TANGGAPAN DI FACE BOOK TU PANGHATAION TARINGOT TU HKBP DUNG SARATUS TAON IL NOMMENSEN

Tanggapan di Face Book tu panghataion taringot tu HKBP dung Saratus taon IL Nommensen.

Di sosial media face book, adong do panghataion dohot komentar na marragam taringot tu sada sangkap ni HKBP laho mengkaji pardalanan dohot pangulaon ni HKBP dung saratus taon hamamate ni IL Nommensen di taon 1918. Adong do mananggapi i seolaholah songon sada usaha mengkultushon IL Nommensen songon sahalak parbarita na uli na tarbarita di Tano Batak. Alai adong do na mandok, isara ni Ephorus Emeritus PWT Simanjuntak (Ephermersim), ndang  na mengkultushon IL Nommensen sangkap ni HKBP, molo ditaringoti pe disi ari hamamate ni ILNommensen. Au pe mangantusi songon na nidok ni ompui Ephermersim i do. Ndang na memperingati hari kematian ni I.L. Nommensen sangkap na disi,  alai na neng mangalisa sian sudut sejarah do, songon dia ma HKBP dung hamamate ni Il.Nommensen. Pardalanan ni sejarah i boi dibagibagi tu manang piga periode, songon i do nang sejarah ni HKBP. Adong periode pada masa Nommensen, adong periode dung Nommensen. Tontu sejarah HKBP di periode tingki ni si Nommensen nunga godang naung dihata i, alai sejarah ni HKBP di periode dung Nommensen ndang godang do pe ditaringoti. Adong muse do na maparsoalhon goar HKBP ( Huria Kriten Batak Protestan) dohot ari hatutubu ni ni HKBP. Didik rupani, ndang tepat ari hatutu ni HKBP 7 Oktober 1861, alai 31 Maret 1861, i ma ari pandidion parjolo na pinatupa ni missionar tu dua halak Batak. Jala goar HKBP i dung pe di taon 1929 i ditotophon, andorang so i ndang adong do pe goar HKBP. A;ai ninna roha, soal goar HKBP dang pola be sipersoalhonon, ai nunga disepakati be ari hatutu ni HKBP ari 7 Oktober 1861. Taringot tu ari hatutubu, marragam do cara ni angka huria na adong di portibi on laho manontuhon ari hatutubuna, jala sudena i adong be do dasar teologisna. Adong do na manontuhon marojahan tu haroro ni parbarita na uli na parjolo tu daerah i. Adong do na manontuhon marojahan  tu ari pandidion na parjolo na dipatupa di luat i, adong marojahan tu ari kemandirian ni huria i, manang pengakuan ni pamarenta setempat di huria i. HKBP ndang marojahan tu sada sian na tolu i, alai marojahan tu ari ni Rapot Parjolo na pinatupa ni parbarita na niutus ni RMG sian Jerman di Tano Batak do, i ma di Sipirok ari 7 Oktober 1861. Hatiha i marrapot ma opat missionar laho manghatai taringot tu siulaon nasida  dohot taringot tu pambagian ni inganan nasida laho mandalahon barita na uli i. Nasida na opat halak i,  i ma Heine, Klammer, Betz dohot Van Asselt. Andorang so marrapot nasida nunga mangula hian di Tapanuli Selatan Betz dohot Van Asset na sinuru ni badan sending sian huria Ermelo Bolanda. Jala nunga sanga adong na tardidi dua halak dibahen nasida , i ma Simon Siregar dohot Jakobus Tampubolon, di ari 31 Maret 1861. Nian anggo na dumenggan, ari on do tontuhonon ni HKBP ari hatutubuna, jala asa laos tarida na niula ni Van Asselt di ulaonna namarbarita na uli i. Alai ndang i ditontuhon, ari 7 Oktober 1861 i do. Nian di sejarahna ndang dihalupahon HKBP i, dohot angka na niula ni badan sending na asing naung manguji patolhashon barita na uli, ima sian Inggris dohot sian Amerika. Tontu boi do i taantusi, ala memang badan sending RMG ma na manguduti ulaon i jala na tangkas marhasil pararathon barita na uli i muse di tongatonga ni halak Batak.

            Soal mambahen goar HKBP nunga melalui proses naung leleleng. Di mulana goar na binahen ni RMG, i ma Huria Mission di Tano Batak. Alai di Synode Godang taon 1925 diganti ma i gabe Huria Kristen Batak, jala di Synode Godang taon 1929 ditambahon ma tu goar i hata Protestan, gabe Huria Kristen Batak Protestan, laho patuduhon identitasna songon sada huria na beraliran Protestan, na asing sian huria Roma Katolik naung mulai masuk hatiha i di Tano Batak.

Di na manghatai taringot tu HKBP saratus taon dung Nommensen, tontu nanaeng di hali i ma pardalanan ni HKBP di bagasan na saratus taon na salpu dung monding IL Nommensen taon 1918. Angka aha ma na masa, jala boasa masa songon i. Di tingki Nommensen memang tangkas do usahana pamajuhon huria Batak, dohot pamajuhon halak Batak di sude bidang parngoluon. Ndada holan bidang partondion manang parogamoon dipamaju ibana halak Batak, alai dohot do di bidang pendidikan, bidang kesehatan, dohot bidang sosial ekonomi. Saonari dunghon i, porlu do muse ditinjau,songon dia ma pertumbuhan ni HKBP di ganup sub-periode. Subperiode i boi do marojahan tu masa kepemimpinan ni sadasada ephorus namanguluhon HKBP dung masa ni Nommensen. Angka aha ma naung pinatupa ni HKBP patuduhon “ugas panggilanna” di tongatonga ni portibion. Tarmasuk ma dohot angka tantangan na masa diadopi, sahat tu manang piga huria naung mamulik sian HKBP. On pe porlu dikaji, boasa masa na songn i. Pada umumna diantusi angka ahli sejarah, masa pamulihon  (perpecahan ) di HKBP mulai sian taon 1927, ( HchB /HKI, PKB, Mission Batak) dohot angka na mangihut muse. Godang do perpecahan i masa ala ni masalah kepemimpinan, ndada ala ni parasingan ni dogma. Adong do muse na mamulik ala na manjae, isara ni GKPS, GKPA, GKPM dohot  GKPPD. Tontu laho menkaji angka na niula ni HKBP dohot angka na masa na niadopan ni HKBP di tingki na salpu dung saratus taon Nommensen, ingkon sian sudut analisa sejarah do i dibahen asa marguna. Jala molo denggan do i diuraihon, mangihuthon ahu mansai marguna do i. Ganup mangalangka hita tu jolo, ingkon tongtong do hita marsiajar sian sejarah naung salpu. Jadi ahu mamereng ndang adong disi usaha laho mangkultushon Nommensen,  alai na manghatai pardalanan dohot pangulaon ni HKBP na ma dung saratus taon naung salpu Nommensen. (MSM)