangjarhon asa halak Kristen pe ingkon disunat do tong do ndang mangulahon sude patik i. Ai manang beha pe ndang adong jolma na boi mangulahon patik i singkop sian dirina. Ala ni i do disosohon ibana asa sude halak Kristen tongtong marsitiopan jala mangasahon holan tu asi ni roha ni Debata.

3. Unang ma tapuji dirinta alai ni parulaonta, alai tapuji ma tongtong Debata ala ni panghophoponna i.

Didok apostel Paulus, molo sai manggogo pe halak Jahudi i manosohon asa ingkon disunat halak Kristen i, na naeng mangalului pujipujian tu diri do nasida disi. Ai molo marhasil nasida di usahana i dapot pamujion ma nasida didok rohana, ala boi paluahon donganna sian pangaleleon ni halak Rom. Hape mangihuthon si Paulus, ingkon rade do halak Kristen manaon na porsuk ala ni silang ni Tuhanta i. Molo ingkon manaon angka halak Kristen ala ni na manghatindanghon barita nauli panghophopon ni Tuhanta i, rade ma ibana disi. Ndang haluaon di portibion sieahan ni halak Kristen, alai haluaon sian gomgoman ni dosa i do. Songon si Paulus manaon godang haporsuhon ala ni barita na uli dohot silang ni Tuhanta i. Anggo na naeng paluahon dirina dohot naeng mangalului pamujion tu dirina ndang pola ulahononna i. Ala ni barita na uli dohot ala ni na mamorsan silang ni Tuhanta i, nunga dipaboanboan ibana di dagingna tanda ni bugang ni Jesus Kristus i. Nunga dirajumi ibana i, songon tanda ni dirina, na naposo ni Kristus ibana, songon somalna di hatiha i, sai adong do dibahen halak tanda ni hatobanna di dagingna i, patuduhon naung nampuna ni tuanna i hatobanna i. Jadi iposipos ni angka bugang na adong di daging ni si Paulus ala ni barita na uli i, gabe tanda ma i di dirina paboa naung hibul dirina naposo jala nampuna ni Kristus i. Jadi ala ni i, ndang hea dipuji ibana dirina ala ni sude naung niulana i, alai Kristus do tongtong dipapujipuji ibana, na rade mamangke ibana gabe naposo-Na.***

Evangelium: Galatia 6:11-18

11 Tanda hamu ma balga ni surat ni tanganhu!

12 Sude na ringkot roha di hasangapon ni pardagingon, manosaknosak hamu pasunathon; asal unang taononna pangaleleon siala silang ni Kristus.

13 Ai gari nasida, Jahudi hian, ndang diradoti patik i; alai naeng do hamu tarsunat di rohanasida, asa dipuji nasida dirina marhite sian dagingmuna.

14 Alai dao ma sian ahu na mamuji diri, anggo so siala silang ni Tuhanta Jesus Kristus! Marhitehite Ibana do tarsilang portibi on di ahu, jala ahu pe, tarsilang do maradophon portibi on.

15 Ai manang sian hajahudion dongan manang sian hasipelebeguon, ndang mahua i; ingkon na tinompa na imbaru do!

16 Jala dame ma dohot asi ni roha tu saluhut na mamarangehon ruhut sisongon i, nang tu Israel ni Debata!

17 Dungkon ni i, unang ma pola disusai agia ise ahu, ai hupaboanboan do angka tanda ni bugang ni Jesus di dagingku.

18 Didongani asi ni roha ni Tuhanta Jesus Kristus ma tondimuna, ale angka dongan! Amen.

Epistel: Jesaya 66:10-14

10 Marlas ni roha ma hamu rap dohot Jerusalem, jala marolopolop mida ibana sude hamu ale angka na holong roha di ibana! Marlas ni roha situtu ma rap dohot ibana sude hamu ale angka na marsak roha mida ibana na sai laon!

11 Asa manusu hamu, jala mahapan sian bagot ni angka apulapulna i; asa marsobur hamu, jala marsabam ni roha sian hinagodang ni hamuliaonna i.

12 Ai songon on do hata ni Jahowa: "Ida ma, Ahu patongonhon tu ibana hadameon, songon batang aek godangna, jala songon sunge na sirnip hamuliaon ni angka bangso parbegu, asa manusu hamu; ingkon abingabingonna hamu jala didengdidengonna hamu diampuanna.

13 Songon baoa, na niapul ni inana, songon i do ahu mangapuli hamu, tongon tahe di bagasan Jerusalem do hamu tarapul sogot.

14 Jala ia dung diida hamu songon i gabe las ma rohamuna, jala martumbur holiholimuna songon ingkau rata, gabe patar tartanda tangan ni Jahowa tu angka naposoNa, jala rimasNa tu angka musuNa."

RENUNGAN 1 RAJA-RAJA 19: 15-21, SATIA MANGIHUTHON DOHOT MANGHOBASI TUHAN I ( SETIA MENGIKUTI DAN MELAYANI TUHAN)

 SATIA MANGIHUTHON DOHOT MANGHOBASI TUHAN I ( SETIA MENGIKUTI DAN MELAYANI TUHAN)

1 Rajaraja 19: 15-21

Horas madi hita. Selamat Ari Minggu II dung Trinitatatis ( 29 Juni 2025). Las ma rohanta marsomba tu Tuhanta, mamuji pasangap goar-Na, huhut tumangihon hata-Na sihangoluhononta. Disoarahon hata ni Debata dotu hita sadarion, na dienet sian buku 1 Rajaraja 19: 15-21, asa marsihohot hita mangihuthon dohot manghibasi Tuhan i. Domu tusi marhite turpuk on dipasunggulhon do tu hita:

1. Dipatogu Debata do roha ni naposona, laho manghobasi Ibana.

Di na marsangkap si Isebel, dongan saripe ni raja Ahab, raja ni Israel, naeng mamunu panurirang Elia, maporus ma panurirang Elia tu parhorsihan sahat tu dolok Horeb, laho paluahon dirina. Nunga maheu situtu panghilaanna, ala nunga sange halak Israel marsomba tu debata Baal, ala ni si Isebel dongan saripe ni raja Ahab i. Si Isebel ndada boru ni halak Israel, alai boru ni Et-Baal, raja ni halak Sidon do, sisomba debata Baal. Nang pe naung tangkas talu angka malim dohot panurirang ni debata Baal dibahen panurirang Elia di dolok Karmel di na patupa pameleon tu Debata, ndang adong hamubaon di bangso Israel dohot raja Ahab. Pelean na pinatupa ni panurirang Elia do di jalo Debata Jahowa marhite

api na ro sian banuaginjang, alai anggo pelean tu debata Baal na pinatupa ni angka panurirangna ndang adong hona hahua manang aha. Mamereng i halak Israel manungkap be ma nasida, jala didok ma: "Jahowa do Debata na tutu. Jahowa do Debata na tutu". Dungi ninna si Elia ma tu bangso i: "Tangkupi hamu.ma angka panurirang ni Baal i, unang adong malua sian nasida nanggo sahalak". Dungi ditogu si Elia ma nasida tu sunge Kison laos diseseati disi. Mambege barita i sian Ahab, tarrimas situtu ma si Isebel dongan saripena i, dungi marsangkap ma si Isebel i naeng mamunu si Elia. Dipasahat ma sangkapna i marhite na marsuru angka suruanna patolhashon

tu si Elia. Diboto si Elia do na marsitutu do si Isebel i naeng mamunu ibana. Mambege barita i ma si Elia, laho ma ibana maporus tu parhorsihan paluahon dirina. Ala nunga hira na mandele, nunga dipangidohon ibana tu Debata i, asa dibuat hosana. Alai saleleng di pardalanan di parhorsihan opat pulu ari sian Berseba, pangulonan parjolo, asa sahat ibana dolok Horeb. Di pardalanan sai disuru Debata do surusuruanna, marmudumuduhon ibana, jala dipangkulingi Jahowa do ibana laho patoguhon rohana. Di angka inganan pangulonanna sahat tu dolok Horeb sai disungkun Jahowa do ibana mandok: " Aha do na niulam dison ale Elia". Dungi sai dialusi si Elia do mandok: "Marmurukmuruk situtu do ahu nian humongkop ulaon ni Jahowa, Debata Zebaot; ai nunga ditadinghon halak Israel parjanjianmu, jala nunga diloha nasida angka langgatanmi, nunga dibunui dohot angka panurirangmu marhite sian podang, jala sasada ahu na ma tading, dohot hosangki dope dilului nasida naeng buatonna." (1 Rajaraja 19: 14). Marhite i dipasahat ibana tu Debata

aha na diparungkilhon ni rohana. Na marsitutu do nian ibana mangula ulaonna songon panurirang na sinuru ni Debata Jahowa, manogunogu bangso i asa manadinghon parsombaon tu Baal, alai di hilala ibana hira na so marguna na niulana i. Alai dipapos Jahowa do rohana asa mulak mangula ulaonna hian, ai didok Jahowa adong do pe pitu ribu halak nari pasipasi ni halak Israel i na marsihohot mangihuthon Debata Jahowa, na so manimbil sian haporseaonna. Angkup ni jala disuru do ibana mamiahi tolu halak, i ma si Hasael gabe raja gumomgom Aram, si Jehu gabe raja ni Israel, dungi mamiahi si Elisa gabe panurirang singkat ni si Elia. Dibereng Debata ingkon ganti do raja ni Israel i asa adong hamubaon ni bangso i. Angkup ni i ala naung matua si Elia, dibereng Debata nunga porlu adong panggantina laho manorushon ulaon i.

2. Hatop mangoloi panjouon ni Tuhan i laho mangihuthon dohot manghobasi Ibana. Nang pe ulaon laho mamiahi si Elisa bahen gantina ulaon na parpudi do i dipasahat Debata tu si Elia, alai panjouon tu si Elisa i do na parjolo diulahon si Elia. Suraon, na tubu tu roha ni si Elia, naeng humatop adong gantina, ala manghilala ibana nunga lam surut gogona, nunga lam matua ibana, jala dihirim ibana Elisa ma muse manorushon angka ulaonna na asing na pinasahat ni Debata tu ibana. Angkup ni i, di na mardalan ibana dung mulak sian dolok Horeb, na parjolo jumpang ibana i ma si Elisa, na tongon maninggala di tanona dohot sampulu dua pasang horbo. Si Elisa ma na ma na mangulahon pasang na pasampuluduahon. Angka na asingna i angka naposona ma mangulahonsa. Anggo di terjemahan na adong di Bibelta on, horbo do didok. Alai di angka terjemahab Alkitab dohot Bibel na marhata Inggris, lombu do didok. Ra tumingkos do i, molo gabe horbo pe didok di terjemahan ni Bibelta i, na pahombarhon tu situasi ni luat di Tano Batak do i. Hira so adong do di tano Batak, lombu na dipangke laho maninggala hauma, alai sai horbo do na dipangke. Jadi disi dibereng si Elia si Elisa na meninggala i, manigor didapothon ma ibana, jala dilingkuphon sampesampena tu ibana. Songon i ma cara na dibahen si Elia laho manjou si Elisa, manillit ibana gabe dongan jala siseanna. Marhite i ma ibana pasahathon deba sahala na adong di ibana tu si Elia, songon na hea binahen ni si Musa tu na naeng panggantina, ima si Josua (4 Musa 27: 20). Di na manaek muse si Elia tu banua ginjang, dijomput si Elisa do sampesampe ni si Elia naung madekdek sian ibana (2 Rajaraja 2: 13). Lapatanna mulai sian i hibul ma sahala hapanurirangon ni si Elia i sahat ibana.

Mungkin sada panjouon na tompu do na binahen ni si Elia i tu panghilalaan ni si Elisa. Alai suraon nunga naung ditanda si Elia si Elisa i, jala si Elisa pe suraon nunga naung manada di Elia. Dipatupa si Elia i, ndada di inganan parsingkolaan ni angka panurirang, alai di inganan paninggalaan do di hauma. Alai nang pe songon i, manigor diantusi si Elisa do lapatan ni na binahen ni si Elia i tu ibana, i ma na manjou ibana, asa gabe sisean ni si Elia ibana laho mangihuthon jala manghobasi Tuhan i, marhite ulaon hapanurirangon.

3. Denggan parmisi tu natorasna, keluarga, dohot angka donganna.

Nang pe diboto si Elisa do ulaon na borat do na naeng ulahonononna i, tarlomobi di situasi hatiha i naung sange halak Israel marsomba tu debata Baal, alai ndang manjua ibana di panjouon na tu ibana. Manigor diolohon ibana do panjouon i laho mangihuthon si Elia dohot manghobasi ulaon i. Manigor ditadinghon si Elisa do horbo dohot ulaonna i, jala marlojong mangihuthon si Elia. Holan on do didok tu si Elia: "Ua loas ahu jolo mangumma damang dohot dainang, asa huihuthon ho." Lapatanna, denggan ibana pasangaphon natorasna, marhite na parmisi tu nasida. Hira na mangido tangiang do ibana sian natorasna. Jala diloas si Elia do ibana patupahon songon i. Alai dipaingot ibana, unang lupa ibana aha na binahen ni si Elia tu ibana, i ma ulaon na naeng siulaonna. Si Elisa pe ndang pola dihabiari adong pangambati di ulaon na naeng siulaonna i sian natorasna. Gariada didukung keluarga do ibana, ai pola dipatupa pesta bolon hira na mangido tangiang sian natorasna dohot sian sude keluarga, aleale nang angka naposona. Dipotong sapasang horbo na pinangkena maninggala, jala laos ulaula ni horbo i do dipangke marmasak juhut i, dungi dilehon panganon ni angka naposona dohot sude na jonok tu ibana. I ma pataridahon nunga hibul rohana maninggalhon ulaonna hian, maninggalhon sinamotna, jala hibul rohana mangihuthon Tuhan jala gabe parhalado na manghobasi ulaon ni Tuhan i rap dohot si Elia. Songon i do nang dipangido sian ganup hita, naeng hibul rohanta mangoloi panjouon ni Tuhan na tu hita laho mangihuthon dohot manghobasi ulaon-Na.***

Evangeliun:1 Raja-Raja 19:15-21

15 Alai ninna Jahowa ma tu ibana: "Mulak ma ho tu dalanmu hian tungkan Damaskus, laho ma ho tusi jala miahi si Hasael bahen raja gumomgom Aam.

16 Miahi dohot si Jehu, anak ni si Nimsi bahen raja gumomgom Israel, miahi dohot si Elisa, anak ni si Sapat sian Abel Mehola bahen panurirang singkatmu.

17 Jadi manang ise na malua sian podang ni si Hasael, ingkon mate bunuon ni si Jehu ma i, jala manang ise na malua sian podang ni Jehu, ingkon mate bunuon ni si Elisa ma i.

18 Angkup ni tinggal dope hubahen di Israel pitu ribu halak, saluhutna i angka na so mangalompit ulu ni totna marsomba tu Baal dohot na so dung mangumma ibana."

19 Dung i mardalan ma si Elia sian i, gabe jumpangsa si Elisa, anak ni si Sapat, tongon maninggala ibana dohot sampulu dua pasang horbo di jolona, ibana sandiri mangolatolat pasang na pasampuluduahon i. Dung i didapothon si Elia ma ibana laos dilungkuphon sampesampena tu ibana.

20 Dung i ditadinghon si Elisa ma angka horbo i jala marlojong mangihuthon si Elia, didok ma: "Ua loas ahu jolo mangumma damang dohot dainang, asa huihuthon ho." Dung i ninna si Elia ma tu ibana: "Laho ma ho mulak! Ai aha do na hubahen i tu ho?"

21 Dung i mulak ma ibana sian lambungna, jala dibuat sapasang horbo laos dipotongi do i, ulaula ni horbo i do dipangke marmasak juhut i jala dilehon panganon ni angka naposona. Dung i borhat ma ibana mangihuthon si Elia gabe parhaladona.

Epistel: 1 Tesalonik 3:1-13

Tarapul Roha ni Apostel Paulus dung

Hamumulak ni si Timoteus

1 Ala na so tartaon hami be siholnami, denggan do di rohanami, holan hami ma jolo tading di huta Aten.

2 Gabe husuru hami ma si Timoteus, angginami jala naposo ni Debata, manghobasihon barita na uli na sian Kristus, asa dipatogu rohamuna jala dipodai hamu marhaporseaon;

3 asa unang diunggilhon angka haporsuhon i na deba sian hamu; ai diboto hamu do, tusi do hita dipadiri.

4 Ai di tongatongamuna dope hami, nunga hulumbahon hami hian tu hamu, na naeng masa angka haporsuhon tu hita, songon naung masa tutu patar di jolomuna.

5 Dibahen i ndang tartaon ahu be, gabe husuru na manangkasi haporseaonmuna, atik beha naung diunjuni sipangunjuni i hamu, gabe magopo maon na huhalojahon hami.

6 Alai dung mulak si Timoteus tu hami sian hamu, denggan do dibaritahon tu hami haporseaonmuna dohot holong ni rohamuna angkup ni i dibaritahon do burjumuna marningot hami dohot sihol ni rohamuna, naeng idaonmuna hami, songon hami na masihol di hamu.

7 Disi ma tarapul hami marningot hamu, ale angka dongan, dibahen haporseaonmuna, nang pe didondoni ragam ni hagogotan dohot haporsuhon hami.

8 Ai na mangolu ma hami nuaeng, anggo hot hamu jongjong marojahan di Tuhan i.

9 Ai hamauliateon dia ma tarlehon hami tu Debata, balos ni saluhut halalas ni roha na huhilala hami di jolo ni Debatanami marningot hamu?

10 Borngin dohot arian lobi sumurung do tangiangnami, asa anggiat idaonnami bohimuna laos patingkosonnami, ia adong dope hahurangan ni haporseaonmuna.

11 Alai Debata Amanta sandiri dohot Tuhanta Jesus ma pabulushon langkanami tu hamu!

12 Alai digohi jala lam ditambai Tuhan i ma haholongon ni rohamuna sama hamu, nang tu saluhut, songon holong ni rohanami di hamu!

13 Laho patoguhon rohamuna, gabe so hasurahan marhabadiaon di jolo ni Debata Amanta, di na ro i Tuhanta Jesus rap dohot saluhut angka na badiaNa.

Semua tanggapan:

44

1

Suka

Komentari

Kirim

Bagikan